Ózbekstan Respublikası Prezidentiniń
qararı

Dúnyadaǵı hár bir mámlekettiń milliy suvereniteti hám ǵárezsizligi usı mámlekettiń xalıqaralıq huqıq subekti sıpatında dúnya jámiyetshiliginen múnásip orın iyelewi, óz halqınıń tınısh hám abat turmısın, onıń eń áhmiyetli máplerin támiyinlewge xızmet etetuǵın bekkem siyasiy-sociallıq tiykar hám kúsh-qúdiret dáregi bolıp esaplanadı.

1991-jıl 31-avgustta márt hám keńpeyil xalqımızdıń erk-ıqrarı hám qararı menen qolǵa kirgizilgen milliy ǵárezsizligimiz Jańa Ózbekstandı qurıw jolındaǵı barlıq reformalarımız sheshiwshi basqıshqa kirip atırǵan búgingi tariyxıy sharayatta hár qashanǵıdan da úlken áhmiyetke iye bolıp atırǵanı sózsiz.

Áyne ǵárezsizlik, barlıq siyasiy-huqıqıy kepilliklerdi ózinde jámlegen halda, “Ózbekstan-2030” strategiyamızdı ámelge asırıw, jámiyetimizde tınıshlıq, doslıq hám jámiyetlik ortalıǵın kúsheytiw, insan qádiri, huqıq hám máplerin támiyinlew, regionımızda jaqsı qońsıshılıq qatnasıqların jáne de rawajlandırıw, dúnya mámleketleri menen jedel birge islesiw, Watanımızdıń xalıqaralıq kólemdegi abırayın arttırıwda sheksiz tayanısh bolıp xızmet etpekte.

Mámleketimiz ǵárezsizliginiń áne, usınday úlken áhmiyetin esapqa alıp, milliy ǵárezsizligimizdiń otız tórt jıllıq dańqlı sánesin Jańa Ózbekstannıń rawajlanıw dárejesi, jáhán maydanındaǵı abırayına hár tárepleme múnásip túrde joqarı dárejede belgilew maqsetinde qarar etemen:

1. Mádeniyat ministrligi, Respublikalıq Ruwxıy hám aǵartıwshılıq orayı, Jazıwshılar awqamı, Jaslar isleri agentligi tárepinen islep shıǵılǵan “Watan ushın, millet ushın, xalıq ushın!” degen ideyanı ózinde jámlegen Ózbekstan Respublikası mámleketlik ǵárezsizliginiń otız tórt jıllıǵına baǵıshlaǵan bayram ilajlarınıń kórkem-ideologiyalıq koncepciyası (keyingi orınlarda-Koncepciya) 1-qosımshaǵa muwapıq maqullansın.

2. Ózbekstan Respublikası mámleketlik ǵárezsizliginiń otız tórt jıllıq bayramına tayarlıq kóriw hám onı ótkeriw boyınsha respublikalıq komissiya (keyingi orınlarda -Respublikalıq komissiya) dúzilsin hám onıń quramı 2-qosımshaǵa muwapıq tastıyıqlansın.

3. Respublikalıq komissiya (A.Aripov):

a) Ózbekstan Respublikası mámleketlik ǵárezsizliginiń otız tórt jıllıq bayramı (keyingi orınlarda – Ǵárezsizlik bayramı) Qaraqalpaqstan Respublikası, wálayatlar hám Tashkent qalasında, sonday-aq, barlıq qala, rayon hám awıllarda múnásip belgileniwin támiyinlew ushın Koncepciyanıń tiykarǵı mazmunı hám baǵdarlarınan kelip shıqqan halda tiyisli ilajlar baǵdarlamalarınıń islep shıǵılıwı hám orınlanıwın támiyinlesin;

b) orınlarda Ǵárezsizlik bayramınıń elimizdiń rawajlanıwı hám xalqımızdıń abadanlıǵın támiyinlew baǵdarındaǵı áhmiyetine baǵıshlanǵan ruwxıy-aǵartıwshılıq ánjumanlar, ashıq pikirlesiw hám sáwbetler, ádebiy-kórkem kesheler, milliy kino kúnleri, ulıwma xalıqlıq seyiller, mádeniyat hám sport ilajların nátiyjeli ótkeriw maqsetinde belgili ilim ǵayratkerleri, dóretiwshiler, mádeniyat hám kórkem óner ǵayratkerleri, sportshılar, jámiyetshilik wákillerinen ibarat úgit-násiyatlaw toparların shólkemlestirsin hám olardıń anıq reje tiykarında jumıs alıp barıwı ushın kerekli sharayatlar jaratıp bersin;

v) usı baǵdarda belgilengen ilajlardıń ámelge asırılıwı boyınsha hár bir aymaq, ministrlik hám uyım basshılarınıń esabatların Respublikalıq komissiya májilislerinde turaqlı túrde tıńlap barsın.

4. Qaraqalpaqstan Respublikası, wálayatlar hám Tashkent qalasında ótkeriletuǵın tiykarǵı bayram ilajlarınıń baǵdarlamaların tayarlawǵa joqarı professionallıq sheberlikke hám tájiriybege iye bolǵan scenarist hám rejissyorlar, jazıwshı hám shayırlar, kompozitor hám baletmeysterler, saxna xudojnikleri, talantlı jas atqarıwshılar, maqam hám baqsıshılıq óneri wákillerinen ibarat dóretiwshilik toparlar keńnen tartılsın.

5. Ǵárezsizlik bayramına baǵıshlanǵan ilajlardı ámelge asırıwda tómendegi tiykarǵı baǵdarlarǵa ayrıqsha itibar qaratılsın:

a) Jańa Ózbekstandı qurıw boyınsha segiz jıl aldın baslaǵan keń kólemli reformalarımız sebepli jámiyetimizdiń jámiyetlik-siyasiy kórinisiniń pútkilley ózgerip baratırǵanlıǵı;

b) qısqa múddette mámleketimiz ekonomikası jedel ósip, jalpı ishki ónimimizdiń kólemi tariyxta birinshi ret 110 milliard AQSh dollarınan artqanı, “jasıl” hám innovaciyalıq ekonomikaǵa ótiw, alternativ energiya dáreklerin jaratıw boyınsha úlken baǵdarlama hám joybarlardıń ámelge asırılıp atırǵanı;

v) jańalanǵan Konstituciyamızda belgilengenindey, Ózbekstan barǵan sayın insan qádiri, onıń huqıqları menen mápleri ulıǵlanatuǵın sociallıq mámleketke aylanıp atırǵanı, bántlikti támiyinlew, zamanagóy jumıs orınların kóbeytiw, kámbaǵallıqtı qısqartıw, járdemge mútáj kategoriyalardı qollap-quwatlaw boyınsha mámleketlik baǵdarlamalar úlken unamlı nátiyjeler berip atırǵanı;

g) bilimlendiriw tarawındaǵı reformalar burın tariyxımızda misli kórilmegen ózgerislerge alıp kelip atırǵanı, mektepke shekemgi bilimlendiriw sistemasında qamtıp alıw 2017-jıldaǵı 27 procentten házirgi waqıtta 77 procentke, joqarı bilimlendiriwde bolsa 9 procentten 42 procentke jetkeni, elimizde dóretiwshilik mektepleri, qánigelesken mektepler hám Prezident mektepleri sıyaqlı jańa modeldegi mektepler sistemasınıń payda bolǵanı;

d) densawlıqtı saqlaw, ilim, IT, mádeniyat, ádebiyat hám kórkem óner tarawlarınıń rawajlanıwına da úlken itibar berilip atırǵanı, Parij Olimpiadası hám Paralimpiadasında sportshılarımız birinshi ret kúshli on beslikten orın alǵanı, futbol boyınsha 17 jasqa shekemgi jas óspirimler komandamız, sonday-aq, milliy saylandı komandamız Ózbekstan tariyxında birinshi ret jáhán chempionatına jollamanı qolǵa kirgizgeni;

e) “Jaslar – Jańa Ózbekstan dóretiwshileri” degen súren astında náwqıran áwladımızdıń zamanagóy bilim hám kásip-ónerler, ana tili menen birge shet tillerin, IT texnologiyaların iyelewi, isbilermenlik penen shuǵıllanıwı, talant hám qábiletin júzege shıǵarıwı ushın hár tárepleme qolaylı sharayat jaratıp berilip atırǵanı, oǵan juwap retinde ul-qızlarımız túrli tarawlarda dáslepki quwanıshlı jetiskenliklerge erisip atırǵanı;

j) keyingi jıllarda qala hám awıllarımız tez pátler menen abat bolıp atırǵanı, “Jańa Ózbekstan” turaq jay massivlerin qurıw, “Abat awıl,” “Abat máhálle” baǵdarlamaları sheńberinde úlken jumıslar ámelge asırılıp atırǵanı, smart hám innovaciyalıq qala qurılısı tiykarında jańa qalalar qurılıp, sociallıq infrastruktura tarmaqları rawajlanıp atırǵanı;

z) kóp milletli hám kóp konfessiyalı jámiyetimizdegi tınıshlıq, óz-ara doslıq hám awızbirshilik ortalıǵı – biziń biybaha baylıǵımız ekeni, onı qásterlep-saqlaw hám bekkemlew bárshemizdiń muqaddes minnetimiz bolıp qalıwı kerekligi;

i) “Armiya hám xalıq – bir tán, bir jan!” degen súren tiykarında Qurallı Kúshlerimizdiń jawıngerlik potencialın arttırıw, márt hám batır ásker hám oficerlerimizdiń fizikalıq, ruwxıy-aǵartıwshılıq tayarlıǵın joqarılatıw, jaslardı watansúyiwshilik ruwxında tárbiyalaw baǵdarındaǵı jumıslardıń ámelge asırılıp atırǵanı;

k) Ózbekstannıń Oraylıq Aziya regionında jaqsı qońsıshılıq, birge islesiw hám integraciya processlerin kúsheytiwdegi ornı hám abırayınıń artıp, jańa basqıshqa kóterilip atırǵanı;

l) Jańa Ózbekstannıń dúnya jámiyetshiliginde ashıq, demokratiyalıq hám dúnyalıq mámleket sıpatındaǵı abırayı barǵan sayın joqarılap atırǵanı.

6. Mádeniyat ministrligi (O.Nazarbekov):

a) Respublikalıq Ruwxıylıq hám aǵartıwshılıq orayı, Jazıwshılar awqamı menen birgelikte bir hápte múddette Tashkent qalasında Ǵárezsizlik bayramına baǵıshlanıp ótkeriletuǵın tiykarǵı bayram ilajınıń baǵdarlaması hám scenariysin Koncepciya tiykarında islep shıqsın jáne onı joqarı kórkem-ideologiyalıq dárejede tayarlaw ilajların kórsin;

b) Kórkem óner akademiyası, Jazıwshılar awqamı, Jurnalistler awqamı menen birgelikte “Ana diyar – reńler jilwasında”, “Watan ushın jasayıq!”, “Eń ullı, eń áziz” sıyaqlı dástúriy tańlawlardı joqarı dárejede ótkeriwdi támiyinlesin;

v) Kompozitorlar hám melodistler awqamı, Jazıwshılar awqamı menen birgelikte elimizdiń ǵárezsizligin jırlaytuǵın eń jaqsı qosıq hám muzıka shıǵarmaları tańlawlarınıń juwmaqlawshı basqıshın ótkersin;

g) usı tańlawlardıń jeńimpazları hám sıylı orın iyelerin Ǵárezsizlik bayramı aldınan járiyalaw hám saltanatlı túrde sıylıqlaw ilajların kórsin.

7. Ótkeriletuǵın bayram ilajları:

a) Qaraqalpaqstan Respublikası hám wálayatlarda – tiyisli jergilikli byudjetlerdiń qosımsha dárekleri jáne fizikalıq hám yuridikalıq táreplerdiń ıqtıyarıy tiykardaǵı qáwenderlik qayırqomlıqları esabınan;

b) Tashkent qalasında – Respublikalıq komissiya tárepinen tastıyıqlanatuǵın qárejetler smetasına muwapıq Ózbekstan Respublikası respublikalıq byudjeti hám Tashkent qalası jergilikli byudjeti qarjıları esabınan teń úleslerde qarjılandırıladı.

8. Ózbekstan Milliy teleradiokompaniyası, Ózbekstan Milliy málimleme agentligi, “Dunyo” málimleme agentligi hám basqa da ǵalaba xabar qurallarına Ǵárezsizlik bayramına tayarlıq kóriw hám onı ótkeriw boyınsha ámelge asırılıp atırǵan jumıslardı keńnen sáwlelendirip barıw usınıs etilsin.

9. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyası Sociallıq rawajlanıw departamentiniń basshısı O.Q.Abdurahmonovqa júklensin.

Ózbekstan Respublikası

Prezidenti                                                                                                Sh.MIRZIYOEV

Tashkent qalası,
2025 –jıl 10-iyul