Ministrler Kabinetiniń bıyıl 7-oktyabrdegi qararı menen “Ózbekstan Respublikasında xalıq hám awıl xojalıǵın dizimge alıwǵa tayarlıq kóriw hám onı ótkeriw tártibi haqqında”ǵı Reje tastıyıqlandı.

Bul hújjet Ózbekstan Respublikasında xalıq hám awıl xojalıǵın dizimge alıwǵa tayarlıq kóriw hám onı ótkeriw tártibin belgileydi.
Dizimge alıw 2026-jıldıń 15-yanvarınan 28-fevralına shekem ótkeriledi hám dizimge alıw baslanıwınıń anıq waqtı 2026-jıl 15-yanvar saat 00:00 etip belgilenedi. Dizimnen ótkeriwdiń dawamlılıǵı – 45 kún.
Respondentlerdiń shaxsqa hám awıl xojalıǵı jumısına baylanıslı maǵlıwmatların jıynaw procesinde dizimge alıw sánesinen keyingi ózgerisler esapqa alınbaydı.
Sonıń ishinde, dizimge alıw sorawnaması formaları hám basqa da dizimge alıw hújjetleri 2026-jıldıń 15-yanvarınan soń tuwılǵan balalarǵa baylanıslı toltırılmaydı, biraq dizimge alıw sánesinen keyin qaytıs bolǵan shaxslarǵa baylanıslı toltırıladı.
Xalıqtıń sanı hám onıń quramın esaplawda, bir jıldan aslam múddet mámleket aymaǵında bolmaǵan Ózbekstan Respublikası puqaraları Ózbekstan Respublikası Sırtqı isler ministrliginde akkreditaciya etilgen shet mámleketlerdiń turaqlı wákilxanalarınıń, xalıqaralıq, húkimetleraralıq shólkemler hám shet mámleketlerdiń húkimetlik shólkemleri wákilxanalarınıń xızmetkerleri bolǵan shet el puqaraları hám olardıń shańaraq aǵzaları esapqa alınbaydı.
Sonday-aq, Ózbekstan Respublikasınıń xalıqaralıq shártnamalarına muwapıq diplomatiyalıq jeńilliklerge hám immunitetke iye bolǵan basqa shaxslar esapqa alınbaydı.
Respondentler óziniń (turaqlı yamasa waqtınsha) jasaw ornı boyınsha dizimge alınadı. Bunda kúnlik túngi dem alıwdıń kóbirek bólegin ótkeretuǵın úy (háwli), kvartira, jasaw ushın paydalanılıp atırǵan basqa turaq jay yamasa turaq jay emes imarat jasaw ornı esaplanadı.

ÓzA