«Besqala mining Valley» махсус майнинг зонасининг резиденти сифатида рўйхатдан ўтиш учун юридик шахс Қорақалпоғистон Республикаси ҳудудида давлат рўйхатидан ўтган бўлиши, майнингни фақат рўйхатдан ўтиш вақтида кўрсатилган манзилда амалга ошириши ва майнинг ускуналарини ўрнатиш учун мўлжалланган алоҳида жой бўлиши керак.

Бунда майнинг ускуналарини ўрнатиш учун мўлжалланган жойнинг санитария меъёрлари ва қоидаларига жавоб бериши ҳамда техник хавфсизлик талабларини ҳисобга олган ҳолда электр энергияси таъминоти тизимининг техник созлигини таъминлаш зарур. Майнинг ягона электр энергетика тизимига уланган ҳолда амалга оширилган тақдирда, истеъмол қилинадиган электр энергиясининг алоҳида ҳисобланишини таъминлаш мақсадида, Электр энергиясини ҳисобга олиш ва назорат қилишнинг автоматлаштирилган тизимига (ЭҲНАТ) уланиш имкониятига эга бўлган рўйхатдан ўтказилган электр энергиясини ҳисобга олиш ускунаси бўлиши шарт.

Иқтисодий жиноятлар, шунингдек, жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролларини тарқатишни молиялаштириш, уюшган жиноятчилик, коррупция ва бошқарув тартибига қарши жиноятларни содир этганлик учун гумон қилинаётган ёки судланганлиги олиб ташланмаган ёхуд судланганлик ҳолати тугалланмаган шахслар томонидан резидентни бошқаришга йўл қўйилмайди.

Қорақалпоғистон ахборот агентлиги