Qádirli watanlaslar!

Mámleketimizde birden-bir hám tatıw shańaraq bolıp jasap atırǵan 130 dan aslam millet hám xalıq wákilleri bolǵan siz, ázizlerdi, sizlerdiń tımsalıńızda kóp milletli pútkil xalqımızdı 30-iyul – Xalıqlar doslıǵı kúni menen shın kewlimnen qızǵın qutlıqlap, bársheńizge ózimniń joqarı húrmetim hám jaqsı tileklerimdi bildiremen.

Álbette, elimiz jerinde áyyemgi dáwirlerden berli dawam etip kiyatırǵan etnikalıq kóp túrlilik siyrek ushırasatuǵın sociallıq hádiyse bolıp, búgin – Jańa Ózbekstan sharayatında jańasha mánis-mazmun hám dástúrlerge iye bolıp atırǵanı dıqqatqa ılayıq.

Hámmemiz ushın áziz hám qádirli bolǵan Watanımız mine, usı tiykarda insan qádiri hám baxtı ulıǵlanatuǵın shın mánisindegi tınıshlıq, doslıq hám miyrim-shápáát úlkesine aylanıp barmaqta, desem, sizler de bul pikirge qosılasız, dep oylayman.

Húrmetli doslar!

Elimizdegi tınıshlıq hám turaqlılıqtıń áhmiyetli faktorı bolǵan milletleraralıq qatnasıqlardı rawajlandırıwdı biz elimizde demokratiyalıq huqıqıy mámleket hám erkin puqaralıq jámiyetin qurıwdıń tiykarǵı baǵdarı sıpatında belgilep aldıq hám bul baǵdarda úlken jumıslardı ámelge asırıp kelmektemiz.

Bárinen burın, tarawǵa baylanıslı mámleketlik siyasat pútkilley jetilistirilip, onıń huqıqıy hám institucionallıq tiykarları bekkemlendi.

Eń áhmiyetlisi, bul baǵdarda mámleketlik hám mámleketlik emes shólkemler arasında nátiyjeli birge islesiw ornatılıp, olardıń imkaniyatları birlestirilip, sistemalı hám keń kólemde jumıs alıp barılmaqta.

Bir ǵana mısal – elimizde jumıs alıp barıp atırǵan 157 milliy-mádeniy oray, 42 doslıq jámiyeti hám sırt eldegi 100 den aslam watanlaslardıń jámiyetlik birlespeleri mámleketlik shólkemler menen birgelikte elimizde doslıq hám keńpeyillik ortalıǵın, milliy hám ulıwmainsanıylıq qádiriyatlardıń úylesikligin bekkemlew, sırt eller menen mádeniy-aǵartıwshılıq baylanıslardı, xalıq diplomatiyasın hár tárepleme rawajlandırıw boyınsha kóplegen unamlı nátiyjelerge erispekte.

Biz óziniń hadal miyneti, watansúyiwshilik pazıyletleri menen respublikamızdıń sociallıq-ekonomikalıq potencialın arttırıwǵa sheksiz úles qosıp kiyatırǵan túrli milletke tiyisli jerleslerimiz benen haqılı túrde maqtanamız. Olar mámleketlik hám jámiyetlik shólkemlerde túrli juwapkerli lawazımlarda shın kewilden miynet etpekte, pidayı xızmetleri ushın Watanımızdıń joqarı sıylıqlarına miyasar bolmaqta.

Óz táǵdirin hám keleshegin Ózbekstan menen baylanıstırǵan bunday ullı watanlaslarımız tariyxıy Watanları menen elimiz arasında doslıq hám birge islesiw baylanısların bekkemlewde de ayrıqsha úlgi kórsetpekte.

Milliy-mádeniy oraylardıń hámmemiz ushın ulıwmaxalıqlıq bayramlarǵa, gózzal qádiriyatlarǵa aylanıp ketken Nawrız hám Ǵárezsizlik saltanatları, basqa da ǵalabalıq ilajlardı ótkeriwde bárqulla belsene qatnasıp kiyatırǵanı da maqtawǵa ılayıq.

Bárshemiz birgelikte belgilep atırǵan búgingi bayram – Xalıqlar doslıǵı kúni de xalqımızdıń tınıshlıq, doslıq hám jaqsılıq ideyaları jámlengen bay mádeniyatı, úrp-ádet hám dástúrlerin ayqın kórsetiw ushın jáne bir úlken imkaniyat ekenin atap ótiw kerek.

Keyingi jıllarda bekkem siyasiy erk-ıqrarımız benen regionımızdaǵı tuwısqan mámleketler menen doslıq baylanıslarımız jańa basqıshqa kóterilip, dúnya siyasatında “Oraylıq Aziya ruwxı” degen sóz hám haqıyqatlıq payda bolǵanı bárshemizdiń ulıwma jetiskenligimiz, desek, durıs boladı. Bul haqqında sóz bolǵanda, bıyıl mart ayında Ózbekstan – Qırǵızstan – Tájikstan shegaraları óz-ara tutasqan orında “Doslıq” stellası ornatılǵanı aramızdaǵı jaqsı qońsıshılıq hám strategiyalıq sheriklik qatnasıqları bekkemlenip atırǵanınıń jáne bir ayqın dálili bolıp esaplanadı.

Húrmetli watanlaslar!

Dúnyanıń hár qıylı regionlarında milliy hám diniy tiykarda túrli kelispewshilikler dawam etip atırǵan házirgi oǵada qáwipli sharayatta birden-bir Ózbekstan ideyası tiykarında eń úlken baylıǵımız – elimizdegi tınıshlıq hám turaqlılıq, óz-ara húrmet hám tatıwlıq ortalıǵın jáne de bekkemlew, jaslardı milliy hám ulıwma insanıylıq qádiriyatlar, bilim-aǵartıwshılıq, kásip-ónerler iyesi etip tárbiyalaw, inklyuzivlik principlerin tereńlestiriw baǵdarındaǵı jumıslarımızdı keleshekte de izbe-iz dawam ettiremiz.

Ózbekstan puqarası ekenliginen maqtanatuǵın barlıq millet hám konfessiyalar wákilleri jáne sırt eldegi watanlaslarımızdıń huqıqları menen máplerin Konstituciya hám nızamlarımız talapları tiykarında barlıq jerde qatań qorǵaw ushın bar kúsh hám imkaniyatlarımızdı jumsaymız.

Siz, ázizler Watanımızdıń ekonomikalıq hám sociallıq qúdiretin arttırıw, xalıqaralıq kólemdegi abırayın joqarılatıw jolında bunnan bılay da pidákerlik penen miynet etip, pútkil kúsh-ǵayratıńız, bilim hám tájiriybeńiz, talant hám sheberligińizdi, kásiplik hám insanıylıq potencialıńızdı tolıq kórsetesiz, dep isenemen.

Bársheńizdi búgingi ullı bayram menen jáne bir márte qızǵın qutlıqlayman.

Sizlerge bekkem densawlıq, mámleketimizdiń rawajlanıwı jolındaǵı ullı jumısıńızda jańa tabıslar, shańaraqlıq baxıt, shańaraqlarıńızǵa qut-bereket tileymen.

Bárshemiz ushın birden-bir Watan bolǵan janajan Ózbekstanımız bárqulla aman bolsın, bárqulla gúllep-jasnasın!

Shavkat Mirziyoev,

Ózbekstan Respublikası Prezidenti