Senattıń jalpı májilisinde Qıtaydıń Tyanczin qalasında bolıp ótken Shanxay birge islesiw shólkemi (ShBSh) sheńberindegi joqarı dárejedegi sóylesiwlerdiń áhmiyetine itibar qaratıldı.

Senat Baslıǵı Tanzila Norboeva abıraylı ilajda Prezidentimiz bir qatar usınıs hám baslamalardı alǵa qoyǵanın atap ótti.
Sonıń ishinde, sawdanı ápiwayılastırıw, óndiris-logistika shınjırların rawajlandırıw hám óz-ara investiciyalardı xoshametlew, “jasıl” energetikanı jedel rawajlandırıw, startap hám innovaciyalıq joybarlardı qollap-quwatlaw jáne alǵa qoyıw, regionallıq sanaat hám infrastruktura joybarların qarjılay qollap-quwatlaw, regionlararalıq transport-tranzit potencialın tolıq iske qosıw, ShBShda birden-bir transport tarmaǵın qáliplestiriw, “jasıl” transformaciya tarawındaǵı birge islesiwdi keńeytiw sıyaqlı áhmiyetli máseleler ShBSh mákanınıń rawajlanıwında úlken áhmiyetke iye.
Jaqında Túrkmenstannıń Avaza qalasında bolıp ótken BMShtıń Teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyası da bul joldaǵı háreketlerdi birlestiriw ushın áhmiyetli sóylesiw maydanı bolıp xızmet etti.
Mámleketimiz basshısı tárepinen alǵa qoyılǵan usınıs hám baslamalar teńizge shıǵıwǵa iye bolmaǵan basqa onlaǵan rawajlanıp atırǵan mámleketlerdiń turaqlı rawajlanıwınıń fundamental máseleleri awızbirshilikte sheshiliwine xızmet etedi.
Házirgi waqıtta regionımızda birden-bir transport-logistika mákanın qáliplestiriw, Oraylıq Aziyanı Shıǵıs hám Batıs, Arqa hám Qubla arasındaǵı tolıq tranzit xabına aylandırıw boyınsha keń kólemli baǵdarlamalar, iri joybarlar ámelge asırılmaqta. Keyingi jılları óz-ara sawda kólemi 4,5 esege, investiciyalar bolsa eki esege ósken. Birgeliktegi kárxanalardıń sanı bes esege kóbeygen. Bunday háreketler xalıqlarımızdıń turmısı jáne de abadan bolıwına xızmet etetuǵını sózsiz.
Avazada bolıp ótken “Ázerbayjan – Túrkmenstan – Ózbekstan” sammiti de regionımızda óz-ara isenim hám birge islesiw baylanısların bekkemlew, turaqlı rawajlanıw imkaniyatların birlestiriw jolındaǵı gezektegi áhmiyetli qádem boldı.
Ulıwma alǵanda, region mámleketleri basshıları, birinshi gezekte, Prezidentimizdiń is-háreketleri menen Oraylıq Aziya hám Túrkiy dúnyada óz-ara isenim hám sheriklik jańa dárejege kóterilgeni hám erisilip atırǵan tabıslar globallıq dárejede tán alınbaqta.
Mámleketimiz basshısına Túrkmenstannıń joqarı mámleketlik sıylıǵı – “Birge islesiwdi rawajlandırıwǵa qosqan úlesi ushın” ordeniniń berilgeni mine usınday tán alıwlardıń ayqın dálili boldı.

Norgul Abduraimova, ÓzA