Nyu-York qalasında BMSh Bas Assambleyası 80-sessiyasınıń joqarı dárejedegi hápteligi sheńberinde Ózbekstan Respublikası Densawlıqtı saqlaw ministrligi, Jáhán densawlıqtı saqlaw shólkemi, St.Jude balalar izertlew emlewxanası hám «Zamin» fondı menen birgelikte «Rak hám basqa ómir ushın qáwipli keselliklerge shatılǵan balalardıń ómirin uzaytıw hám azap-aqıbetlerin azaytıw boyınsha global háreket» temasında ilaj ótkerdi. Onda Ziroat Mirziyoeva qatnastı.

“Zamin” fondı Qáwenderlik keńesiniń baslıǵı qatnasıwshılarǵa múrájat etip, bılay dedi: “Házirgi waqıtta dúnya boylap eki milliardtan aslam balalar juqpalı bolmaǵan kesellikler qáwpi astında yamasa olardan azap shegip atır. Bul – planetamız xalqınıń derlik úshten bir bólegi degeni. Millionlaǵan balalar rak keselligine qarsı gúrespekte. Zamanagóy medicina jetiskenliklerine qaramastan, ómir súriw dárejesi túrli regionlarda keskin parıqlanadı: rawajlanǵan mámleketlerde bul kórsetkish 80 procentten joqarı bolsa, rawajlanıp atırǵan mámleketlerde 30 procentten de tómen. Bunday ayırmashılıqqa pútkilley jol qoyıp bolmaytuǵın jaǵday. Bunday apatshılıqlardıń aldın alıw ushın ilaj kóriwimiz zárúr.”
Ilajda Túrkiya, Ázerbayjan, Angola, Vetnam, Gvatemala, Serbiya birinshi xanımları, Livan Bas ministriniń ómirlik joldası; JDSSh bas direktorı, EKOSOS prezidenti, “Sent Jud” balalar izertlew emlewxanasınıń prezidenti, Túrkiya, Angola, Armeniya, Bangladesh, Mozambik, Dominikana Respublikası, Nigeriya, Qazaqstan, Qatar, Kongo Respublikası, Qırǵızstan, Malta, Mongoliya, BAÁ, Peru, Tájiktsan, Timor-Leste, Tuvalu, CHad, Yamayka densawlıqtı saqlaw ministrleri, Vengriya, Indoneziya, Rossiya, Tanzaniya densawlıqtı saqlaw strukturalarınıń basshıları, xalıqaralıq shólkemler, ekspertler jámiyeti hám puqaralıq jámiyetiniń wákilleri, awır keselliklerge shatılǵan balalar qatnastı. Olar arasında «Mehirli mektep» mektebiniń jas pitkeriwshisi hám volontyorı Samira Idrisova óziniń ómiri haqqında shın kewilden aytıp berdi. Qatnasıwshılar ádil, integraciyalasqan hám jergilikli resurslarǵa tiykarlanǵan densawlıqtı saqlaw sistemaların rawajlandırıw arqalı 2030-jılǵa shekem rak keselligine shalınǵan balalardıń ómir súriw kórsetkishin 60 procentke jetkeriw baǵdarındaǵı isenimli umtılısların tastıyıqladı. Sonday-aq, balalarda rak keselliklerin emlewdegi jetiskenliklerdi qollap-quwatlaw hám oraq tárizli kletkalı anemiyaǵa qarsı global baslamanı ámelge asırıw máselelerin dodaladı.

ÓzA