Мамлакатимизда хотин-қизларнинг жамиятдаги фаоллигини қўллаб-қувватлаш борасида олиб борилаётган ишлар давом этмоқда. Нукус шаҳрида хотин-қизлар тадбиркорлигини қўллаб-қувватлаш борасида муҳим ҳисобланган «Ҳамроҳ» компанияси Қорақалпоғистон филиалининг очилишига бағишланган тадбир ўтказилди.

Унда Қорақалпоғистон Республикаси Жўқорғи Кенгеси Раиси Аманбай Оринбаев, Ўзбекистон Республикаси Президенти Администрацияси раҳбарининг маслаҳатчиси Н.Давлетова иштирок этди.

Таъкидланганидек, сўнгги йилларда муҳтарам Президентимиз раҳбарлигида хотин-қизларни қўллаб-қувватлаш давлат сиёсатининг устувор йўналишларидан бирига айланди. Юртимизда уларга тадбиркорлик йўналишида кўплаб имтиёзлар берилмоқда.

Шу қаторда, Президентимизнинг 240-сонли фармони билан «Ҳамроҳ» компанияси томонидан 2026-2027 йилларда 6 минг нафар хотин-қизларнинг тадбиркорлик лойиҳаларини молиявий қўллаб-қувватлаш учун 2 триллион сўм йўналтириш, 3 мингга яқин хотин-қизларни тадбиркорликка ўқитиш ҳамда 2 минг нафар хотин-қизнинг тадбиркорлик фаолиятига кўмаклашиш белгиланган.

Ана шундай эзгу ишлар қаторида компания филиалининг очилиши хотин-қизларимизни тадбиркорликка кенг жалб этишга, уларнинг ўз бизнесини янада ривожлантиришга кўмаклашишга асос бўлиб хизмат қилади.

                                            Қорақалпоғистон ахборот агентлиги