Ellikqala rayonı prokurorı Sh.Matyakubov rayondaǵı belsendi jas isbilermenlerdiń jumıs orınlarına barıp, olardıń isbilermenlik jumısı hám jumıs processleri menen jaqınnan tanıstı.

Rayon hákimligi Málimleme xızmeti bóliminiń maǵlıwmatına bola, sapar sheńberinde jaslar tárepinen ámelge asırılıp atırǵan hár qıylı joybarlar, olar dus kelip atırǵan mashqalalar hám keleshektegi rejeler haqqında pikir alısıldı. Jas isbilermenler ózleriniń usınıs hám baslamaların bildirip, isbilermenlik ortalıǵın bunnan bılay da jaqsılaw baǵdarındaǵı pikir-usınısların bildirdi.
Ushırasıwda kommerciyalıq banklerdiń wákilleri de qatnasıp, jaslarǵa kredit liniyaları, jeńilletilgen finanslıq baǵdarlamalar hám bank xızmetleri haqqında tolıq maǵlıwmat berdi. Sol arqalı jas isbilermenler óz jumısların keńeytiw ushın zárúr finanslıq imkaniyatlar haqqında xabardar boldı.
Sapardan gózlengen tiykarǵı maqset – jaslardıń isbilermenlikke bolǵan qızıǵıwshılıǵın qollap-quwatlaw, olardıń baslamaların xoshametlew, sonday-aq, huqıqıy hám finanslıq járdem sistemasın bunnan bılay da bekkemlewden ibarat.

Qaraqalpaqstan xabar agentligi