BMShtıń Elektron húkimetti rawajlandırıw indeksi dúnya mámleketlerinde málimleme jámiyeti qanshelli rawajlanıp atırǵanın belgilep beretuǵın tiykarǵı kórsetkishlerden biri bolıp tabıladı. Bul indeks xalıq hám mámleket arasında elektron sóylesiwdi keńeytiw, xızmetlerdi qolaylastırıw, elimizdiń investiciyalıq tartımlılıǵın arttırıwǵa xızmet etedi.

Búgingi kúnde Ózbekstannıń 193 mámleket arasında ornı izbe-iz kóterilip, 2022-jılı 69-orındı iyelegen bolsa, 2024-jılı 63-orındı iyeledi. Elektron húkimettiń rawajlanıw indeksi bolsa 0,79 di quradı. Birinshi márte Ózbekstan joqarı elektron húkimetti rawajlandırıw indeksi toparınan (High EGDI) júdá joqarı (Very High EGDI) toparına qosıldı.
Oliy Majlis Nızamshılıq palatasınıń májilisinde Sanlı texnologiyalar ministri Sh.Shermatovqa «BMShtıń «Elektron húkimetti rawajlandırıw indeksi»nde Ózbekstan Respublikasınıń reytingin jaqsılaw boyınsha kórilip atırǵan ilajlar haqqında»ǵı Nızamshılıq palatasınıń parlamentlik sorawın jiberiw haqqındaǵı másele kórip shıǵıldı.
– Mámleketimizde ekonomikalıq turaqlılıqtı hám sociallıq abadanlıqtı támiyinlew, korrupciyanıń aldın alıw, xalıqaralıq birge islesiwshiler ushın ashıq-aydın hám nátiyjeli ortalıq jaratıw sıyaqlı áhmiyetli máseleler elektron húkimet jaratıw baǵdarındaǵı jumıslarımız benen baylanıslı,-dedi deputat Baxtiyor Maniyozov. – Bul baǵdarda Ózbekstan Birden-bir interaktiv mámleketlik xızmetler portalı arqalı xalıq hám isbilermenlik subektlerine 730 dan aslam elektron xızmetler kórsetilip kelinbekte. Portalda paydalanıwlar sanı ótken jıldıń juwmaǵına bola 33 milliondı quraǵan. Ol arqalı mámleketlik xızmetlerdi kórsetiwde nızamshılıq hújjetlerinde belgilengen mámleketlik bajılar, jıyımlar hám basqa da hár qanday tólemler boyınsha 50 procent muǵdarında shegirme qollanıw imkaniyatı jaratıldı. Sonıń menen birge, mámleketlik uyımlar tárepinen puqaralar hám isbilermenlerden jámi 73 hújjet hám maǵlıwmatnamalardı talap etiw ámeliyatı biykar etildi.
Ózbekstan elektron húkimet tarawında sezilerli jetiskenliklerge erisken bolsa da, sanlı inklyuzivlik, ashıq maǵlıwmatlar siyasatı hám puqaralardıń belsene qatnasıwı sıyaqlı tarawlarda ayırım mashqalalar bar. Sonıń ishinde, «Elektron húkimet» sisteması uyımlararalıq integraciyalasıw platforması sheńberinde hújjetlerdiń unifikaciyalanǵan sanlı servislerin engiziw jaǵdayı keshikpekte. Sonday-aq, málimleme sistemaların óz server qurılmalarında saqlap atırǵan ministrlikler hám uyımlardıń sistemalarınıń jumısında úzilisler baqlanbaqta. Ayırım mámleketlik uyımlar tárepinen bolsa elektron platformalar arqalı alıw múmkin bolǵan maǵlıwmatlar elege shekem qaǵaz túrinde xalıqtan sorap alınbaqta, – dedi deputat.
Bunnan kelip shıǵıp, májiliste Elektron húkimetti rawajlandırıw indeksinde Ózbekstannıń kórsetkishlerin jaqsılaw, elimizde elektron húkimet sistemasın bunnan bılay da nátiyjeli shólkemlestiriw, bul reytingte TOP-30 lıqqa kiriw, Elektron húkimet tarawında nızamshılıq bazasın jetilistiriw boyınsha ámelge asırılıp atırǵan jumıslar boyınsha tiykarlandırılǵan túsiniklerdi beriw haqqında sanlı texnologiyalar ministri Sh.Shermatovqa parlamentlik soraw jiberildi.

Muhtarama Komilova, ÓzA