Bul haqqında Prezident Shavkat Mirziyoevtiń “Kóksaray” rezidenciyasında jaslar menen dawam etip atırǵan sóylesiwinde atap ótildi.
Hár jılı 600 mıń jas miynet bazarına kirip kelmekte, 2030-jılǵa barıp olar 1 millionǵa jetedi. Jaslarǵa ózine say jumıs tabıwı ushın sharayat jaratıw – eń áhmiyetli másele ekeni atap ótildi.
Jaslar arasında sorawnama ótkerilip, olardıń úshten bir bólegi isbilermen bolıw tilegin bildirgen. Ótken jılı jaslardıń bántligin támiyinlew ushın bankler hám Jaslar isleri agentligine 400 million dollar berilgen edi. Atap aytqanda, “Jaslar biznesi”, “Keleshekke qádem” baǵdarlamaları esabınan 15 mıń jas óz isbilermenligin jolǵa qoydı, 50 mıń adam jumıs penen támiyinlendi.
Prezidentimiz jaslar isbilermenligi ushın qosımsha 200 million dollar ajıratılatuǵının málim etti.
Ózin-ózi bánt etken jaslar ushın kredit muǵdarı 100 million sumnan 300 million sumǵa shekem arttırıladı. Jas isbilermenlerdiń joybarları ushın 10 milliard sumǵa shekem kredit ajıratıw múmkin boladı (házir 5 milliard sumǵa shekem). Innovaciyalıq startap joybarlarına 100 mıń dollarǵa shekem investiciya kirgiziwge ruqsat beriledi.
Xızmet kórsetiw hám ulıwma awqatlanıw tarawında 1 mıńnan aslam jumıs ornın jaratqan jergilikli brendlerden franshiza alıp, filial ashıwǵa qızıǵıp atırǵan jaslar ushın qolaylı qarjılandırıw paketleri engiziledi.

ÓzA