Prezident Shavkat Mirziyoev máhállede jınayatshılıqtı saplastırıw hám nızam ústinligin támiyinlew ilajlarına baylanıslı prezentaciya menen tanıstı.

Mámleketimiz basshısınıń jıl basındaǵı birinshi qararı usı máselege qaratılǵan edi. 3-yanvarda qol qoyılǵan bul qararda taraw uyımları ushın 2025-jılı hár bir máhállede huqıqbuzarlıqlardıń erte aldın alıw tiykarǵı wazıypa etip belgilendi hám kriminogen jaǵdayı awır máhállelerge juwapker basshılar atpa-at biriktirildi.

Ótken altı ayda hár bir wálayat, rayon hám máhálle boyınsha mánzilli “jol kartaları” tiykarında sociallıq profilaktikanıń nátiyjeli sisteması jolǵa qoyıldı, jámiyetlik orınlardı sanlastırıw kólemi arttırıldı, huqıq qorǵaw joqarı oqıw orınları tárepinen ilimiy-ámeliy úyreniwler ótkerildi. Ayrıqsha itibar jas óspirimler, jaslar, hayal-qızlar hám shańaraq-turmıs qatnasıqları sheńberindegi jınayatshılıqtı saplastırıwǵa qaratıldı. Sonıń nátiyjesinde 5 mıń 200 máhállede birde-bir jınayat júz bermedi.

Biraq kriminogen jaǵdayı awır máhálleler elege shekem bar. Profilaktika inspektorları, operativ-izlew, patrul-post hám qorǵaw xızmetiniń jumısın kúsheytip, xalıqtıń qáwipsizligin orınlarda támiyinlew shárt ekenligi atap ótildi. “Pútkil sistemanı tómenge túsirip,” hár bir máhálleni jınayatshılıqtan jıraq aymaqqa aylandırıw kerek ekenligi atap ótildi.

Xalıq, ásirese, jaslar arasında náshebentlik jaǵdayları kóp ushıraspaqta. Oǵan qarsı gúresilip atırǵan, zıyanlı qurallar hám laboratoriyalar joq etilip atırǵan bolsa da, mashqala tolıq saplastırılmaǵan. Sol sebepli videobaqlaw kameraları hám jasalma intellektti qollanıp, náshebentlik zatlardıń tarqalıwın anıqlaw, dáregin túp-tamırınan joq etiw kerek ekenligi kórsetip ótildi.

Búgingi kúndegi jáne bir áhmiyetli mashqala – kiberjınayatshılıq. Elimizde jıl basınan berli júz bergen jınayatlardıń 42 procentin usı ” illet” quraǵan.

Usı jaǵınan, Ózbekstan Prezidentiniń 2025-jıl 30-aprelde qol qoyılǵan “Málimleme texnologiyaları járdeminde júz beriletuǵın jınayatlarǵa qarsı gúresiw jumısın bunnan bılay da kúsheytiwge qaratılǵan ilajlar haqqında”ǵı qararı ayrıqsha áhmiyetke iye boldı. Ondaǵı wazıypalardı tolıq ámelge asırıp, kiberjınayatlardıń aldın alıw, xalıqtıń bul baǵdardaǵı bilimi hám xabardarlıǵın kúsheytiw, tólem sistemalarında qarıydarlardıń mápi hám qarjılay qáwipsizligin támiyinlew kerek ekenligi aytıldı.

Taraw xızmetkerleriniń bilim hám mamanlıǵın arttırıw – zaman talabı. Sol sebepli Ishki isler ministrligi Akademiyasınıń jumısın jetilistiriw názerde tutılǵan. Sonıń ishinde, oǵan qabıllaw kvotasın basqıshpa-basqısh arttırıw, jańa baǵdarlar ashıw hám dual bilimlendiriwdi rawajlandırıw rejelestirilmekte.

Mámleketimiz basshısı bilimlendiriw hám mamanlıq baǵdarlamaların zamanagóy qáwip-qáterlerge beyimlestiriw, xızmetkerlerdiń jawıngerlik hám ruwxıy tayarlıǵın arttırıw boyınsha kórsetpeler berdi.

Ishki isler sisteması prokuratura hám basqa da huqıq qorǵaw uyımları menen óz-ara baylanıslı jumıs alıp barmaqta. Atap aytqanda, respublikadaǵı kriminogen jaǵday kúndelikli tallanıp, mánzilli qadaǵalaw ilajları ótkerilmekte. Hár bir jınayattıń sebepleri úyrenilip, qaytalanbaw ilajları kórilmekte. Burın sudlanǵan yaki hákimshilik qadaǵalawdaǵı adamlardıń sociallıq sharayatların jaqsılawǵa járdem berilmekte.

Huqıq-qorǵaw uyımları jumısınıń óz-ara muwapıqlıǵı hám operativligin kúsheytip, nızam buzılıwlarınıń tiykarǵı faktorların óz waqtında anıqlaw, jınayatshılıqtı keskin azaytıw boyınsha qosımsha wazıypalar belgilendi. Mámleketimizdegi tınıshlıq-tatıwlıq hám nızam ústinligi ekonomikanıń rawajlanıwı, xalıqtıń abadanlıǵınıń áhmiyetli shárti ekeni atap ótildi.

ÓzA