Ózbekistan Respublikası Prezidentiniń q a r a r ı
Sırtqı ekonomikalıq xızmetti bunnan bılay da liberallastırıw, eksportqa ónim jetkerip beriwdi kúsheytiwdi xoshametlew, jergilikli eksport etiwshi shólkemlerdiń básekige shıdamlılıǵın hám qarjı turaqlılıǵın arttırıw, artıqsha hám eskirgen ruxsat beriw tártiplerin biykar etiw arqalı isbilermenlik ortalıǵın jetilistiriw maqsetinde:
1. 2017-jıl 1-iyulden baslap sonday tártip engizilsin, oǵan muwapıq:
isbilermenlik subektlerine jańa miywe-ovoщ, júzim hám palız ónimleriniń haqısın aldın ala 100 proсent tólew shárti menen tikkeley shártnamalar tiykarında eksport etiwge ruxsat etiledi;
ózi islep shıǵarǵan tovarlardı shet el valyutasına olardıń ózine túser bahasınan tómen bahalar boyınsha erkin túrde yamasa ministrliklerdiń, vedomstvolardıń hám xojalıq birlespeleriniń sırtqı sawda shólkemleri arqalı eksport etiwshi shólkemlerge, Ózbekistan Respublikası Prezidentiniń 2012-jıl 26-marttaǵı PQ-1731-sanlı qararı menen shólkemlestirilgen Ónimlerdi dúnya bazarında haqıyqıy júzege kelgen, sonıń ishinde, ózine túser bahasınan tómen bahalarda eksport etiw máselelerin kórip shıǵatuǵın arnawlı eksport komissiyasınıń qararları tiykarında, salıq salıw maqsetinde tovarlardı (jumıslardı, xızmetlerdi) satıwdan alınǵan túsimlerdiń muǵdarı tovarlardı (jumıslardı, xızmetlerdi) satıwdıń haqıyqıy bahasınan kelip shıǵa otırıp anıqlanadı;
ózi islep shıǵarǵan ónimlerdi eksport etetuǵın shólkemler ushın ámeldegi jeńillikler menen preferenсiyalar ózleri iyesi bolǵan ónimlerdi eksport etetuǵın shólkemlerge engiziledi;
burın paydalanıwda bolǵan mashinalardı, ásbap-úskenelerdi hám mexanizmlerdi olar tayarlanǵan waqıttan baslap 5 jıl ótkennen keyin eksport etiw Ózbekistan Respublikası Húkimetiniń qararlarısız ámelge asırıladı;
keltirilip atırǵan hám islep shıǵarılıp atırǵan tovarlardıń muwapıqlıq sertifikatın rásmiylestiriw múddetleri 3 jumıs kúnine qısqartıladı.
2. Ózbekistan Respublikası Awıl hám suw xojalıǵı ministrligi xalıqaralıq karantin qaǵıydalarınıń ósimlikler karantini salasındaǵı milliy normativlik hújjetlerge engiziliwin támiyinlew boyınsha ilajlar rejesin bir ay múddette islep shıqsın hám tastıyıqlasın.
3. Ózbekistan Respublikası Prezidentiniń 2005-jıl 11-marttaǵı «Eksport-import operaсiyaların tártipke salıw ilajları haqqında»ǵı PQ-26-sanlı qararınıń 3-bánti tómendegi redakсiyada jazılsın:
«3. Nızam hújjetlerinde belgilengen TN SIX kodları toparlarına tiyisli, burın paydalanıwda bolǵan mashinalardı, ásbap-úskenelerdi hám mexanizmlerdi eksport etiw Ózbekistan Respublikası Húkimeti qararları boyınsha ámelge asırıladı.
Bunda burın paydalanıwda bolǵan mashinalardı, ásbap-úskenelerdi hám mexanizmlerdi eksport etiw, olar tayarlanǵan waqıttan baslap 5 jıl ótkennen soń Ózbekistan Respublikası Húkimetiniń qararısız ámelge asırıladı».
4. Ózbekistan Respublikası Sırtqı sawda ministrligi mápdar ministrlikler hám vedomstvolar menen birgelikte:
burın paydalanılǵan mashinalardı, ásbap-úskenelerdi hám mexanizmlerdi eksport etiwge ruxsat beriw haqqında qarar qabıl etiw tártibi haqqındaǵı Rejeniń joybarın bir ay múddette islep shıqsın hám tastıqlaw ushın Ózbekistan Respublikası Ministrler Kabinetine kirgizsin;
eki ay múddette Ózbekistan Respublikası Ádillik ministrligi menen birgelikte nızam hújjetlerine usı qarardan kelip shıǵatuǵın ózgerisler menen qosımshalar haqqında Ózbekistan Respublikası Ministrler Kabinetine usınıslar kirgizsin.
5. Usı qarardıń orınlanıwın qadaǵalaw Ózbekistan Respublikasınıń Bas ministri A.N.Aripovqa júklensin.
Ózbekistan Respublikası
Prezidenti Sh.MIRZIYoEV

Tashkent qalası,
2017-jıl 21-iyun
***
Ózbekistan Respublikası Prezidentiniń «Jergilikli eksport etiwshi shólkemlerdi bunnan bılay da qollap-quwatlaw hám sırtqı ekonomikalıq xızmetti jetilistiriw ilajları haqqında»ǵı qararına
T Ú S I N I K
2017-2021-jıllarda Ózbekistan Respublikasına rawajlandırıwdıń bes tiykarǵı baǵdarı boyınsha háreketler strategiyasın engiziw sheńberinde isbilermenlik subektleriniń eksport xızmetin xoshametlew hám keńeytiw boyınsha keń kólemli jumıslar ámelge asırıldı.
Tek ǵana usı jıldıń ótken dáwirinde 360 tan aslam jańa kárxana eksport xızmetine tartıldı, 120 dan aslam jańa ónimlerdiń eksport etiliwi ózlestirildi, tayar toqımashılıq ónimleri, mineral tóginler, jeńil avtomobiller hám sırtqı bazarlarda talap joqarı bolǵan basqa da ónimlerdiń eksport kólemleri sezilerli dárejede arttı.
2016-jılı shólkemlestirilgen «Ózagroeksport» qánigelestirilgen sırtqı sawda kompaniyasınıń jergilikli miywe-ovoщ ónimlerin sırtqı bazarlarǵa alıp shıǵıw hám jańa bazarlardı ózlestiriw boyınsha jumısı sezilerli dárejede jedellesti, nátiyjede usı jıldıń basınan 230 mıń tonnadan aslam miywe-ovoщlar eksportqa jetkerip berildi.
Sonıń menen birge, miywe-ovoщ ónimlerin eksportı salasındaǵı jumıs talqılanǵanda paydalanılmay atırǵan úlken potenсial saqlanıp qalınıp atırǵanı hám miywe-ovoщ ónimlerin islep shıǵarıwshılardıń eksport xızmetinde keń kólemde qatnasıwı ushın byurokratiyalıq tosqınlıq bar ekenin kórsetpekte.
Usı múnásibet penen, usı jıl 21-iyunde Ózbekistan Respublikası Prezidenti tárepinen qabıl etilgen «Jergilikli eksport etiwshi shólkemlerdi bunnan bılay da qollap-quwtlaw hám sırtqı ekonomikalıq xızmetti jetilistiriw ilajları haqqında»ǵı qarar, bárinen burın, barlıq miywe-ovoщ ónimlerdi islep shıǵarıwshılardıń óziniń ónimlerin sırtqı bazarlarǵa erkin jetkerip beriwdi qollap-quwatlaw hám sol tiykarda «Ózagroeksport» AJ monopoliyasın biykar etiwge qaratılǵan. Usı maqsette 2017-jıldıń 1-iyulinen baslap barlıq isbilermenlik subektlerine jańa miywe-ovoщ ónimlerin, júzim hám palız ónimlerin tólewdi aldın ala 100 proсent ámelge asırıw shárti menen tikkeley shártnamalar tiykarında eksport etiw huqıqı berildi.
Atap ótiw kerek, bul ilajlar miywe-ovoщ ónimleriniń eksportın keńeytiw menen birgelikte diyxan hám fermer xojalıqların sırtqı bazarlarda talap joqarı bolǵan ónimler islep shıǵarıwdıń kólemin keńeytiw, jer resurslarınan nátiyjeli paydalanıw, sonıń ishinde, qayta eginler egiw esabınan awıl xojalıǵı ónimleriniń zúráátligin arttırıwǵa xoshametleydi. Bul bolsa óz gezeginde, óndirilip atırǵan miywe-ovoщ ónimleriniń bahası jáne sapası boyınsha sırtqı bazarlarda básekige shıdamlılıǵın arttırıw imkaniyatın beredi. Eń áhmiyetlisi, diyqan hám fermer xojalıqları jetistirgen ónimleriniń haqıyqıy iyesi sıpatında olardan óziniń qálewine bola paydalanıw, erkin eksport etiw, dáramatlardı arttırıw, shańaraǵınıń materiallıq abadanlıǵın támiyinlewi múmkin boladı, qosımsha valyuta túsimleri bolsa awıl xojalıǵı ónimlerin islep shıǵarıwdı keńeytiw hám olardı tereń qayta islew boyınsha jańa joybarlardı investiсiyalaw ushın imkaniyat jaratadı.
Sonıń menen birge, jergilikli miywe-ovoщ ónimlerin sırtqı bazarlarǵa shıǵarıw ushın shet elde qabıl etilgen norma hám standartlarǵa ónimlerdiń muwapıqlıǵın támiyinlew boyınsha sistemalı jumıslardı ámelge asırıw talap etiledi. Usı maqsette Prezident qararı menen Awıl hám suw xojalıǵı ministrliginen bir ay múddette milliy nızamshılıq hújjetlerine xalıqaralıq karantin qaǵıydaların engiziw boyınsha anıq ilajlar rejesin islep shıǵıw hám tastıyıqlaw tapsırıldı.
Qabıl etilgen qarardıń áhmiyetli táreplerinen biri, tek ǵana ónim islep shıǵarıwshılarǵa emes bálkim ónimlerdi shet elge eksport etiwde jergilikli óndiriwshilerge kómeklesetuǵın sırtqı sawda shólkemlerine de eksport xızmetin ámelge asırıwda teńdey sharayatlar jaratıldı. Bunnan tısqarı, islep shıǵarıwshı-eksport etiwshiler ushın qolanılatuǵın ámeldegi nızamshılıqta názerde tutılǵan jeńillikler hám qolaylıqlar endi jergilikli islep shıǵarıwshılardıń ónimleriniń eksportı menen shuǵıllanatuǵın barlıq isbilermenlik subektlerine engiziledi. Bul eksport penen tiyisli tájiriybe hám zárúr qarjılarǵa iye, turaqlı túrde dúnya bazarı konyunkturasın baqlap baratuǵın jáne sırtqı bazarlarda isenimli sherikleri bar qánigelesken kompaniyalardıń ónimler eksportı menen shuǵıllanatuǵın xalıqaralıq ámeliyatqa tolıq sáykes keledi.
Bunnan tısqarı, bul normanıń engiziliwi zamanagóy marketing usıllarınan, sonday-aq, sırtqı sawda kompaniyalarınıń imkaniyatları menen abzallıqlarınan maksimal paydalanıw imkaniyatın beredi, bul óz gezeginde respublikamızdıń eksport potenсialın sezilerli dárejede kúsheytiwge, eksport geografiyasın hám ónimler eksportınıń nomenklaturasın keńeytiwge alıp keledi.
Sonday-aq, hújjette sırtqı ekonomikalıq xızmetti ámelge asıratuǵın isbilermenlik subektlerin ruxsat alıw tártibinen ótiwdegi, sonıń ishinde, ónimlerge muwapıqlıq sertifikatların rásmiylestiriw múddetleriniń sozılıp ketiwi sıyaqlı ayırım qıyınshılıqlar boyınsha kóplegen mámleketlik uyımlarǵa múrájatlardıń sheshimi óz kórinisin tapqan. Ózbekistan Respublikası Prezidentiniń qararı menen bunnan keyin sertifikatlaw uyımları tárepinen islep shıǵılatuǵın shet elden alıp kelinetuǵın ónimlerge muwapıqlıq sertifikatlr 3 jumıs kúnnen kóp bolmaǵan múddette rásmiylestiriliwi qatań belgilep qoyılǵan.
Sonıń menen birge, qarardı sırtqı bazarlardaǵı qolaysız konyunktura sharayatında ózleri islep shıǵarǵan ónimlerdi ózine túser bahasınan tómen bahada eksport etiwge májbúr bolǵan kárxanalar ushın salıq júgin kemeytiw ilajı názerde tutılǵan. Solay etip, Arnawlı eksport komissiyasınıń juwmaqları tiykarında ózine túser bahasınan tómen bahalarda eksport etilgen tovarlardan (jumıs, xızmet) túsim olardıń ámeldegi satıw bahalarınan kelip shıǵa otırıp salıqqa tartıladı, bul óndiriwshilerge salıqtan azat bolǵan qarjılar óndirilip atırǵan ónimlerdiń ózine túser bahasın bunnan bılay da azaytıw boyınsha ilajlardı ámelge asırıw imkaniyatın beredi.
Juwmaqlap aytqanda, bul qarardıń norma hám tártipleriniń ámelge asırılıwı respublikamızdıń eksport potenсialın kúsheytiwge, eksport geografiyasın keńeytiwge hám diversifikaсiyalawǵa, sırtqı bazarlarǵa jergilikli ónimlerdi alıp shıǵıwda zamanagóy marketing usıllarınan jedel paydalanıwǵa, sonday-aq, ónimler eksportı menen shuǵıllanatuǵın kárxanalardıń sanın kóbeytiwge jáne olardıń qarjı turaqlılıǵın arttırıwǵa baǵdarlanǵan.