Ózbekstan Respublikası Prezidentiniń qararı

Pútkil ómirin kórkem ónerge baǵıshlap kiyatırǵan, ózbek milliy estradasın dúnyaǵa tanıtıp, elimizdiń mádeniyatı hám kórkem óneriniń abırayın arttırıwǵa sheksiz úles qosıp atırǵan, kóp qırlı jumısı xalıqlar arasında ruwxıy kópir bolıp xızmet etip atırǵan ustaz kórkem óner iyesi – Ózbekstan Respublikası xalıq artisti Farrux Zokirovtıń dóretiwshiligin keńnen úgit-násiyatlaw hám jas áwladqa múnásip jetkeriw maqsetinde qarar etemen:
Tashkent qalası Yashnabad rayonındaǵı 7-sanlı balalar muzıka hám kórkem óner mektebine (keyingi orınlarda – Mektep) Farrux Zokirovtıń atı berilsin.
2. Farrux Zokirov atındaǵı 7-sanlı balalar muzıka hám kórkem óner mektebiniń oqıw-tárbiya procesin muwapıqlastırıp barıw hám jas talantlılardı qollap-quwatlaw boyınsha kórkem-pedagogikalıq keńes shólkemlestirilsin hám onıń quramı qosımshaǵa muwapıq tastıyıqlansın.
3. Tómendegiler:
a) Mektepte:
(i) “Yalla” atındaǵı balalar ansambliniń jumısın shólkemlestirsin;
(ii) Jaslar dóretiwshilik laboratoriyası hám “ustaz-shákirt” dástúrleri tiykarında estrada baǵdarı boyınsha atqarıwshılıq sheberlik mektepleri shólkemlestirilsin;
(iii) Mektep kórkem-pedagogikalıq keńesiniń qararı menen shólkemlestirilgen sheberlik mektebiniń ustaz-dóretiwshileri Mámleketlik byudjet qarjıları esabınan hár ayda miynetke haqı tólew eń az muǵdarınıń 5 esesi muǵdarında xoshametlenip barılsın;
b) Jaslar dóretiwshilik laboratoriyası sheńberinde:
(i) 2026/2027-oqıw jılınan baslap Qaraqalpaqstan Respublikası, wálayatlar hám Tashkent qalasınan 3 adamnan balalar muzıka hám kórkem óner mektebiniń qábiletli oqıwshılarınan ibarat topar qáliplestirilip barılsın jáne dem alıs dáwirinde jazǵı dógerekke tartılıp, estrada qosıqshılıǵı boyınsha arnawlı biypul kurslarda oqıtılsın;
(ii) 2026/2027-oqıw jılına shekem zamanagóy dawıs jazıw hám súwretke alıw studiyası shólkemlestirilsin jáne ol saxna úskeneleri hám lipasları menen támiyinlensin;
(iii) Mektep hám jazǵı dógerekke tartılǵan oqıwshılardıń dóretiwshilik úlgileri televidenie hám xalıqaralıq onlayn platformalarda kórsetip barılsın;
v) Jaslar dóretiwshilik laboratoriyasın shólkemlestiriw, onı úskenelew hám aymaqlardan oqıwshılardı jazǵı dógerekke tartıw, sonıń ishinde, olardıń jasaw, awqatlanıw hám transport qárejetleri tolıq Mámleketlik byudjetten qaplansın;
g) hár jılı Mektep hám jazǵı dógerektiń qábiletli 5 oqıwshısı jáne olardıń muǵallim hám koncertmeysterleriniń abıraylı xalıqaralıq tańlawlarda qatnasıwı menen baylanıslı qárejetler Mámleketlik byudjetten qaplansın. Onda bul tańlawlardıń dizimi Mádeniyat ministrligi tárepinen tastıyıqlanadı;
d) 2026-2027-jıllarda tájiriybe-sınaq túrinde xalıqaralıq abıraylı tańlawlarda jeńimpaz hám sıylı orın iyeleri bolǵan Mektep hám jazǵı dógerek oqıwshıları (jámáátleri) hám olardı tayarlaǵan muǵallim (koncertmeyster) tómendegi muǵdarda bir mártelik aqshalay sıylıq penen xoshametlensin:
(I) “Gran-pri” hám 1-orın iyesi 30 million sum, muǵallim (koncertmeyster) 20 million sum muǵdarında;
(ii) 2-orın iyesi 20 million sum, muǵallim (koncertmeyster) 10 million sum muǵdarında;
(iii) 3-orın iyesi 10 million sum, muǵallim (koncertmeyster) 5 million sum muǵdarında;
j) usı bántte názerde tutılǵan xalıqaralıq abıraylı tańlawlardıń jeńimpaz hám sıylı orın iyelerin jáne olardıń oqıtıwshıların (koncertmeysterlerin) xoshametlew tártibi Mádeniyat ministrligi tárepinen tastıyıqlansın, sonday-aq, 2027-jıldıń juwmaǵı boyınsha usı ámeliyattı respublika boyınsha keńnen engiziw boyınsha usınıs kirgizilsin;
z) ulıwmaxalıqlıq bayram baǵdarlamaları hám joqarı dárejedegi ánjumanlardıń kórkemlik bóliminde Mektep hám jazǵı dógerektiń qábiletli oqıwshıları jáne dóretiwshilik jámáátleriniń qatnasıwına sharayatlar jaratılıp, qollap-quwatlansın;
i) Mektepte ayrıqsha bahalarǵa oqıp atırǵan oqıwshılardıń 10 ı Mektep kórkem-pedagogikalıq keńesiniń qararı menen Mádeniyat ministrligi sistemasındaǵı qánigelestirilgen kórkem óner hám mádeniyat mektebi jáne mektep-internatlarına imtixanlarsız qosımsha kvota tiykarında qabıllaw tártibi engizilsin.
4. Mádeniyat ministrligi:
a) Mektepte “ustaz-shákirt” atqarıwshılıq sheberlik mekteplerin shólkemlestiriwde milliy estradamızdıń belgili ǵayratkerlerin tartsın jáne olardıń nátiyjeli jumıs alıp barıwı ushın zárúr sharayatlardı jaratsın;
b) Mektepti zárúr muzıka ásbapları, zamanagóy úskeneler hám texnikalar, sonday-aq, muzıka sabaqlıqları hám notalar toplamları menen támiyinlesin;
v) Farrux Zokirov atqarıw baǵdarlamasınıń tolıq notalastırılıwın hám olardıń toplamlarınıń basıp shıǵarılıwın jáne respublika kóleminde bilimlendiriw processlerine keńnen engiziliwin támiyinlesin;
g) Tashkent qalası hákimligi menen birgelikte Mektep imaratın kapital ońlaw hám aymaǵın abadanlastırıw ushın joybarlaw-smeta hújjetlerin islep shıqsın hám 2026-jıldıń aqırına shekem qurılıs-ońlaw jumısların juwmaqlasın.
Ekonomika hám qarjı ministrligi qararda belgilengen ilajlardı qarjılandırıw ushın Mádeniyat ministrligine 2026-jılı Ministrler Kabinetiniń rezerv qorınan 10 milliard sum ajıratsın, 2027-jıldan baslap zárúr qarjılardı Mámleketlik byudjet parametrlerinde názerde tutsın.
Usı qarardıń orınlanıwın nátiyjeli shólkemlestiriwge juwapker hám jeke juwapker etip mádeniyat ministri O.A.Nazarbekov belgilensin.
Qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.

Wzbekiston Respublikasi
Prezidenti Sh.MIRZIYoEV
Tashkent qalası,
2026-jıl 15-aprel