Prezident Shavkat Mirziyoev 31-iyul kúni awıl xojalıǵında kosmoslıq maǵlıwmatlardan paydalanıw hám sanlastırıw ilajları boyınsha májilis ótkerdi.

Bul keshe bolıp ótken videoselektor májilisiniń logikalıq dawamı. Miywe-ovoщ hám azıq-awqat ónimlerin kóbeytiw máselesi kórip shıǵılıp, mámleketimiz basshısı jerden únemli paydalanıw, nátiyjelilikti arttırıw jolların kórsetken edi.

Bunıń ushın anıq esap-sanaq hám tallaw oǵada zárúr. Prezidentimizdiń baslaması menen shólkemlestirilgen “Ózbekkosmos” agentligi usınday imkaniyat bermekte. 2024-jıl 14-oktyabrdegi Prezident pármanına muwapıq, ekonomika tarmaqlarında aerokosmoslıq texnologiyalar engizilmekte.

Sonıń ishinde, bul awıl hám suw xojalıǵındaǵı haqıyqıy jaǵdaydı, kemshiliklerdi ashıq-aydın kórsetip berip atır. Eki jıl dawamında tarawda paydalanılıp atırǵan 4 million gektardan aslam jerlerge kosmoslıq monitoring ótkerildi. Anıqlanıwınsha, esabatlarda kórsetilgen ayırım maydanlarda paxta egilmegen, geyde rezervtegi yamasa iyesi belgisiz jerlerge egilgen.

Sol sebepli mámleket tárepinen ajıratılatuǵın jeńilletilgen kreditlerdiń maqsetli jumsalıwın aralıqtan monitoring etetuǵın sistema jolǵa qoyılatuǵını belgilendi.

Klimat ózgeriwi hám suw jetispewshiliginen kelip shıǵıp, elimizde az suw talap etetuǵın jańa sortlar hám agrotexnologiyaǵa ótilmekte. Biraq eginlerdi suwǵarıwda suwdıń jumsalıw norması házirgi haqıyqıy talapqa juwap bermeytuǵını kórsetip ótildi. Gidromodul rayonlastırıw  jaqtan qatnas jasaw da gónergen. Aqıbetinde kanallardıń ayaǵında jaylasqan 3 mıńnan aslam fermerge suw jetip barmay atır.

Awıl hám suw xojalıǵı sistemasındaǵı ilimiy institutlardı tartqan halda suwǵarıw norması hám gidromodul rayonlastırıwdı tolıq jańalaw wazıypası qoyıldı.

Fermerler jumsap atırǵan suwdıń elege shekem anıq esabı joq ekenligi atap ótilip, onıń barlıq basqıshların sanlastırıw, suwdıń konturma-kontur esabın júrgiziw zárúr ekenligi atap ótildi.

Suw saqlaǵıshlardıń sıyımlılıǵı da joybarlaw quwatlılıǵı boyınsha esaplap kelingen edi. Keyingi eki jılda 60 iri suw saqlaǵısh birinshi márte batimetrlik tallawdan ótkerildi. Ílaydıń shógiwi sebepli ayırımlarınıń sıyımlıǵı kemeygeni anıqlandı.

Sol sebepli barlıq suw saqlaǵıshlarǵa “aqıllı” esaplaǵıshlar ornatıp, suw muǵdarın onlayn baqlaw, olardaǵı ılaydı azaytıw wazıypaları kórsetip ótildi.

– Jer menen suw awıl xojalıǵımız táǵdirin sheshiwshi másele, – dedi Shavkat Mirziyoev.

Májiliste tarawdı sanlastırıw máselesine ayrıqsha itibar qaratıldı.

Házir fermerler jer, kredit, subsidiya hám agroxızmetler boyınsha 30 dan aslam platformadan paydalanbaqta. Onı ańsatlastırıw ushın olar birlestirilip, “Sanlı awıl xojalıǵı” birden-bir integraciyalıq platforması iske qosıladı.

Endi atızına ne egiwdi fermerdiń ózi sheshedi. Bunı platformaǵa da onıń ózi kirgizedi. Nátiyjede tiykarǵı, tákirarıy hám toqsanbaslı eginlerdiń muǵdarı aldın ala kórinedi. Bul azıq-awqat qáwipsizligi, bahanıń turaqlılıǵı hám diyqanlardıń dáramatında oǵada áhmiyetli.

Bas ministrdiń orınbasarı J.Qwchqorovtıń basshılıǵında azıq-awqat qáwipsizligin támiyinlew boyınsha komissiya dúziliwi belgilendi. Jetispey atırǵan ónimdi kóbeytiw ushın jeńilletilgen kredit hám subsidiya beriledi.

Tarawda ushıwshısız apparatlardan paydalanıw da rejelestirilmekte. Gúzde 100 den aslam zamanagóy dron alıp kelinedi. Juwapkerlerge jeke menshik sektordı tartıp, fermerlerge dronlar járdeminde xızmetlerdi jolǵa qoyıw boyınsha kórsetpe berildi.

Sabanlardı jaǵıwǵa shek qoyıwdıń nızamlı tiykarların jaratıw zárúr ekenligi aytıldı.

Kosmoslıq izertlewlerde qurılıs, kadastr, rudalıq emes kánler, toǵay hám jaylaw jerleri boyınsha da tallawlar bar ekenligi atap ótilip, ministrler hám hákimlerge olardı úyrenip, rejeler islep shıǵıw wazıypası qoyıldı.

ÓzA