Ózbekstan Respublikası Prezidentiniń “2025-jılı respublika máhállelerinde qáwipsiz ortalıqtı jaratıw, huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı qararı qabıl etilgen edi.

Tórtkúl rayonı hákimligi, rayon prokuraturası hám ishki isler bólimi hám birge islesiwshi shólkemlerdiń baslaması menen usı qarardıń orınlanıwın támiyinlew maqsetinde jumıssız jaslar, profilaktikalıq esapta turǵan puqaralar hám bilimlendiriw mákemeleriniń pitkeriwshileri ushın Tashkent mámleketlik ekonomika universitetiniń Tórtkúl fakultetinde gezektegi “Bos jumıs orınları miynet yarmarkası” shólkemlestirildi.
Bul miynet yarmarkasına “Ónerment” associaciyasınıń aǵzaları bolǵan belsendi ónermentler hám rayondaǵı kommerciyalıq banklerdiń wákilleri mirát etildi, – dep maǵlıwmat beredi rayon hákimligi Málimleme xızmeti bólimi.
Onda “Potenciallı jumıs beriwshiler menen ushırasıw” ótkerildi. Ushırasıwda isbilermen hám ónermentler, jumıs beriwshiler ózlerindegi jańa hám bos jumıs orınların rásmiylestiriw, xızmetkerler menen miynet shártnamaların dúziw boyınsha maǵlıwmatlar berdi. Sonıń menen birge ilaj dawamında miynet qatnasıqlarına baylanıslı basqa da túsinikler berildi.
Sonday-aq, yarmarkada 31 kárxana hám shólkem bos jumıs orınları menen qatnastı hám tikkeley yarmarkada 29 jumıssız puqara ózine maqul bolǵan bos jumıs orınlarına jumısqa jaylastı.

Qaraqalpaqstan xabar agentligi