Tariyxtan belgili, túrkiy mámleketler menen áyyemnen búgingi kúnge shekem baylanıslardı keńeytip, bekkemlep kiyatırǵan mámleketlerdiń keleshegi bárqulla perspektivalı hám paydalı bolǵan.

Jaqında Túrkiy akademiya tárepinen “Pakistan hám túrkiy dúnya: milliy ózlik, diplomatiya hám strategiyalıq birge islesiw” (Pakistan and the Turkic World: Identity, Diplomacy and Strategic Partnership) atlı kitap baspadan shıqtı.
Shıǵarmada Pakistan Islam Respublikasınıń túrkiy mámleketler menen áyyemgi dáwirden búgingi kúnge shekemgi baylanısları hám keleshek perspektivaları izertlengen.
Kitapta Pakistannıń Ázerbayjan, Qazaqstan, Qırǵızstan, Túrkiya, Túrkmenstan hám Ózbekstan menen uzaq tariyxtan baslap, zamanagóy dáwirge shekem dawam etken qatnasıqları sáwlelendirilgen. Shıǵarmanıń 220-240-betlerin qamtıp alǵan “Ózbekstan-Pakistan baylanısları: tariyxıy óz-ara birge islesiwdiń tikleniwi” dep atalǵan segizinshi bap Ózbekstan Ilimler akademiyasınıń vice-prezidenti, tariyx ilimleriniń doktorı, professor Bahrom Abduhalimov tárepinen tayarlanǵan.
Bul bapta Ózbekstan hám Pakistan arasındaǵı baylanıslar hár tárepleme tallanıp, olardıń tamırları Ullı Jipek jolı dáwirine barıp taqalatuǵını atap ótiledi. Avtor Kushan patshalıǵı, Temuriyler dinastiyası hám Baburiyler dáwirindegi tariyxıy baylanıstı zamanagóy birge islesiw ushın bekkem tiykar sıpatında kórsetedi.
Izertlewde eki mámleket qatnasıqlarınıń tiykarǵı baǵdarları tallanǵan: sonıń ishinde, Ózbekstan-Awǵanstan-Pakistan temir jolı sıyaqlı strategiyalıq sawda jolların shólkemlestiriw, Awǵanstanda turaqlılıqqa erisiw jolındaǵı háreketler, qáwipsizlik tarawında birge islesiw hám mádeniy-gumanitarlıq almasıw máselelerine ayrıqsha itibar qaratılǵan.
Avtordıń juwmaqlarına bola, eki tárepleme siyasiy, ekonomikalıq hám mádeniy birge islesiwge súyengen halda Ózbekstan hám Pakistan tek ǵana óz-ara baylanıslardı bekkemlep qoymastan, al Oraylıq hám Qubla Aziya arasındaǵı regionallıq integraciya processlerine de múnásip úles qospaqta. Bul birge islesiw region ushın áhmiyetli bolǵan turaqlılıq hám abadanlıqtı támiyinlew potencialına iye ekeni atap ótiledi.
Sonıń menen birge, onıń keleshektegi perspektivaları infrastrukturanı rawajlandırıw hám qáwipsizlik tarawındaǵı birge islesiwdi izbe-iz dawam ettiriwge baylanıslı ekeni ayrıqsha atap ótiledi.

A.RUSTAMOV, ÓzAnıń xabarshısı