Тошкентда Ўзбекистон – Қирғизистон Ишбилармонлар кенгашининг учинчи йиғилиши бўлиб ўтди.
Икки давлатнинг 80 га яқин ишбилармон доира вакиллари иштирок этган тадбир кун тартибидаги асосий масалалар Ўзбекистон – Қирғизистон тараққиёт жамғармаси маблағлари ҳисобидан қўшма тадбиркорликни ривожлантириш бўлди. Ушбу масала юзасидан жамғарма бошқаруви раиси Азиз Алиев маъруза қилди.
Қирғизистон савдо-саноат палатаси раҳбари Темир Сариев икки мамлакат Президентлари ўзаро ҳамкорлик учун мустаҳкам пойдевор яратганини таъкидлади.
Қайд этиш керак, Ўзбекистон ва Қирғизистон ўртасидаги товар айирбошлаш миқдори кейинги 5 йилда 5 баробарга ошиб, 2023 йил якунига кўра қарийб 1 миллиард долларни ташкил этди. Шундан экспорт 630 миллион, импорт эса 320 миллион долларга етган.
Анжуманда тез бузиладиган маҳсулотлар учун яшил йўлак, умумий лаборатория, санитария назорати, қўшимча назорат-ўтказиш пунктлари очиш ва темир йўл орқали юк ташиш ҳажмини ошириш масалалари ҳам муҳокама қилинди.
Қирғизистоннинг “Alaiku Organics” ва Ўзбекистоннинг “Milk House” компаниялари озиқ-овқат маҳсулотлари ишлаб чиқариш бўйича келишувга эришди.
Беҳруз ХУДОЙБЕРДИЕВ,
ЎзА