Gaz támiynatı tarawı xızmetkerleri búgingidey ashıq-jarıq kúnlerde ózleriniń barlıq itibarın gaz tarmaqların gúzgi-qısqı máwsimge tayarlaw jumıslarına qaratqan. Ásirese, bunda jılıtıw máwsiminde tutınıwshılarǵa turaqlı túrde tábiyǵıy gaz jetkerip beriwde duslasatuǵın mashqalalardıń aldın alıwda gaz tarmaqların texnikalıq tekseriwden ótkeriw áhmiyetli wazıypa sanaladı.

Házirgi kúnleri qolaylı hawa rayınan nátiyjeli paydalanǵan taraw qánigeleri orınlarda gaz tarmaqların kapital ońlawǵa, qurılıs rekonstrukciya jumısların tez hám sapalı pitkeriwge itibar qaratpaqta.
Atap aytqanda, bul baǵdarda Nókis rayonlık gaz támiynatı bólimi xızmetkerleri tárepinen rayon aymaǵındaǵı Darsan mákan puqaralar jıyınında jaylasqan Jiydeli awılı, Aqterek mákan puqaralar jıyını, Qırantaw hám Baqanshaqlı awıl puqaralar jıyını aymaqlarındaǵı tutınıwshılardı hám sociallıq obektlerdi tábiyǵıy gaz benen támiyinlewshi D-219 mm orta basım gaz tarmaǵınıń 1,7 km bólegin jer ústine shıǵarıw hám rekonstrukciya jumısları alıp barılmaqta.
– Álbette, bul alıp barılıp atırǵan jumıslardıń tiykarǵı maqseti, gúzgi-qısqı máwsimde tutınıwshılardıń janılǵı energetikasına bolǵan talabın qanaatlandırıw, olarǵa úzliksiz tábiyǵıy gaz jetkerip beriw bolıp tabıladı, – deydi Nókis rayonlıq gaz támiynatı bóliminiń bas injeneri Íqlas Baxiev.
Bul baǵdardaǵı jumıslar respublikamızdıń barlıq qala hám rayonlarında dawam etpekte.

Adilbay Orazov,
Qaraqalpaqstan xabar agentligi sholıwshısı.