Миллий паралимпия қўмитасида ампутант футболчилар ўртасидаги жаҳон чемпионатида броньза медалини қўлга киритган Ўзбекистон терма жамоасини тақдирлаш маросими бўлиб ўтди.

Тадбирда расмийлар футболчиларимизни қўлга киритган муваффақияти билан яна бир бор қутлаб, улардан келгусида ҳам улкан ғалабалар кутиб қолишларини билдиришди.

Шунингдек, ампутант футболчиларимизнинг бундай рағбатлантирилиши имконияти чекланган бошқа ҳамюртларимизнинг спорт билан шуғулланишлари учун катта мотивация бўлишини алоҳида таъкидлашди.

Тадбирнинг энг қизғин ва эътиборга лойиқ жиҳати шундаки, унда қаҳрамон спортчиларимизга Президент совғаси – “Cobalt” машиналари тантанали равишда топширилди. Шу қаторда, терма жамоа аъзоси, Тошкент давлат транспорт университети Иқтисодиёт факультети Ю-3 гуруҳ талабаси Умид Абдухалилов ҳам тақдирланди.

—  Ҳар қандай иқтидорли спортчи ўз меҳнати ортидан мана шундай эътирофларга эришиши керак деб ўйлайман, —дейди Умид Абдухалилов. —Бугун бизларга қилинаётган эътибор эртага яна янги  “спорт юлдузлар”и порлашига туртки бўлади.

Шубҳасиз, бундай эътибордан барча ампутант футболчиларимизнинг қувончи чексиз. Улар давлатимиз раҳбарига кўрсатилган ушбу ғамхўрлик учун миннатдорлик билдириб, келгусида ҳам улкан ғалабаларни қўлга киритишларини таъкидлашди.

Н. Раҳмонова, ЎзА.