QXR “chikungunya” virusınıń tarqalıwı sharayatında pútkil mámleket boylap “COVID-19” dáwirindegi profilaktikalıq ilajlardı engizdi, dep jazbaqta Britaniyanıń ” Daily Mail ” gazetası.

Basılımnıń xabar beriwinshe, úlkeniń qublasındaǵı Foshan qalasında virus tarqalıwı menen baylanıslı jeti mıńnan aslam jaǵday dizimge alınǵan, mámleket boyınsha bolsa olardıń ulıwma sanı on mıńnan artqan.
“CHikungunya” infekciyalanǵan shıbınlardıń shaǵıwı arqalı juǵadı, biraq virus adamnan adamǵa hawa tamshıları arqalı juqpaydı. Infekciya temperatura, buwınlarda awırıw hám awır jaǵdaylarda júrek hám miyge tásir etetuǵın ómir ushın qáwipli bolǵan asqınıwlardı keltirip shıǵaradı.
Atap ótiliwinshe, házirgi waqıtta Qıtay húkimeti qala kósheleri, elatlı punktler hám qurılıs maydanlarında dezinfekciyalaw jumısların ámelge asırmaqta. Bul jaǵday 2020-jılı koronavirus pandemiyasına qarsı gúresiwde qollanılǵan taktikalardı eske salmaqta.
Keselliklerdiń aldın alıw hám qadaǵalaw boyınsha Evropa orayınıń maǵlıwmatlarına bola, “chikungunya” menen keselleniwdiń global ósiwi 2025-jıldıń basında baslanǵan hám Hind okeanındaǵı Reyunon, Mayotta hám Mavrikiy atawlarında jaǵday qıyınlasqan.
Usı jıldıń 4-avgust jaǵdayına bola, 16 mámlekette 240 mıńǵa shamalas kesellik dizimge alınǵan bolsa, sonnan 90 jaǵday ólim menen juwmaqlanǵan.

S.Rahimov, ÓzA