Ózbekstan Respublikası Prezidentiniń Qararı

Milliy suverenitet hám elimiz ǵárezsizligi hár bir mámlekettiń siyasiy, sociallıq, ekonomikalıq, mádeniy rawajlanıwınıń eń tiykarǵı shárti hám girewi bolıp esaplanadı. Bul sheshiwshi faktorlar mámlekettiń xalıqaralıq huqıq subekti sıpatında dúnya jámiyetshiliginde ılayıqlı orın iyelewine, xalıqtıń tınısh hám abadan turmısın támiyinlewge, onıń barlıq máplerin qorǵawǵa xızmet etedi.
Biziń milliy ǵárezsizligimiz márt hám jigerli xalqımızdıń bekkem erk-ıqrarı, ǵárezsizlik jolında gúresken pidayı ata-babalarımızdıń arzıw-niyetleriniń ámelge asıwı bolıp, Jańa Ózbekstandı qurıwǵa qaratılǵan iygilikli islerimizdiń bekkem tiykarı, keleshek áwladlarımız ushın qásterlep jetkeriwimiz shárt bolǵan ullı hám muqaddes qádiriyat bolıp esaplanadı.
Elimizdiń milliy suvereniteti hám elimiz ǵárezsizligi ideyalarınıń siyasiy-huqıqıy kepilliklerin ózinde jámlegen jańa redakciyadaǵı Konstituciyamız hám “Ózbekstan – 2030” strategiyası tiykarındaǵı rawajlanıw jolımız insan qádirin arttırıw, kóp milletli jámiyetimizde doslıq hám awızbirshilik ortalıǵın bekkemlew, milliy úrp-ádet hám dástúrlerdi qásterlep saqlaw, elimizde tınıshlıq hám turaqlılıqtı támiyinlew, onıń qorǵanıw qábiletin kúsheytiw, regionda jaqsı qońsıshılıqtı rawajlandırıw hám Watanımızdıń xalıqaralıq abırayın arttırıwda bekkem súyenish bolıp kelmekte.
Milliy ǵárezsizligimizdiń elimizdiń tariyxı, házirgi hám keleshektegi turmısımız ushın sheksiz áhmiyetin esapqa alıp, Ózbekstan Respublikası mámleketlik ǵárezsizliginiń 35 jıllıǵın Jańa Ózbekstannıń búgingi úlken potencialı hám jáhán maydanındaǵı abırayına muwapıq joqarı dárejede, múnásip belgilew maqsetinde qarar etemen:
Tómendegiler:
a) “Bir Watan, bir xalıq bolıp, jańa turmıs hám keleshek quramız!” degen bas ideyanı ózinde jámlegen ideyalıq-kórkem koncepciya hám baǵdarlama 1- hám 2-qosımshalarǵa muwapıq;
b) Ózbekstan Respublikası elimiz ǵárezsizliginiń 35 jıllıǵın belgilewge tayarlıq kóriw hám ótkeriw boyınsha respublikalıq komissiyanıń quramı 3-qosımshaǵa muwapıq tastıyıqlansın.
2. Respublikalıq komissiya (A.Aripov):
a) ǵárezsizliktiń 35 jıllıǵın Qaraqalpaqstan Respublikası, Tashkent qalası, wálayat hám rayon (qala) oraylarında, barlıq máhálleler, awıllarda, sonday-aq, ministrlikler hám uyımlar sistemasında múnásip belgilew maqsetinde koncepciyanıń mazmunın hám tiykarǵı baǵdarlarına muwapıq ilajlar baǵdarlamaların islep shıǵıw hám orınlanıwın támiyinlew.
Onda tómendegi tiykarǵı baǵdarlarǵa ayrıqsha itibar qaratıw:
(i) Jańa Ózbekstanda ámelge asırılıp atırǵan reformalar nátiyjesinde júzege kelgen úlken imkaniyatlar hám jetiskenliklerdi keńnen sáwlelendiriw;
(ii) mámleketimiz ekonomikası turaqlı pátlerde jedel rawajlanıp atırǵanı nátiyjesinde puqaralarımızdıń turmıs abadanlıǵı artıp atırǵanın kórsetip beriw;
(iii) elimizdiń tınıshlıǵı hám shegaralar qol qatılmaslıǵın támiyinlewge xızmet etiwshi qorǵanıw potencialın bekkemlew baǵdarındaǵı reformalardı sáwlelendiriw;
(iv) ǵárezsizlik sebepli milliy qádiriyatlar, mámleketshilik, puqaralıq jámiyeti institutları, sonıń ishinde, máhálle sistemasın rawajlandırıw boyınsha erisilgen jetiskenlik hám nátiyjelerdiń áhmiyetin atap ótiw;
(v) nuranıylar, hayal-qızlar hám sociallıq qorǵawǵa mútáj qatlamnıń máplerin támiyinlewge, jaslardıń “Jańa Ózbekstannıń dóretiwshileri” sıpatında bilim hám kásip iyelewi, isbilermenlik baslamaları hám talantların júzege shıǵarıwǵa zárúr sharayatlar jaratılǵanına itibar qaratıw;
(vi) milletler aralıq doslıq hám dinler aralıq keńpeyillik ortalıǵın saqlaw hám kúsheytiwdi barlıq puqaralardıń muqaddes minneti sıpatında úgit-násiyatlaw;
(vii) bayram ilajlarına barlıq jaslar, sociallıq hám etnikalıq toparlar hám watanlaslardıń jedel tartılıwın támiyinlew;
b) ilim, bilimlendiriw, mádeniyat, ádebiyat hám kórkem óner ǵayratkerleri, sportshılar, jámiyetshilik wákillerinen ibarat kórkem-dóretiwshilik toparlar dúziw hám olardıń qatnasıwında aprel-sentyabr ayları dawamında respublika boylap keń kólemli ruwxıy-aǵartıwshılıq ilajlar hám sociallıq joybarlardı óz ishine alǵan “Ǵárezsizlik toyı” (festivalı) ilajların ótkeriw;
v) Tashkent qalasında ótkeriletuǵın tiykarǵı bayram ilajına tayarlıq kóriwge belgili scenaristler hám rejissyorlar, shayır hám jazıwshılar, qosıqshı hám kompozitorlar, baletmeysterler, saxna xudojnikleri, talantlı jas atqarıwshılardı tartıw;
g) ǵárezsizliktiń 35 jıllıǵı aldında mámleketimizdiń iri sanaat, mádeniyat, bilimlendiriw hám sport mákemeleriniń saltanatlı ashılıw máresimlerin joqarı dárejede shólkemlestiriw ilajların kórsin.
3. Mádeniyat ministrligi Tashkent qalasında bolıp ótetuǵın tiykarǵı bayram ilajına tayarlıq kóriw hám onı ótkeriw boyınsha juwapker shólkem esaplanatuǵını belgilensin.
4. Kórkem óner akademiyası, Mádeniyat ministrligi, Jazıwshılar awqamı, Respublikalıq Ruwxıy-aǵartıwshılıq orayı 2026-jıl 1-iyunǵa shekem milliy ǵárezsizlik hám suverenitet ideyaların, Jańa Ózbekstan dóretiwshileriniń kelbetin ózinde sáwlelendirgen “Watan pidayıları” rámziy monumentiniń eskiz joybarın islep shıqsın hám Ministrler Kabinetine kirgizsin.
Bul monument Qaraqalpaqstan Respublikası, wálayatlar, rayonlar hám qalalarda 2026-2030-jıllarda qurılıp atırǵan ulıwma milliy birlik parkleriniń oraylıq bóleginde ornatılatuǵını esapqa alınsın.
5. Respublikalıq Ruwxıylıq hám aǵartıwshılıq orayı Jańa Ózbekstan rawajlanıwı izertlewleri institutı, “Yuksalish” ulıwma milliy háreketi, “Rawajlanıw strategiyası” orayı menen birgelikte 2026-jıl 1-avgustqa shekem hár bir tarawda ámelge asırılıp atırǵan reformalar, olardıń nátiyjeleri hám erisilgen jetiskenliklerge baǵıshlanǵan “Mustaqillik zafarnomasi” (“Ǵárezsizlik jılnaması”) arnawlı kitap-albomın tayarlasın.
6. Jaslar isleri agentligi, Respublikalıq Ruwxıylıq hám aǵartıwshılıq orayı 2026-jıl aprel ayınan sociallıq tarmaqlarda #Mustaqillik35, #Uzb35 xeshtegleri astında úgit-násiyatlaw akciyaların (fleshmoblar, podkastlar, viktorina hám basqalar) baslasın.
7. Kinematografiya agentligi, Ózbekstan Milliy teleradiokompaniyası, Ózbekstan milliy media birlespesi 2026-jıl aprel ayınan baslap “Ǵárezsizliktiń 35 jıllıq jılnaması” rubrikasında ǵárezsizligimizdiń tariyxıy basqıshları, erisilgen tabıslar hám dóretiwshilik jumısların sáwlelendiretuǵın hújjetli filmler, kórsetiwler tayarlaw hám telekanallarda kórsetiliwin támiyinlesin.
8. Oliy Majlis Nızamshılıq palatası hám Senatı, Ádillik ministrligi jáne Nızamshılıq hám huqıqıy siyasat institutınıń 2026-jıl avgust ayında Tashkent qalasında “Ǵárezsiz Ózbekstan – 35 jıllıq rawajlanıw jolı: reformalar, nátiyjeler hám perspektivalar” temasında xalıqaralıq ilimiy-ámeliy konferenciyanı ótkeriw haqqındaǵı usınısına kelisim berilsin.
9. Milletleraralıq qatnasıqlar hám sırt eldegi watanlaslar máseleleri boyınsha komitet “Vatandoshlar” jámiyetlik fondı, Respublikalıq Ruwxıy-aǵartıwshılıq orayı, Sırtqı isler ministrligi, Jazıwshılar awqamı menen birgelikte 2026-jıl avgust-sentyabr aylarında sırt eldegi watanlaslar hám ózbek diasporası wákilleriniń qatnasıwında “Ǵárezsiz Ózbekstan – maqtanıshım” súreni astında mádeniy-aǵartıwshılıq ilajlar shólkemlestirsin.
10. Oraylıq bank 2026-jıl 1-sentyabrge shekem “Ǵárezsizliktiń 35 jıllıǵı” estelik altın tengesin shıǵarıw ilajların kórsin.
11. Ózbekstan máhálleleri associaciyası, Transport ministrligi 2026-jıl 1-mayǵa shekem tiyislisinshe jańadan shólkemlestirilgen máhállelerden hám temir jol stanciyalarınan birine “Ǵárezsizliktiń 35 jıllıǵı” atamasın beriw boyınsha usınıslar kirgizsin.
12. Ótkeriletuǵın bayram ilajları:
a) Qaraqalpaqstan Respublikası hám wálayatlarda – tiyisli jergilikli byudjetlerdiń qosımsha derekleri hám qáwenderlik qarjıları esabınan;
b) Tashkent qalasında – Respublikalıq komissiya tárepinen tastıyıqlanǵan qárejetler smetasına muwapıq Ózbekstan Respublikasınıń respublikalıq byudjeti hám Tashkent qalası jergilikli byudjeti qarjıları esabınan teń úleslerde qarjılandırıladı.
13. Ózbekstan Milliy teleradiokompaniyası, Ózbekstan Milliy málimleme agentligi, “Dunyo” málimleme agentligine elimiz ǵárezsizligi, Jańa Ózbekstannıń rawajlanıw jolı hám xalqımızdıń awızbirshiligi haqqında dúrkin materiallar tayarlaw hám tarqatıw usınıs etilsin.
14. Respublikalıq komissiya usı qarardıń orınlanıwın qadaǵalaw, hár ayda Ózbekstan Respublikası Prezidenti Administraciyasına málimleme kirgizip barıw, zárúr jaǵdaylarda, qosımsha ilajlar kóriliwin támiyinlesin.
15. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.
Ózbekstan Respublikası
Prezident Sh.MIRZIYoEV
Tashkent qalası,
2026-jıl 1-aprel