Litva húkimeti Belarus penen shegaradaǵı ótiw punktlerin pútkilley jabıw rejesin tayarlamaqta. Bul qarar mámleket paytaxtı Vilnyus aymaǵında úsh kún izbe-iz ushıwshı “sigareta tasıwshı sharlar” sebepli párwazlar toqtatılǵannan soń qabıl etildi.

Ótken hápteniń aqırında mámleket hawa háreketi qáwipsizligi xızmetleri samolyotlar ústinen ushıp baratırǵan belgisiz sharlardı anıqlaǵan. Bunnan keyin Vilnyus aeroportı úsh márte waqtınsha jabıldı, párwazlar biykar etildi hám jolawshılar basqa qalalar arqalı mánziline baǵdarlandı.
Sharlar Belarustan nızamsız sigaretlerdi tasıw ushın paydalanılıp atırǵanı gúman etilmekte. Litvanıń Medininkay hám Shalchıninkay shegara ótiw punktleri usı waqıtqa shekem kúndiz bir neshe saatqa, túnde bolsa 24 saatlıq tolıq jabılıw rejimin járiyaladı.
– Biz qáwipsizlikti támiyinlew ushın Belarus penen shegaranı belgisiz múddetke jabıw boyınsha qarar joybarın tayarlap qoydıq, – dedi mámleket bas ministri Inga Ruginiyene óz bildiriwinde.
Onıń aytıwınsha, tek diplomatlar, diplomatiyalıq pochta hám Evropa Awqamı puqaraları ushın kiriwge ayrıqsha jaǵday sıpatında ruqsat beriledi. Ekshembi kúni túnde mámlekettiń milliy qáwipsizlik komissiyası májilis ótkerip, ushıwshı sharlar máselesin “gibrid qáwip” sıpatında bahaladı.
Maǵlıwmat ornında: Litva — NATO hám Evropa Awqamınıń aǵzası bolıp, ol RF eksklavi Kaliningrad hám Moskva awqamlası Belarus penen shegaralas.
Ekspertlerdiń pikirinshe, Belarustan kelip atırǵan “sigaret sharları” tek ǵana kontrabanda quralı emes, al Evropanıń qáwipsizlik sistemasın sınaqtan ótkeriwshi siyasiy belgi de bolıwı múmkin.

Musulmon Ziyo, ÓzA