Ректор, Ўзбекистон Республикаси фан арбоби Рустам Холмуродов бошчилигидаги Самарқанд давлат университети жамоаси Хитойнинг Сиан архитектура ва технология университети (САТУ) вакиллари билан “ZOOM” платформаси орқали учрашув ўтказди.
Музокара чоғида халқаро алоқани янада ривожлантириш, СамДУ ва САТУ ҳамкорлиги доирасида кимё технологияси, материалшунослик, аниқ ва табиий фанлар, архитектура каби соҳаларда академик алмашинувни йўлга қўйиш масаласи батафсил муҳокама қилинди.
– Буюк Ипак йўли орқали боғланган ўзбек ва хитой халқлари ўртасидаги алоқа узоқ ўтмиш саҳифаларига бориб тақалади, – дейди Р.Холмуродов. – Бугунги кунда кўпгина йўналишларда ҳамкорлигимиз мавжуд. СамДУ ва Хитой университетлари ўртасидаги алоқалар ҳам бой тарихга эга. Шанхай, Ухан давлат университетлари, Шенси фан ва технология университети, Хинжианг физика ва кимё техникаси институти шулар жумласидан. Айни жараёнда тадқиқотчиларимиз Хитой университетларида ўқиб, тажриба орттириб қайтган. Сиан архитектура ва технология университети билан амалга оширилиши кўзда тутилаётган ҳамкорлик замирида ҳам шундай мақсад ётибди. Энди нафақат ўқитувчилар, балки талабалар, магистрлар, докторантура тадқиқотчилари ҳам мазкур университетда стажировка ўташи мумкин бўлади. Қўшма таълим дастурлари ва илмий алмашинув юзасидан олиб борилган алоқалар, албатта, самара беради. Ишонаманки, мазкур учрашув икки нуфузли университет нигоҳини бирлаштирган ҳолда илм-фан оламида чуқур салоҳиятли янги авлодни кашф этишга хизмат қилади.
– Бугунги учрашувда Сиан архитектура ва технология университети ва СамДУ муносабатини кенгайтириш муҳокама қилинди, – дейди кимё факультети декани Санжар Тиллаев, – Ҳозир аниқ ва табиий фанлар, материалшунослик, менежмент, инсон ресурсини бошқариш, архитектура ва санъатшунослик каби бугунги куннинг энг долзарб йўналишларида магистр ва докторантлар алмашинувини йўлга қўйиш бўйича келишувга эришилди. САТУ профессорларининг мавжуд имконият ва салоҳиятини СамДУ олимлари билан бирлаштирган ҳолда барқарор ривожланган келажак асосини яратувчи илмий янгиликларга эришиш, илмий-академик алмашинув асосида тадқиқот олиб бориш масаласида қатор амалий таклифлар илгари сурилди. Ўйлайманки, Самарқанд давлат университети билан САТУ ўртасидаги ҳамкорлик дунё бўйлаб долзарб мавзуларда тадқиқот олиб бориш, илм-фан оламида янги кашфиёт ва янгиликлар яратиш учун мустаҳкам замин яратади.
Учрашув давомида Самарқанд давлат университети ҳамда Сиан архитектура ва технология университетлари ўртасида ҳамкорлик меморандуми имзоланди.
Мазкур ташриф икки мамлакат ўртасида илм-фан ва таълим соҳасидаги мустаҳкам ҳамкорликни истиқболли соҳаларда йўлга қўйишнинг муҳим воситаси бўлди.
Ирода Бекмуродова,
СамДУ ахборот хизмати ходими,
Шавкат Акрамов (сурат)