Ózbekstan Respublikası Prezidenti Shavkat Mirziyoev 18-noyabr kúni Aziya rawajlanıw bankiniń prezidenti Masato Kando basshılıǵındaǵı delegaciyanı qabılladı.

Sóylesiw aldınan Aziya banki basshısı mámleketimiz jetekshisin strategiyalıq sherikliktiń 30 jıllıǵı hám 2025-2026-jıllarda banktiń Basqarıwshılar keńesine basshılıq etiw Ózbekstanǵa ótkeni menen qutlıqladı.
Mámleketimizde sociallıq-ekonomikalıq reformalar baǵdarlamasın ámelge asırıw sheńberinde keń kólemli birge islesiwdi bunnan bılay da keńeytiw máseleleri kórip shıǵıldı.
Birge islesiwde joqarı dárejege erisilgeni qanaatlanıwshılıq penen atap ótildi. Ózbekstan banktiń regiondaǵı eń iri sherigi bolıp qalmaqta – birgeliktegi joybarlar portfeli 15 milliard dollardan arttı. Sonday-aq, “jasıl” energetika, transport, sanlı transformaciya, bilimlendiriw hám basqa da baǵdarlarda ulıwma bahası 3 milliard dollardan aslam joybarlar islep shıǵılmaqta. Suveren emes qarjılandırıw mexanizmleri jedel engizilmekte.
ARB Basqarıwshılar keńesiniń 2026-jıl may ayında Samarqand qalasında bolıp ótetuǵın jıllıq májilisine tayarlıq kóriwge ayrıqsha itibar qaratıldı.
Ózbekstan Prezidenti bolajaq ilaj sheńberinde ARB menen Keńeytilgen strategiyalıq sheriklik baǵdarlamasına qol qoyıw, onda infrastrukturanı rawajlandırıw, texnikalıq hám injenerlik kadrlardı tayarlaw, hayal-qızlar hám jaslardı jańa kásiplerge oqıtıw, kámbaǵallıqtı qısqartıw, ipoteka bazarı hám jeke menshik sektordı rawajlandırıw máselelerine ayrıqsha itibar qaratıw baslamasın alǵa qoydı.
Banktiń iri milliy hám regionallıq baslamalardı qollap-quwatlawda, sonday-aq, Oraylıq Aziya regionında transport, energetika hám sawda joybarların alǵa qoyıwda belsene qatnasıwı áhmiyetli ekeni atap ótildi.
ARB prezidenti Masato Kando mámleketimizdegi keń kólemli jańalanıwlardıń nátiyjelerin joqarı bahaladı hám Jańa Ózbekstanda artqa qaytpaytuǵın túrge engen reformalar baǵdarlamasın ámelge asırıwǵa hár tárepleme járdem beriwge tayar ekenin bildirdi.

ÓzA