Ózbekstan Respublikası Prezidentiniń Pármanı

Kishi biznes subektleri ushın salıq rejimin jáne de qolaylastırıw, qosımsha qun salıǵı hákimshiligin ápiwayılastırıw arqalı aylanıstıń ashıq-aydınlıǵın támiyinlew hám biznestiń ósiwin xoshametlew maqsetinde qarar etemen:

Tiykarǵi maqsetler
Tómendegiler usı Pármandı qabıl etiwden gózlengen tiykarǵı maqsetler etip belgilensin:
(a) biznestiń ósiwi ushın ekonomikalıq hám administrativlik qolaylıqlar jaratıw;

(b) tiykarǵı salıq stavkaların asırmastan ashıq-aydın salıq bazasın keńeytiw;

(v) sanlı servisler hám salıq salıwdıń ádillik principine tiykarlanǵan qáwipke baǵdarlanǵan salıq hákimshiligin jaqsılaw;

(g) mámleket, biznes, xızmetkerler, tutınıwshılar, jergilikli byudjetler hám investorlar mápleriniń teń salmaqlılıǵın támiyinlew.

Biznestiń ósiwin xoshametlew hám ulıwmalıq salıq rejimine ótiwdi jumsartıw
2026-jıl 1-iyunnen baslap salıq salıwdıń ulıwmalıq belgilengen tártibine ótiw ushın belgilengen sheklengen muǵdar bazalıq esaplaw muǵdarınıń on eki mıń esesi etip belgilensin.
III. Kishi hám orta biznesti qosımsha qollap-quwatlaw ilajları

2026-jıl 1-iyunnen baslap:
(a) miymanxana hám ulıwma awqatlanıw xızmetlerin kórsetiwshi isbilermenlik subektleri tárepinen:

(i) alkogol hám temeki ónimlerin satıwda naq pul tólemlerin qabıl etiwge ruqsat beriledi;

(ii) alkogol ónimlerin satıp alıwda sanlı markirovkalaw kodları usı subektlerde juwmaqlawshı tutınıwǵa realizaciya etilgen dep tán alınadı;

(b) ulıwmalıq awqatlanıw xızmetlerin kórsetiwshi isbilermenlik subektleri ushın:

(i) ayırım kategoriyadaǵı xızmetkerlerdi miynet uyımlarınıń mobil qosımshası arqalı ápiwayılastırılǵan tártipte sol kúnniń ózinde hám belgili bir múddetke rásmiylestiriw hám miynet haqısın tólew tártibi engiziledi;

(ii) tólengen qosımsha qun salıǵınıń bir bólegin qaytarıw, túsimniń naq pulsız túrde túsken úlesine qaramastan, tólengen salıq summasınıń 40 procenti muǵdarında ámelge asırıladı;

(v) ulıwmalıq awqatlanıw, sawda hám xızmet kórsetiw jumısı menen shuǵıllanıwshı isbilermenlik subektlerine tiyisli imarat hám obektlerge jáne jer uchastkalarına tutas aymaqlardan paydalanıwda tólenetuǵın ijara tóleminiń muǵdarı Salıq kodeksinde belgilengen tártipte anıqlanatuǵın jer salıǵınıń bir esesi muǵdarında belgilenedi.

2027-jıl 1-yanvardan baslap:
(a) alkogol ónimlerin usaqlap satıw huqıqı ushın hám ulıwma awqatlanıw kárxanaları tárepinen alkogol ónimlerin realizaciyalaw huqıqı ushın jıyımlar birlestirilsin hám onıń stavkası bazalıq esaplaw muǵdarınıń 10 procenti muǵdarında belgilensin;

(b) fizikalıq hám yuridikalıq shaxslar tárepinen isbilermenlik subektlerine ulıwma maydanı 1 000 kvadrat metrden artıq bolǵan múlk ijaraǵa berilgende, salıq salıw maqsetinde ijara tóleminiń eń kem stavkaları qollanılmaydı, Tashkent qalası buǵan kirmeydi;

(v) kishi biznes subektlerine buxgalteriya esabın júrgiziwshi shólkemler hám salıq másláhátshilerin tartıw qárejetlerin eki ese arttırǵan halda shegirme etiwge ruqsat berilsin.

Qosımsha qun salıǵı boyınsha jeńilletilgen tártipti engiziw
2026-jıl 1-iyunnen 2030-jıl 1-yanvarǵa shekem tiykarǵı jumıs túri ulıwma awqatlanıw, sawda yamasa xızmet kórsetiw tarawı bolǵan isbilermenlik subektlerine, mámleketlik úlesi 50 procent hám onnan joqarı bolǵan kárxanalar jáne iri salıq tólewshilerden tısqarı, ıqtıyarlı túrde qosımsha qun salıǵın esaplaw hám tólewdiń ápiwayılastırılǵan tártibin tańlaw huqıqı berilsin.
Qosımsha qun salıǵın esaplap shıǵıw hám tólewdiń ápiwayılastırılǵan tártibinde:
(a) Qosımsha qun salıǵı stavkası tovarlardı (xızmetlerdi) satıw boyınsha barlıq aylanıslarǵa salıstırǵanda 6 procent etip belgilenedi;

(b) payda salıǵı stavkası 0 procent etip belgilenedi hám salıq esabatın usınıw minnetlemesi biykar etiledi;

(v) satıp alınǵan tovarlar (xızmetler) boyınsha tólengen qosımsha qun salıǵı summasın esapqa alıw huquqı berilmeydi;

(g) salıq salıwdıń ulıwma belgilengen tártibinde názerde tutılǵan:

(i) qosımsha qun salıǵı boyınsha jeńillikler, preferenciyalar hám tólengen salıqtıń bir bólegin qaytarıp beriw tártibi qollanılmaydı;

(ii) qosımsha qun salıǵınıń unamsız parıq summası esaptan shıǵarıladı;

(d) usı tártiptegi isbilermenlik subektlerinen tovarlar hám xızmetlerdi satıp alǵan satıp alıwshılarǵa qosımsha qun salıǵı summasın esapqa alıw huquqı beriledi.

Tómendegiler:
(a) isbilermenlik subektleri tárepinen qosımsha qun salıǵın esaplap shıǵıw hám tólewdiń ápiwayılastırılǵan tártibine ótiw yamasa onı qollanıwdan bas tartıw xabarnama jiberilgen aydan keyingi aydıń birinshi sánesinen ámelge asırıladı;

(b) qosımsha qun salıǵın esaplaw hám tólewdiń ápiwayılastırılǵan tártibinen ulıwma belgilengen tártipke ótilgende, salıq tólewshi bunday ótiw sánesinde óziniń balansındaǵı tovar-materiallıq zapaslar hám uzaq múddetli aktivler qaldıqlarınıń balans qunında esapqa alınǵan qosımsha qun salıǵı summaların belgilengen tártipte esapqa alıw huqıqına iye boladı.

Salıq komiteti bir ay múddette elektron esap-fakturalar hám satıp alıw cheklerinde qosımsha qun salıǵın 6 procentlik stavka boyınsha esaplaw jáne onıń ayrıqsha esabın júrgiziw sistemasın engizsin.
Qosımsha qun salıǵı hákimshiligin jaqsılaw
Sonday tártip ornatılsın, oǵan muwapıq:
(a) qosımsha qun salıǵı tólewshisi gúwalıǵı tek ǵana usı salıq tólewshilerdi esapqa alıw maqsetinde beriledi hám tásir ilajların belgilew ushın tiykar bolıp esaplanbaydı;

(b) tómendegiler biykar etiledi:

(i) qosımsha qun salıǵı tólewshisi gúwalıǵın waqtınsha toqtatıp turıw tártibi;

(ii) Ózbekstan Respublikasınıń bajıxana shegarası arqalı tovarlardı alıp kiriwdi (importtı) ámelge asırıwshı yuridikalıq shaxslar, jeke tártiptegi isbilermenler hám ózin-ózi bánt etken shaxslardı májbúriy tártipte qosımsha qun salıǵınıń tólewshisi dep tán alıw;

(v) 2027-jıl 1-yanvardan baslap salıq qáwpi dárejesi tómen bolǵan jaǵdaylarda qosımsha qun salıǵınıń unamsız parqı summasın qaytarıwda (qaplawda) insan faktorı qatnasıwındaǵı ámeldegi ámeliyattan waz keshiledi;

(g) salıq tólewshide usı Párman kúshke kirgenge shekem payda bolǵan hám keliwde payda bolatuǵın 10 million sumǵa shekemgi qosımsha qun salıǵı boyınsha unamsız parıq summaları olardıń arzası talap etilmegen halda avtomatikalıq tártipte qaytarıp beriledi. Bul summanı qaplap beriw menen baylanıslı salıq tekseriwleri ótkerilmeydi.

Salıq komiteti jáne Ekonomika hám qarjı ministrligi 2026-jıl 1-oktyabrge shekem elektron esap-fakturalar hám salıq esabatınıń qáwip dárejesin real waqıt rejiminde bahalaw nátiyjesinde qosımsha qun salıǵınıń unamsız parqı summasın avtomatikalıq tárizde qaytarıw (qaplaw) ámeliyatın engizsin.
Kishi biznes subektlerine hákimshilik júkti kemeytiw
2028-jıl 1-yanvarǵa shekem kishi biznes subektlerine salıq uyımlarınıń “Salıq qáwpin anıqlaw, tallaw hám bahalaw” avtomatlastırılǵan baǵdarlaması arqalı anıqlanatuǵın salıqqa baylanıslı huqıqbuzarlıq belgileri óz betinshe dúzetiw imkaniyatı berilip, tómendegi salıq tekseriwleri ótkerilmeydi:
(a) salıq qáwpi summası bes júz million sumǵa shekem bolǵanda – salıq auditi;

(b) salıq qáwpi summası júz million sumǵa shekem bolǵanda – kóshpeli salıq tekseriwi.

Salıq komiteti 2026-jıl 1-iyulden baslap kameral salıq tekseriwi talabına túsinikler hám (yamasa) dúzetiwler usınılǵanda salıq tólewshilerdiń banklerdegi esap betleri boyınsha operaciyalardı jedellestiriw procesin tolıq avtomatlastırsın.
VII. Pármannıń orınlanıwın shólkemlestiriw, támiyinlew hám qadaǵalaw

Usı Pármannıń norma hám qaǵıydaları, eger olardıń ózinde keshirek múddet kórsetilmegen bolsa, dárhal kúshke kirsin.
Ekonomika hám qarjı ministrligi Salıq komiteti menen birgelikte bir ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar haqqındaǵı usınıslardı Ministrler Kabinetine kirgizsin.
Usı Pármannıń orınlanıwın nátiyjeli shólkemlestiriwge juwapker hám jeke juwapker etip Salıq komitetiniń baslıǵı F.X.Pulatov belgilensin.
Pármannıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Bas ministrdiń orınbasarı J.A.Qwchqorovqa júklensin.
Ózbekstan Respublikası Prezidenti

Sh.Mirziyoev