Ámiwdárya rayonınıń Tolqın hám Aq altın APJ aymaqlarında 2026-jılǵı shigit egiw máwsimine tayarlıq kóriw sheńberinde respublikalıq kórgizbeli seminarlar shólkemlestirildi.
Ótkerilgen seminarlar Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov, Qaraqalpaqstan Respublikası Awıl xojalıǵı ministriniń birinshi orınbasarı Anvar Xalimbetov basshılıǵında ótkerilip, oǵan awıl hám suw xojalıǵı tarawlarına juwapker shólkemlerdiń basshıları, rayon hákimleriniń awıl hám suw xojalıǵı máseleleri boyınsha orınbasarları hám fermer xojalıqlarınıń basshıları qatnastı.
Seminarda awıl xojalıǵı texnikaların ońlaw ustaxanalarında alıp barılıp atırǵan jumıslar, texnika hám agregatlardı máwsimge tayarlaw barısı kózden ótkerildi. Sonıń menen birge, egislik jerlerdi súriw, lazerli tegislew, shor juwıwǵa jer tayarlaw, shel alıw hám shor juwıw jumıslarınıń barısı boyınsha ámeliy túsinikler berildi.
Sonday-aq, tuqımlıq shigitlerdi tazalaw, saralaw hám dárilew, biolaboratoriyalardı máwsimge tayarlaw máseleleri seminarlardıń áhmiyetli baǵdarlarınan biri bolıp, bul isler bir tegis nál jetistiriw hám joqarı ónimdarlıqqa erisiwde úlken áhmiyetke iye ekeni ayrıqsha atap ótildi.
Usılar menen bir qatarda seminarda shıǵıp sóylegen Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov jer hám suw resurslarınan aqılǵa uǵras paydalanıw, agrotexnikalıq ilajlardı tolıq hám sapalı ámelge asırıw búgingi kúnniń eń áhmiyetli wazıypalarınan biri ekenin atap ótip, shorlanǵan jerlerdiń meliorativlik jaǵdayın jaqsılaw hám suwdı únemleytuǵın texnologiyalardı keńnen engiziw arqalı turaqlı ónimdarlıqqa erisiw múmkin ekenligi kórsetip ótildi.
Óz gezeginde, Suw xojalıǵı ministri Baxtiyar Yusupov ishki suwǵarıw tarmaqların betonlastırıw, qándeklerdi belgilengen normalarda qazıw, suwdıń jumsalıwın anıq esapqa alıw máselelerine ayrıqsha itibar qarattı.
Ótkerilgen ilajlar sheńberinde respublikamız boyınsha 2026-jıl ónimi ushın egilgen ǵálle maydanlarına tógin shıǵarıw, jerge jer qosıw, meliorativlik jaǵdaydı jaqsılaw hám ishki suwǵarıw sistemaların jetilistiriw boyınsha ámelge asırılıp atırǵan jumıslar dodalandı. Fermerler menen óz-ara pikirlesip, olardıń usınıs hám mashqalaları tıńlandı.

Qaraqalpaqstan xabar agentligi