Qádirli perzentlerim!

Bárinen burın, siz, ázizlerdi ómirińizdegi búgingi umıtılmas quwanıshlı waqıya – mektep bilimlendiriwin tabıslı tamamlap, jetiklik attestatın qabıl etip atırǵanıńız hám erkin ómirge qádem taslap atırǵanıńız benen qızǵın qutlıqlayman.

Usı quwanıshlı áyyyamda mámleketimizdegi 10 mıńnan aslam mektepte mehriban ustazlar, húrmetli ata-analardıń qatnasıwında «sońǵı qońıraw»lar jańlap, 450 mıńnan aslam pitkeriwshi jaslarımızdıń húrmetine jaqsı tilekler bildirilmekte.

Hámmemiz bul pikirlerge shın kewilden qosılǵan halda, úlken arzıw-niyetler menen keleshek rejelerin dúzip atırǵan ul-qızlarımızǵa olardı ámelge asırıwda úlken kúsh-ǵayrat, áwmet hám tabıslar tileymiz.

Ásirese, mektepti altın medal menen pitkerip atırǵan 11 mıń 500 den aslam perzentlerimizge, 2 mıńnan aslam gúmis medal iyelerine oqıwda hám izleniste, jámiyetlik jumıslarda óz zamanlaslarına bárqulla órnek hám úlgi bolıp kiyatırǵanı ushın ayrıqsha qutlıqlaw hám tileklerimizdi bildiremiz.

Áziz pitkeriwshi jaslar!

Búgingi kúnde biz óz aldımızǵa qoyıp atırǵan ullı maqsetlerdi ámelge asırıwda pútkil xalqımız qatarında, bilimli, ónerli, isbilermen hám watanın súyiwshi, hár tárepleme jetik jaslarımızǵa súyenemiz.

Keleshegimiz iyeleri bolǵan náwqıran áwladımız Jańa Ózbekstandı qurıwda úlken dóretiwshi kúsh sıpatında qatnasıwı ushın zárúr sharayatlardı jaratıp bermektemiz. Sonıń ishinde, sizlerdiń zamanagóy ilim hám kásip-ónerler, ana tili menen birge shet tillerin, IT hám innovaciyalıq texnologiyalardı, dóretiwshilik hám isbilermenlik tarawların puqta iyelewińiz ushın házirgi kúnde 201 joqarı oqıw ornı, 598 texnikum, kóplegen monooraylar hám texnoparkler, kitapxanalar, mádeniyat, kórkem óner hám sport mákemeleri jemisli jumıs alıp barmaqta.

Bilimlendiriwdiń barlıq buwınlarında oqıw-tárbiya jumıslarınıń sapasın hám nátiyjeliligin arttırıw, pitkeriwshi jaslarımızǵa tańlaw imkaniyatların keńeytiw ushın jańadan-jańa sistema hám baǵdarlamalar, elektron platformalar iske qosılmaqta.

Sizler áne, usınday sheksiz imkaniyatlardan aqılǵa uǵras paydalanıp, jaslıqtıń altınǵa teń hár bir minutın qádirlep, keleshekte Watanımız ǵárezsizligin, el-jurtımız máplerin barlıq tarawlarda isenimli qorǵaytuǵın jetik kadrlar, sanalı hám ullı insanlar bolıp, xalqımızǵa shın kewilden xızmet etesiz, dep isenemen.

Sonı hasla umıtpań, insan ómirde múnásip orın tabıwı, el-jurttıń húrmeti hám itibarına iye bolıwı ushın milliy hám ulıwmainsanıylıq qádiriyatlardı iyelep, bárqulla alǵa umtılıp jasawı, izleniwden hám úyreniwden hasla toqtamawı kerek.

Hadal hám mashaqatlı miynet, ilimge, kásipke, ata-ana hám shańaraqqa sadıqlıq insandı rawajlandırıp, onıń ómirin payızlı hám jarqın etetuǵınına gúman joq.

Ásirese, sizler sıyaqlı náwqıran, kúsh-ǵayratlı jaslarımızǵa házirgi jedel zamannan ibrat alıp, hár kúni bir nátiyjege erisip, erk-ıqrarıńızdı sınaqlarda taplap, tek ǵana alǵa ilgerilew jarasadı.

Sizlerdiń jańa ideya hám baslamalarıńız, túrli tarawlardaǵı jetiskenliklerińiz Jańa Ózbekstandı jáne de qúdiretli etetuǵın materiallıq hám ruwxıy tiykarlardı jaratıwǵa sheksiz úles bolıp qosılatuǵınına isenemen.

Sizlerdey óz kúshine isengen, isenimli jaslardan qádirdan mektebińiz, áziz ustazlarıńız hám ata-analarıńız, pútkil xalqımız tek ǵana iygilikli isler hám ayqın nátiyjeler kútedi.

Mine, usınday joqarı isenimge bárqulla múnásip bolıń!

Umtılıw, izleniw hám jańalıq jaratıwdan hesh qashan sharshamań!

Erkin ómirge qaray tuńǵısh qádemlerińiz qutlı bolsın, áziz ul-qızlarım!

 

Shavkat Mirziyoev,

Ózbekstan Respublikası Prezidenti