Senattıń gezektegi jalpı májilisi aldınan onda kórip shıǵılatuǵın áhmiyetli máseleler senatorlar tárepinen tereń úyrenilip, tallanbaqta. Hár bir másele boyınsha qánigelerdi tartqan halda dodalawlar alıp barılıp, kemshiliklerdi saplastırıw boyınsha ámeliy ilajlar kórilmekte.
Senattıń Jaslar, hayal-qızlar, mádeniyat hám sport máseleleri komitetiniń májilisinde Ombudsmannıń 2025-jıldaǵı jumısı haqqındaǵı esabatı kórip shıǵıldı.
Atap ótilgenindey, ótken jılı Insan huqıqları boyınsha wákil (Ombudsman) atına kelgen 26 mıń 372 múrájattıń 82 procenti unamlı sheshilgen. Ombudsman hám jámiyetlik toparlar tárepinen jazanı orınlaw mákemelerine 954 monitoring saparları ámelge asırılǵan.
Hayal-qızlardıń huqıqların qorǵaw hám parlamentlik qadaǵalawdı kúsheytiw maqsetinde 2025-jılı “Teńlik hám húrmet” platforması iske qosıldı. Bul platforma sheńberinde hayal-qızlardı reabilitaciyalaw hám beyimlestiriw oraylarında ilajlar ótkerildi, zorlıqqa ushıraǵan 150 den aslam hayal-qızlar menen jámáátlik hám individuallıq sáwbetler shólkemlestirildi.
Májiliste insan huqıqların qorǵaw tarawında jámiyetlik institutlar hám mámleketlik uyımlar arasında birge islesiwdi kúsheytiw jáne parlamentlik qadaǵalawdı jáne de nátiyjeli shólkemlestiriw máselelerine ayrıqsha itibar qaratıldı.
***
Senattıń Ilim, bilimlendiriw hám densawlıqtı saqlaw máseleleri komiteti, Byudjet hám ekonomikalıq máseleler komiteti jáne Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń qospa májilisinde bolsa Ombudsman menen birgelikte Balalar ombudsmanınıń bayanatları dodalandı.
Senatorlar puqaralardıń huqıqları menen erkinliklerin támiyinlew, sonday-aq, nızam buzılıw jaǵdayların saplastırıw maqsetinde Ombudsmannıń mámleketlik uyımlar hám shólkemler, olardıń lawazımlı shaxslarına jiberilgen arza hám shaǵımları, usınıs xatı hám usınıs xarakterine iye juwmaqlarınıń orınlanıwı máselelerin kórip shıqtı.
Májiliste Bala huqıqları boyınsha wákildiń bala huqıqları haqqındaǵı nızamshılıqqa mámleketlik uyımlar, sonıń ishinde, huqıq qorǵaw uyımları tárepinen ámel etiliwi jaǵdayı haqqındaǵı bayanatı dodalandı.
Balalardıń máplerin qorǵawǵa qaratılǵan nızamshılıqtı jetilistiriw jumısları dawam ettirilgeni, esap beriw jılında tarawda bir qatar normativlik-huqıqıy hújjetler qabıl etilgeni atap ótildi.
Senatorlar Bala huqıqları boyınsha wákildiń tásir ilajların qollanıw nátiyjeliligin arttırıw, múrájatlar menen islesiw sapasın jaqsılaw, qadaǵalaw hám orınlaw tártibin bekkemlew boyınsha óz usınısların bildirdi.
Dodalaw juwmaǵında komitetlerdiń bul bayanatlardı Senattıń gezektegi jalpı májilisiniń kún tártibine kirgiziw haqqındaǵı birgeliktegi qararı qabıl etildi.

N.Abduraimova, ÓzA