11-iyun kúni Xalıqaralıq kongress orayında Ózbekstan Respublikası Prezidenti janındaǵı Sırt el investorları keńesiniń úshinshi jalpı májilisi bolıp ótti.

Mámleketimiz basshısınıń basshılıǵında ótken ilajda Evropa tikleniw hám rawajlanıw bankiniń prezidenti Odil Reno-Basso, «Masdar», «Indorama», «ACWA Power», «Vision Invest», «DataVolt», “Veon”, “Boeing”, “Air Products”, “SpaceX”, “Meta”, “John Deere”, “Franklin Templeton”, “Suez”, “EDF”, “Total Energies”, “Voltalia”, “Orano”, “Linde”, “Claas”, “Sojitz”, “Bomi”, “OTP Bank”, “Goldwind”, “Çalik”, “Çengiz”, “Aksa”, “JBIS” sıyaqlı jetekshi kompaniya hám banklerdiń basshıları, sonday-aq, xalıqaralıq shólkemler hám finans institutları – Ekonomikalıq birge islesiw hám rawajlanıw shólkemi, Xalıqaralıq finans korporaciyası, Aziya rawajlanıw banki hám Xalıqararlıq islam sawda-qarjı korporaciyasınıń wákilleri qatnastı.
Keńestiń tiykarǵı wazıypaları tabıslı tájiriybeden hám jáhán ámeliyatınan kelip shıqqan halda mámleketti investiciyalıq, sanaat-texnologiyalıq hám innovaciyalıq rawajlandırıwdıń eń áhmiyetli baǵdarları boyınsha másláhát beriw jáne Ózbekstan Húkimeti menen sırt el investorları arasında ashıq-aydın pikirlesiwdi támiyinlewden ibarat.
Mámleketimiz basshısı májilisti ashıp, kúni keshe ótken tórtinshi Tashkent investiciyalıq forumınıń paydalı nátiyjelerin atap ótti hám keńes aǵzalarına Jańa Ózbekstannıń rawajlanıwına qosıp atırǵan úlesi hám járdemi ushın minnetdarshılıq bildirdi.
Keńestiń aldınǵı májilisleri nátiyjeli bolǵanı qanaatlanıwshılıq penen atap ótildi. Atap aytqanda, xalıqaralıq finans shólkemleri menen islesiwdiń pútkilley jańa formatına ótildi, nátiyjeli birge islesiw sisteması engizildi, óz-ara paydalı sheriklik tarmaqları keńeydi.
Sonıń ishinde, Evropa tikleniw hám rawajlanıw banki ótken jılı Ózbekstanǵa rekord muǵdarda – derlik 1 milliard dollar investiciya kirgizdi. Mámleketimiz banktiń regiondaǵı eń iri sherigine aylandı.
Sonday-aq, xalıqaralıq finans shólkemleriniń jeke menshik sektor menen birge islesiwi sezilerli dárejede kúsheydi. Jeke menshik kompaniya hám bankler menen birgeliktegi joybarlardıń kólemi 1 milliard dollardan astı.
Bul retki májiliste qatnasıp atırǵan kompaniyalar «jasıl» energetika, shıǵındılardı qayta islew, elektr energiyasın saqlaw, «jasıl» vodorod islep shıǵarıw hám basqa da tarawlarda jańa joybarlardı basladı.
Atap aytqanda, «ACWA Power», «Masdar», «Linde», «Shanghai Renewable Energy» hám «Total Energies» kompaniyaları 8 milliard dollardan aslam investiciya kirgizip, «jasıl» ekonomikanıń rawajlanıwına úlken úles qospaqta.
Ózbekstannıń sanlı texnologiyalar tarawına dúnyaǵa belgili abıraylı kompaniyalar da jedel kirip kelmekte. «DataVolt» kompaniyası regiondaǵı eń iri «jasıl» maǵlıwmatlar orayın qurıw, «Veon» bolsa jasalma intellektke tiykarlanǵan mobil superqosımshanı jaratıw boyınsha joybarlardı ámelge asırmaqta.
– Bunı sırt el investorlarınıń reformalarımız hám ashıq-aydınlıq siyasatımızǵa bolǵan joqarı iseniminiń kórinisi, dep bilemen,-dedi Prezident.
Keńeske aǵza Xalıqaralıq finans korporaciyası, «Ernst&Young», «Dentons», «Knauf» va «TBC» kompaniyaları tárepinen milliy nızamshılıqtı xalıqaralıq standartlar tiykarında jáne de jetilistiriw boyınsha bir qatar usınıslar bildirildi. Olardıń jańa baslama hám ideyaları 10 nan aslam nızam, párman hám qararlarda óz kórinisin taptı.
Mámleketimiz basshısı biznes ushın bazalıq salıq stavkaları 2028-jılǵa shekem ózgermeytuǵının málim etti.
Ulıwma, investiciyalıq ortalıqtıń jaqsılanǵanı nátiyjesinde keyingi 2 jılda elimizde sırt el kapitalınıń qatnasıwında 5,5 mıń jańa kárxana shólkemlestirilip, olardıń sanı 16 mıńǵa jetti.
Atap ótilgenindey, búgingi ushırasıwǵa tayarlıq sheńberinde sırt elli birge islesiwshilerdiń 40 tan aslam baslamaları saylap alındı. Atap aytqanda, investorlar tárepinen salıq nızamshılıǵınıń turaqlılıǵın támiyinlew, tikkeley ámel etetuǵın nızamlar sanın kóbeytiw, infrastruktura joybarlarında jeke menshik sektordıń qatnasın keńeytiw boyınsha usınıslar bildirildi.
Usı jılı jol qurılısı, transport, energetika, suw támiynatı, irrigaciya hám basqa da tarawlarda derlik 4,5 milliard dollarlıq mámleketlik-jeke menshik sheriklik joybarları baslanǵan. Finanslıq esabattıń, sonday-aq, ekologiyalıq, sociallıq hám korporativlik basqarıwdıń xalıqaralıq standartlarına ótiw boyınsha normativlik-huqıqıy hújjetler islep shıǵılmaqta.
Kelip túsken usınıslar tiykarında girew haqqındaǵı nızamshılıqtı jetilistiriw, sırt el kompaniyaları ushın professional kadrlar tayarlaw, jergilikli kompaniyalarda korporativ basqarıwdı jaqsılaw, salıq hákimshiligi boyınsha qosımsha jumısshı toparlar shólkemlestiriledi.
Keńes Sekretariatınıń erkinligin arttırıw hám onı ayrıqsha yuridikalıq tárep sıpatında qayta shólkemlestiriw usınıs etildi.
Shıǵıp sóylegen keńes aǵzaları Jańa Ózbekstandaǵı keń kólemli reformalar baǵdarlamasınıń nátiyjelerin joqarı bahaladı. Mámleketimiz basshısına investiciyalıq jumıstı hár tárepleme qollap-quwatlap atırǵanı hám óz-ara paydalı birge islesiwdi dawam ettiriwge isenimli umtılısı ushın minnetdarshılıq bildirildi.

ÓzA