Ádillik ministrligi islep shıqqan tiyisli nızam joybarı menen “Ózbekstan Respublikasınıń Mámleketlik bayraǵı haqqında”ǵı nızamǵa ózgerisler hám qosımshalar kirgizilmekte.
Atap aytqanda, bul nızam jerlew máresimlerinde Mámleketlik bayraqtı tabıttıń ústine jabıw tártibin názerde tutatuǵın 9-1-statya menen tolıqtırıladı.
Oǵan bola, Ózbekstan Respublikasınıń Mámleketlik bayraǵın tabıt ústine jabıwǵa mámleket hám jámiyettiń rawajlanıwına múnásip úles qosqan shaxslarǵa, sonday-aq, Ózbekstan Respublikası Qurallı Kúshleri hám basqa da áskeriy strukturalardıń áskeriy xızmetkerleri, sonday-aq, huqıq qorǵaw uyımlarınıń xızmetkerleri xızmet wazıypasın orınlaw waqtında qaytıs bolǵan jaǵdaylarda ruqsat etiledi.
Ózbekstan Respublikasınıń Mámleketlik bayraǵı tabıt ústine jabılǵanda, bayraq materialındaǵı jańa ay hám on eki bes qırlı juldız súwretlengen bólegi tabıttıń bas bólimi hám marhumnıń shep iyin tárepiniń ústinde, máresim qatnasıwshılarına salıstırǵanda oń joqarı múyeshte jaylasıwı shárt.
Ózbekstan Respublikasınıń Mámleketlik bayraǵı tabıttıń joqarǵı bólegin tolıq qaplawı, bayraq materialınıń qırları tabıttıń qaptal táreplerine bir tegis túsip turıwı hám jerge tiymewi kerek.
Ózbekstan Respublikasınıń Mámleketlik bayraǵı tabıttıń ústine jabılǵanda onıń ústine buyım qoyılmaydı. Buyımlar tabıttıń qaptal tárepine jaylastırıladı.
Jerlew máresimi juwmaqlanǵannan soń, biraq, dene qábirge túsiriliwden yamasa dene kúydiriliwden aldın Ózbekstan Respublikasınıń Mámleketlik bayraǵı jıynap alınadı.
Ózbekstan Respublikasınıń Mámleketlik bayraǵın jıynap alıw mámleketlik nıshanlarǵa tán húrmet-izzet penen ámelge asırılıwı hám jıynap alınǵan Ózbekstan Respublikasınıń Mámleketlik bayraǵı múnásip orınǵa jaylastırılıwı kerek,- dep málimleme beredi xabar.uz saytı.

Qaraqalpaqstan xabar agentligi