Бугун Германияда ўтаётган “Freestyle Chess Grand Slam-2025”нинг ҳал қилувчи баҳсларида Синдоров 3-ўрин, Абдусатторов 5-ўрин учун курашади.
Германиянинг Вайссенхаус шаҳрида ўтаётган “Freestyle Chess Grand Slam-2025” турнири ўзининг энг юқори нуқтасига келди.
Кеча ярим финал ва 5-8-ўринлар учун ўтказилган саралаш мусобақаларининг сўнгги кунида кимлар айнан қайси поғоналар учун кураш олиб бориши маълум бўлди.
Бугун, 13 февраль куни бўладиган баҳсларда ҳамюртимиз Жавоҳир Синдоров ФИДЕ рейтингининг етакчиси, собиқ жаҳон чемпиони Магнус Карлсен билан 3-ўрин учун кечадиган мусобақанинг илк турида рўбарў келса, Нодирбек Абдусатторов 5-ўрин учун америкалик Хикару Накамура билан дастлабки мусобақада дона суради.
Кеча ўтказилган ярим финалда Жавоҳир Синдоров ва дунё рейтингида иккинчи ўринни эгаллаб турган америкалик гроссмейстер Фабиано Каруана билан финал йўлланмаси учун кураш олиб борди. 8 соатга яқин вақт давомида улар 6 та партияда куч синашди. Сўнгги ўйинда Синдоровда ғолиб чиқиш имкони бор эди. Аммо юриш ҳолатида қулай имкониятни ўтказиб юборди. Бундай вазиятдан унумли фойдаланган дунё рейтингида иккинчи ўринни эгаллаб турган америкалик Фабиано Каруана ҳал қилувчи партияда тажриба борасида ҳамюртимиздан устун келди.
Айтиш лозим, норвегиялик шахмат афсонаси Магнус Карлсен билан Жавоҳир Синдоров саралаш босқичида куч синашиб, уни мағлуб этганди. Бу сафар натижалар қай кўринишда бўлиши эса Жавоҳирнинг руҳий мувозанати барқарор бўлишига, қолаверса, омадга боғлиқ.
5-8-ўринлар учун ўтказилган баҳсларда Нодирбек Абдусатторов плей-оффнинг иккинчи учрашувида франциялик Алиреза Фирузжага қарши қора доналарда ҳаракатланди. Баҳсни ишончли бошлаган ҳамюртимиз кучли рақибини мураккаб вазиятда енгишга муваффақ бўлди.
Бугун Нодирбек Абдусатторов 5-ўрин учун ўтадиган мусобақада чорак финалда Синдоровдан мағлуб бўлган Хикару Накамура билан беллашади.
Бугун шунингдек, халқаро турнирнинг ғолиблиги учун германиялик Винсент Кеймер Фабиано Каруана ўртасидаги дастлабки мусобақа бўлиб ўтса, амалдаги жаҳон чемпиони Гукеш Доммаражу ва Алиреза Фирузжа 7-8-ўринларнинг тақдирини ҳал этиш учун 1-тур ўйинларини ўтказади.
Етакчи шахматчиларимиз Нодирбек ва Жавоҳирнинг ушбу нуфузли мусобақада қатнашиш йўлидаги мураккаб саралаш баҳсларида ғолибликка эришиб, асосий совринларга даъвогар 10 нафар энг кучли шахматчилар қаторидан ўрин эгаллагани тарихий натижа эканлигини эътироф этмоқ лозим. Бу, ўзбек шахмат мактаби, унинг куч-қудрати, салоҳияти йилдан йилга юксалиб бораётганининг ёрқин ифодасидир.
Эслатиб ўтамиз, “Freestyle Chess Grand Slam-2025” турнирида 1-ўринни эгаллаган шахматчи 200 минг, 2-ўрин соҳиби 140 минг, 3-ўрин эгаси 100 минг АҚШ долларини қўлга киритади. 4-ўрин 60 минг, 5-ўрин 50 минг, 6-ўрин 40 минг, 7-ўрин 30 минг, 8-ўрин 20 минг, 9-ўрин 12 минг 500, 10-ўрин учун эса 7 минг 500 АҚШ доллари ажратилган.
Т.Рўзиев, ЎзА