Oliy Majlis Nızamshılıq palatasınıń Spikeri Nuriddin Ismoilov Rossiya Federaciyasınıń Ózbekstan Respublikasındaǵı Ayrıqsha hám tolıq huqıqlı elshisi Aleksey Erxovtı qabılladı.

Ushırasıwda Ózbekstan hám Rossiya arasındaǵı qatnasıqlar óz-ara húrmet, isenim hám strategiyalıq sheriklik principlerine tiykarlanǵan halda izbe-iz rawajlanıp atırǵanı, joqarı dárejedegi turaqlı ushırasıwlar hám nátiyjeli sóylesiwler eki tárepleme qatnasıqlardı jańa basqıshqa alıp shıǵıwǵa xızmet etip atırǵanı atap ótildi.
Óz gezeginde, A.Erxov Prezident Shavkat Mirziyoevtiń basshılıǵında Ózbekstanda ámelge asırılıp atırǵan tariyxıy reformalardı joqarı bahaladı. Eki mámleket basshıları arasındaǵı turaqlı sóylesiw qatnasıqlardı bunnan bılay da rawajlandırıw ushın bekkem tiykar jaratıp atırǵanın aytıp ótti.
Sonday-aq, Shavkat Mirziyoevtiń Sankt-Peterburg qalasında bolıp ótken Joqarı Evraziya ekonomikalıq keńesiniń gezektegi májilisinde baqlawshı mámleket basshısı statusında qatnasqanı Ózbekstannıń regiondaǵı geosiyasiy rolin hám kóp tárepleme birge islesiwge bolǵan tiykarǵı baǵdarın jáne de bekkemleytuǵının atap ótti. Ózbekstan jetekshisiniń Lev Tolstoy atındaǵı xalıqaralıq tınıshlıq sıylıǵı menen sıylıqlanıwı Oraylıq Aziyanı tınıshlıq, abadanlıq hám dóretiwshilik mákanına aylandırıw jolındaǵı háreketleriniń tán alınıwı bolǵanın atap ótti.
Sóylesiwde eki mámleket parlamentleri birge islesiw qatnasıqlarınıń házirgi jaǵdayın hám onı bunnan bılay da keńeytiw máselelerin de dodaladı. Oliy Majlis Nızamshılıq palatası menen Rossiya Federaciyası Federal Májilisi Mámleketlik Dumasınıń Birge islesiw boyınsha parlamentleraralıq komissiyasınıń úshinshi májilisin ótkeriw boyınsha da pikir alısıldı.

M.Komilova,
ÓzA