Ózbekstan Respublikası Prezidenti Shavkat Mirziyoev Finlyandiya Prezidenti Aleksandr Stubb penen telefon arqalı sóylesti.

Ózbekstan menen Finlyandiya arasındaǵı kóp táreplemeli birge islesiwdi, bárinen burın, sawda-ekonomikalıq hám gumanitarlıq tarawlarda jáne de keńeytiw máseleleri Finlyandiya Prezidentiniń mámleketimizge bolajaq saparına tayarlıq kózqarasınan hár tárepleme kórip shıǵıldı.
Konstruktivlik siyasiy sóylesiwler hám parlamentleraralıq almasıwlar dawam etip atırǵanı qanaatlanıwshılıq penen atap ótildi. 2024-jılı tovar almasıw 24 procentke arttı. 2022-jıldan elimizde Finlyandiyanıń “Nordik” universiteti tabıslı jumıs alıp barmaqta, mektep bilimlendiriwin rawajlandırıw boyınsha joybarlar ámelge asırılmaqta.
Awıl xojalıǵı, ximiya, energetika, kánshilik, telekommunikaciya hám basqa da innovaciyalıq tarmaqlarda kooperaciyanı jolǵa qoyıw, sonıń ishinde, bilimlendiriw sistemasına aldınǵı texnologiyalardı engiziw imkaniyatlarına ayrıqsha itibar qaratıldı.
Anıq joybarlardı tayarlaw ushın Húkimetleraralıq komissiyanıń májilisin hám eki mámlekettiń jetekshi kompaniyalarınıń qatnasıwında biznes forumın ótkeriw usınıs etildi.
Xalıqaralıq áhmiyetke iye aktual máseleler boyınsha pikir alıstı. Tartıslardı xalıqaralıq huqıq normaları tiykarında tınısh jol menen sheshiw áhmiyetli ekenligi atap ótildi.

ÓzA