Xabar bergenimizdey, 23-25-iyun kúnleri Samarqand qalasında bolıp ótip atırǵan BMShtıń Mámleketlik xızmet forumı sheńberinde bir qatar xalıqaralıq ushırasıwlar da shólkemlestirilmekte. Forum sheńberinde sanlı texnologiyalar ministri Sherzod Shermatov Shveciya migraciya ministri Yoxan Forsell menen ushırasıw ótkerdi.

Shveciya demokratiyalıq basqarıw, insan huqıqların qorǵaw hám migraciyanı nátiyjeli basqarıwda úlken tájiriybege iye mámleket. Ózbekstan ushın bunday sóylesiwler xalıqaralıq tájiriybe menen tanısıw, sonday-aq, puqaralardıń sırt eldegi huqıqları menen máplerin qorǵaw boyınsha jańa sheshimlerdi islep shıǵıwda ayrıqsha áhmiyetke iye.
Sóylesiw waqtında tárepler Ózbekstanda mámleketlik xızmetlerdi sanlastırıw, xalıqqa elektron xızmetler kórsetiw sistemasın jetilistiriw hám bul tarawda ámelge asırılıp atırǵan reformalar boyınsha pikir alıstı.
Sonıń menen birge, IT xızmetleri eksportınıń kólemin arttırıw máselesi dodalandı. Atap aytqanda, Shveciya menen tikkeley birge islesiwdi jolǵa qoyǵan halda Evropa bazarlarına shıǵıw imkaniyatları kórip shıǵıldı.
Májiliste aralıqtan kásiplerge ayrıqsha itibar qaratılıp, jergilikli jaslardı usı jerden turıp joqarı miynet haqı hám básekige shıdamlı jumıs orınları menen támiyinlew boyınsha baslamalar da dodalandı.
Yoxan Forsell Ózbekstandaǵı sanlı transformaciya processlerine unamlı baha berdi hám bul tarawda tájiriybe almasıw jáne eki tárepleme birge islesiwdi kúsheytiwge tayar ekenin atap ótti.
Bunday sóylesiwler xalıqaralıq isenimdi bekkemlew, óz-ara paydalı qatnasıqlardı rawajlandırıw jáne global migraciya siyasatınıń adamgershilikli hám nátiyjeli bolıwına úles qosadı.

N.Rahmonova, ÓzA