Лондонда умумий мукофот жамғармаси 1 миллион АҚШ долларидан иборат “Global Chess League “Tech Mahindra” турнирининг иккинчи тур мусобақалари давом этмоқда.
Ортда қолган учинчи кунги баҳслар сарҳисобига кўра, Нодирбек Абдусатторов дона сураётган “PBG Alaskan Knights” жамоаси 12 очко билан якка пешқадамга айланиб олган вазиятда Синдоровнинг “Triveni Continental Kings” жамоаси 6 очко билан 2-ўринда бормоқда.
Кеча ўтказилган навбатдаги учрашувда “PBG Alaskan Knights” жамоаси “Ganges Grandmasters” жамоаси билан куч синашди. 6 та жуфтлик ўртасидаги беллашувнинг 3 тасида дуранг, 3 тасида ғалаба қайд этилди. Ушбу баҳсда Нодирбек Абдусатторов оқ доналарда Аржунга қарши дона сурди ва дурангга эришди.
Ҳамюртимиз Жавоҳир Синдоровнинг “Triveni Continental Kings” жамоаси кеча аввалига “American Gambits”ни мағлуб этди, кейин “Ganges Grandmasters” жамоаси билан курашда имкониятни бой бериб қўйди. Синдоров ҳар икки ўйинда рақиблари билан муроса йўлини танлади.
Бугун, 6 октябрь куни “American Gambits” – “Ganges Grandmasters”, “Alpine SG Pipers” – «PBG Alaskan Knights”, “upGrad Mumba Masters” – “Triveni Continental Kings”, “Alpine SG Pipers” – “American Gambits” жамоалари рўбарў келади.
Т.Рўзиев, ЎзА