Búgingi kúnde Ózbekstan puqaraları 40qa shamalas mámleketke vizasız , jáne 42 mámleketke ápiwayılastırılǵan tártipte kiriw imkaniyatına iye. Sırtqı isler ministrligi baspasóz xatkeri Ahror Burhonov bul haqqında málim etti.

Atap ótiliwinshe, Ózbekstan sırtqı isler ministrligi puqaralarımızdıń sırt elde erkin hám qolaylı háreketleniwin támiyinlew, viza talapların biykarlaw yamasa olardı ápiwayılastırıwdı óz jumısınıń tiykarǵı baǵdarlarınan biri dep biledi. Usı maqsette birge islesiwshiler menen turaqlı túrde sóylesiwler alıp barılmaqta hám anıq nátiyjelerge erisilmekte.
2023-2025-jıllarda Qıtay, Birlesken Arab Ámirlikleri, Tailand, Oman, Iran sıyaqlı 10ǵa shamalas mámleket penen vizasız rejim engizildi. Sonday-aq, Saudiya Arabstanı, Qatar, Vetnam sıyaqlı bir qatar mámleketler puqaralarımız ushın viza tártibin jeńillestirdi.
Házirgi waqıtta onlaǵan mámleketler menen puqaralarımızdıń sırt elge shıǵıwın jáne de ańsatlastırıw boyınsha jedel sóylesiwler dawam etpekte. Sırtqı isler ministrligi usı baǵdardaǵı háreketlerin izbe-iz dawam ettirip, Ózbekstan puqaralarına xalıqaralıq maydanda keńirek imkaniyatlar jaratadı, dedi Burhonov.

Qaraqalpaqstan xabar agentligi