Milletleraralıq doslıq, awızbirshilik, tınıshlıq hám tatıwlıq – eń úlken hám biybaha baylıq bolıp esaplanadı.

Ózbekstan Respublikası Prezidentiniń 2025-jıl 19-martta qabıl etilgen “Ulıwma milliy tatıwlıq hám sırt eldegi watanlaslar menen baylanıslardı bekkemlewdi jańa basqıshqa alıp shıǵıwǵa baylanıslı ilajlar haqqında”ǵı pármanına muwapıq, milletleraralıq qatnasıqlardı sáykeslestiriw, jámiyette doslıq, óz-ara awızbirshilik, keńpeyillik hám tilekleslik ortalıǵın bekkemlew boyınsha tiykarǵı wazıypalarǵa úlken itibar qaratılmaqta.

Paytaxtımızda jaylasqan Milliy mádeniy oraylar pavilonında Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komiteti jáne Ózbekstanda Shanxay birge islesiw shólkemi (ShBSh) Xalıq diplomatiyası orayı menen birgelikte jergilikli hám ShBSh mámleketleri media tarawı wákilleri ushın press-tur shólkemlestirildi.

Dáslep press-tur qatnasıwshılarına mámleketimizde milletleraralıq tatıwlıqtı kózdiń qarashıǵınday qásterlep saqlaw baǵdarında ámelge asırılıp atırǵan iygilikli jumıslar, Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komiteti hám Ózbekstanda ShBSh Xalıq diplomatiyası orayınıń jumısı jáne Milliy mádeniy oraylardıń pavilonları haqqında tolıq maǵlıwmat berildi.

Bunnan soń jurnalistler hám miymanlar túrli millet hám xalıqlardıń úrp-ádetleri, úy-ruwzıgershilik buyımları, kórkem óner dóretpeleri, muzıka ásbapları hám tákirarlanbas eksponatlardan ibarat doslıq úyleri menen tanıstı. Eki qabatlı bul sawlatlı hám payızlı doslıq úyleri 22 millettiń dástúr hám qádiriyatların jámlegen.

Házirgi waqıtta bul jerde qazaq, qırǵız, túrkmen, bashqurt xalıqlarınıń milliy otawları, sonday-aq, koreys, belarus, ukrain, nemis, grek, dungan, polyak, evrey, gruzin, armyan, tatar, qırım-tatar, uyǵır, túrk, tájik, qıtay, rus hám ázerbayjan milletine tiyisli doslıq úyleriniń jumısı menen keńnen tanısıw imkaniyatı jaratıldı.

Bul Milliy mádeniy oraylardıń pavilonları mámleketimiz basshısınıń baslaması menen qurılǵan bolıp, 30-iyul – Xalıqlar doslıǵı kúni aldınan saltanatlı túrde paydalanıwǵa tapsırılǵan edi.

Pavilon mámleketimizde milletleraralıq tatıwlıq hám doslıq, óz-ara awızbirshilik siyasatınıń ámeliy kórinisi bolıwı menen birge, óz-ara pikir alısıw maydanına da aylandı.

Qısqa múddet ishinde bul jerde túrli saltanatlı ilajlar, seyiller, koncertler, doslıq festivalları hám kórgizbeler shólkemlestirildi.

Haqıyqatında da, bul orın búgingi kúnde paytaxtımızdıń eń adamlar kóp jıynalatuǵın hám payızlı orınlarınan birine aylanıp úlgerdi.

Nazokat Usmonova,

ÓzAnıń xabarshısı