Ózbekstan Respublikası Prezidenti Shavkat Mirziyoev 21-22-dekabr kúnleri ámeliy sapar menen Rossiya Federaciyasında boldı.

Mámleketimiz basshısı 22-dekabr kúni Sankt-Peterburgtaǵı “Ermitaj” mámleketlik muzeyinde ǴMDA mámleketleri basshılarınıń rásmiy emes ushırasıwında qatnastı.
Ilajda Rossiya Federaciyası Prezidenti Vladimir Putin, Belarus Respublikası Prezidenti Aleksandr Lukashenko, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon, Túrkmenstan Prezidenti Serdar Berdimuhamedov hám Armeniya Bas ministri Nikol Pashinyan da qatnastı.
Ushırasıwda usı jıldaǵı birgeliktegi jumıslardıń tiykarǵı juwmaqları esap-sanaq etildi hám kelesi jıl ushın tiykarǵı wazıypalar belgilep alındı. Sonday-aq, regionallıq hám xalıqaralıq áhmiyetke iye aktual máseleler boyınsha pikir alısıldı.
Óz-ara tovar almasıwdı arttırıw ushın jáne de qolaylı sharayatlar jaratıw, transport tarawındaǵı birge islesiwdi rawajlandırıw, óz-ara investiciyalardıń ósiwin xoshametlew hám kooperaciya joybarların qollap-quwatlaw, energetika hám sanlastırıwda sheriklikti bekkemlew, ilim, bilimlendiriw, mádeniyat hám kórkem óner tarawlarında qospa joybarlardı keńeytiw, sonday-aq, aymaqlar arasında uzaq múddetli birge islesiwdi rawajlandırıw áhmiyetli ekenligi atap ótildi.
Doslıq awqamı mámleketleri arasında mádeniy-gumanitarlıq almasıwlardı dawam ettiriw, atap aytqanda, jaslardıń dóretiwshilik, innovaciyalıq hám intellektuallıq potencialın rawajlandırıwdı qollap-quwatlaw zárúr ekenligi atap ótildi.
Sankt-Peterburgtaǵı rásmiy emes ushırasıwdıń mádeniy baǵdarlaması sheńberinde Ózbekstan Respublikası Prezidenti Shavkat Mirziyoev Ǵárezsiz Mámleketlerdiń Doslıq Awqamına aǵza mámleketlerdiń basshıları menen birgelikte “Ermitaj” mámleketlik muzeyine bardı.
Jetekshiler siyrek ushırasatuǵın kórkem óner dóretpeleri hám mádeniyat estelikleri jıynalǵan bul dúnyadaǵı eń iri muzeylerden biriniń ekspoziciyası menen tanıstı. Sapar etiw waqtında Rossiya hám Evropa tariyxı jáne kórkem miyrasınıń tiykarǵı basqıshların sáwlelendirgen Bas muzey kompleksiniń zalları menen tanıstı.
Delegaciyalardıń basshıları Aleksandr zalında bolıp, kórkem gúmis ekspoziciyasın kózden ótkerdi, sonday-aq, saltanatlı máresimler hám rásmiy ilajlardı ótkeriw ushın mólsherlengen Piketler zalın hám Gerbler zalın barıp kórdi.
Qımbat bahalı metallardan tayarlanǵan biytákirar buyımlar saqlanatuǵın Altın ǵáziyne, ápsanalıq “Tawıs” mexanikalıq saatı jaylasqan Kishi Ermitajdıń Pavilonlar zalı miymanlarda ayrıqsha qızıǵıwshılıq oyattı.
Sapar dawamında mádeniy qarım-qatnastı bekkemlew, tariyxıy miyrastı qásterlep saqlaw hám Doslıq Awqamı mámleketleri arasında gumanitarlıq birge islesiwdi rawajlandırıw áhmiyetli ekenligi atap ótildi.
Sonıń menen Ózbekstan Respublikası Prezidenti Shavkat Mirziyoevtiń Rossiya Federaciyasına ámeliy saparı juwmaqlandı.

ÓzA