Aldın xabar berilgenindey, Qaraqalpaqstan delegaciyasınıń BAÁge saparı sheńberinde áhmiyetli kelisimlerge erisilmekte.

Birlesken Arab Ámirliklerinde ámeliy sapar menen bolıp turǵan Joqarǵı Keńes Baslıǵı Amanbay Orınbaevtıń basshılıǵındaǵı Qaraqalpaqstan delegaciyası Ámirliktiń bir qatar iri kompaniyaları wákilleri menen ushırastı.

Dáslep Milliy meteorologiya orayı Bas direktorı Abdulla Axmed Al-Mandus penen ushırasıwda meteorologiyalıq hám klimatlıq baqlawlar bazasın jaratıw, Aralboyı aymaǵınıń qurǵaqshılıq klimatı sharayatında jawın-shashındı modifikaciyalaw texnologiyaların engiziw boyınsha máseleler talqılandı. Sóylesiw nátiyjeleri boyınsha «Jol kartası» islep shıǵılıwı hám Milliy meteorologiya orayı juwapkerleriniń Ózbekstan, sonıń ishinde, Qaraqalpaqstan Respublikasına saparın shólkemlestiriwge kelisip alındı.
Bunnan soń «Tatweer Holding» kompaniyası basshıları menen ushırasıw ótkerilip, onda blokcheyn joybarların ámelge asırıw, joqarı tezliktegi internet hám data oraylarına iye texnoparklerdi hám blokcheyn texnologiyaları boyınsha oqıw orayların shólkemlestiriw máseleleri dodalandı.
Kún dawamında «Xalifa Bin Zayed Al Nahayan» fondınıń basshıları menen ushırasıw ótkerildi. Sóylesiwler dawamında Nókis qalasında qurılıp atırǵan «Analar hám balalar orayı»n iske qosıwdı jedellestiriw máseleleri kórip shıǵıldı. Ushırasıw nátiyjeleri boyınsha tiyisli juwapkerler menen birgelikte ámelge asırılatuǵın joybarlar boyınsha «Jol kartası» islep shıǵılıp, juwapkerler belgilep alındı.
Abu-Dabi (ADRF) rawajlanıw fondınıń basshıları menen ushırasıwda Qaraqalpaqstanda birgeliktegi texnoparkler, oqıw orayların ashıw, jol qurılısı, ekologiyalıq jaǵday, suw támiynatın jaqsılaw, awıl xojalıǵı ónimlerin eksport etiwde birgeliktegi joybarlardı ámelge asırıw boyınsha sóylesiwler alıp barıldı. Sonday-aq, regionnıń eń úlken awır mashqalası Aral teńiziniń batıs bólegin saqlap qalıw máseleleri dodalandı.
«ADQ» kompaniyası menen ushırasıwda sanaat áhmiyetine iye bolǵan paydalı qazılmalardıń perspektivalı aymaqların birgelikte ózlestiriw hám tarawǵa investiciyalardı tartıw máseleleri dodalandı. Abu-Dabi sawda-sanaat palatası basshıları menen de uzaq múddetli tikkeley investiciyalardı tartıw hám kompleksli joybarlardı ámelge asırıw boyınsha sóylesiwler alıp barıldı.
«ADNOC Gas» basshıları menen ótkerilgen sóylesiwler dawamında gazdi qayta islew hám suyılttırılǵan tábiyǵıy gaz islep shıǵarıw tarawında birgeliktegi joybarlardı ámelge asırıw máseleleri kórip shıǵıldı.
Ótkerilgen ushırasıwlarda atap ótilgen ilajlar sheńberinde jumıslardı jedellestiriw boyınsha rejeler belgilep alındı.

Qaraqalpaqstan xabar agentligi.