Qádirli watanlaslar!

Bárinen burın, Jańa Ózbekstannıń jańalanıp atırǵan baspasózinde, teleradiokanallarda, internet basılımlarında, baspa hám poligrafiya kárxanalarında, málimleme xızmetleri hám platformalarında óz wazıypasın shın kewilden atkarıp kiyatırǵan siz, húrmetli jurnalistler, húrmetli veteranlardı, barlıq dóretiwshilik hám texnikalıq xızmetkerlerdi búgingi kásiplik bayramıńız benen qızǵın qutlıqlayman.
Global jámiyetlik-siyasiy processler sheksiz tezlik penen ózgerip atırǵan házirgi oǵada quramalı hám tınısh emes dúnyada ǵalaba xabar qurallarınıń ornı hám tásiri hár qashanǵıdan da kúshli áhmiyetke iye ekenin sezip turmız.
Bul qutlı áyyyamda mámleketimizde ámelge asırılıp atırǵan tariyxıy islerge óziniń qábileti, professionallıq sheberligi menen múnásip úles qosıp kiyatırǵan ǵalaba xabar qurallarınıń barlıq xızmetkerlerine xalqımız atınan joqarı húrmet hám jaqsı tilekler bildiriw men ushın úlken maqtanısh.
Áziz doslar!
Belgili jadid babamız Hajı Muin aytqanınday, “Baspasóz tariyxı – Oyanıw dáwiri tariyxınıń bir bólegi bolıp esaplanadı.”
Biz keyingi jılları, ullı babalarımız baslap bergen ibratlı dástúrlerimizdi dawam ettirip, demokratiyalıq jámiyettiń áhmiyetli shárti hám principi bolǵan ǵalaba xabar quralların izbe-iz rawajlandırıwǵa tiykarǵı itibar qaratpaqtamız.
Mine, usınday qatnas sebepli media mákanımızǵa aldınǵı joybarlar hám texnologiyalar, jańasha múlk qatnasıqları jedel kirip kelmekte. Respublikamızda jumıs alıp barıp atırǵan 2 mıń 400 ge shamalas ǵalaba xabar qurallarınıń 65 procenti mámleketlik emes sektordıń úlesine tuwra kelip atırǵanı, jeke menshik basılımlar, teleradiokanallar, internet resursları barǵan sayın artıp, olardan paydalanıwshılardıń sanı 14,7 millionnan 32,7 millionǵa jetkeni, málimleme kontentlerin jaratıwshılardıń qatarı keńeyip atırǵanı, álbette, mámleketimizdiń media tarawındaǵı potencialın arttırıwǵa xızmet etpekte.
Ásirese, milliy mediakontentti rawajlandırıw jolında jas dóretiwshiler, biyǵárez studiya hám prodyuserlik oraylarınıń jumısı qollap-quwatlanıp atırǵanı virtual mákanda joqarı sapalı, básekige shıdamlı joybarlar payda bolıwı ushın tiykar jaratpaqta.
Mámleketimizde puqaralardıń málimleme tarawındaǵı konstituciyalıq huqıqların, baspasóz hám sóz erkinliginiń nızamlı orınlanıwın támiyinlew boyınsha sezilerli jumıslar ámelge asırılmaqta. Biz keleshegimiz iyeleri bolǵan perzentlerimizdi bárkamal etip tárbiyalaw menen birge, olardı zıyanlı málimlemeden qorǵawǵa da ayrıqsha itibar bermektemiz. Bul baǵdarda 2030-jılǵa shekem balalar ushın mólsherlengen milliy kontentler, sonıń ishinde, baspa ónimleri payda salıǵınan azat etilip, sociallıq salıq 1 procent muǵdarında belgilengeni, qosımsha qun salıǵın qaytarıw tártibiniń engizilgeni áhmiyetli qádem boldı.
Mine usı, ózgerislerdiń dawamı sıpatında jaqında Balalar kontentin rawajlandırıw orayın shólkemlestirdik. Bul oray jas áwladımızdı milliy qádiriyatlar ruwxında tárbiyalaw, olardı jaqsılıqqa hám aǵartıwshılıqqa iytermelew boyınsha ámeliy háreketlerdi baslap jibergeni, álbette, itibarǵa ılayıq.
Bul haqqında aytqanımızda, onlayn-platforma hám veb-saytlardıń paydalanıwshılardıń huqıqların qorǵaw haqqındaǵı nızam joybarı jámiyetshiliktiń dodalawına qoyılǵanın da atap ótiwimiz kerek.
Házirgi waqıtta jasalma intellekt texnologiyalarınıń tez pát penen rawajlanıp atırǵanı jurnalistika ushın úlken imkaniyatlar ashıw menen birge, bul baǵdardaǵı jumıslarımızdı zaman talaplarına sáykes túrde jolǵa qoyıwdı talap etpekte.
Sońǵı jılları mámleketimizde óz kásibin, ana tili menen birge shet tillerin, IT texnologiyaların puqta iyelegen, jankúyer hám watansúyiwshi jańa jurnalistler áwladı jetilisip kiyatırǵanı bárshemizdi quwandıradı.
Házirgi waqıtta ǵalaba xabar qurallarında qalıslıq hám nızam ústinligin támiyinlew, prfessional bilim hám sheberligin arttırıp barıw, málimleme tarqatıwdıń zamanagóy usılların ózlestiriw, xalıq arasında málimleme, báseki hám sóylesiw mádeniyatın qáliplestiriw, jámiyetimizdegi túrli illetler, korrupciya bálesine qarsı gúresiw sıyaqlı áhmiyetli wazıypalar boyınsha ele kóp jumıs islewimiz kerek.
Qádirli ǵalaba xabar qurallarınıń xızmetkerleri!
Mámleketimiz jurnalistleri hám dóretiwshilik toparları tárepinen bildirilgen usınıslardı inabatqa alıp, bıyıl “Altın qálem” milliy sıylıǵı birinshi márte 27-iyunde – Baspasóz hám ǵalaba xabar quralları xızmetkerleri kúninde tapsırılmaqta.
Pursattan paydalanıp, búgin sizlerdiń qatnasıwıńızda saltanatlı túrde sıylıqlanatuǵın barlıq tańlaw jeńimpazların hám joqarı mámleketlik sıylıqlarǵa erisken taraw xızmetkerlerin qızǵın qutlıqlayman.
Sizlerdiń hár birińiz keleshekte óz tájiriybe hám sheberlik mektebin jaratıp, milliy jurnalistikamızdıń rawajlanıwına jáne de úlken úles qosasız, dep isenemen.
Ǵalaba xabar quralları xızmetkerleriniń mashaqatlı miynetin qádirlew, dóretiwshilik jámáátlerdi qollap-quwatlaw, tarawdıń materiallıq-texnikalıq bazasın hám kadrlar potencialın bekkemlew bunnan bılay da Jańa Ózbekstanda alıp barılıp atırǵan mámleketlik siyasattıń tiykarǵı baǵdarı bolıp qalatuǵını sózsiz.
Sizlerdi kásiplik bayramıńız benen jáne bir márte qızǵın qutlıqlap, kewlimdegi eń jaqsı tileklerimdi bildiremen.
Bárqulla aman bolıń, juwapkershilikli hám maqtanıshlı miynetińizden bereket tabıń, ázizler!

Shavkat Mirziyoev,
Ózbekstan Respublikası Prezidenti