Usı jıldıń 29-30-aprel kúnleri Ózbekstan húkimeti delegaciyası ámeliy sapar menen Qıtay Xalıq Respublikasınıń Urumchi qalasında boldı.

Sapar sheńberinde Ózbekstan Respublikası Bas ministri Abdulla Aripov Qıtay Kommunistlik partiyası Oraylıq komiteti Siyasiy byurosınıń aǵzası, Shinjan-Uyǵur avtonomiyalıq rayonı Partkomı xatkeri Ma Sinjuy basshılıǵındaǵı eki mámleket delegaciyalarınıń ushırasıwı bolıp ótti.
Dáslep, Ózbekstan Respublikası Prezidenti Shavkat Mirziyoevtiń Qıtay Xalıq Respublikası Baslıǵı Si Czinpin hám ShUAR Partkomı xatkerine jollaǵan qızǵın sálemi hám jaqsı tilekleri jetkerildi.
Qıtay Ózbekstannıń isenimli, waqıt sınaǵınan ótken strategiyalıq birge islesiwishisi ekeni, eki tárepleme qatnasıqlar barǵan sayın bekkemlenip atırǵanı, mámleketlerimiz arasındaǵı birge islesiw barlıq sharayatlarda hár tárepleme strategiyalıq sheriklik dárejesine kóterilgeni atap ótildi.
Onda, Mámleketlerdiń jetekshileri arasındaǵı tıǵız, isenimli hám qızǵın doslıq qatnasıqları úlken áhmiyetke iye ekeni atap ótildi.
Ushırasıwda tárepler sawda, investiciyalıq hám texnologiyalıq birge islesiw rawajlanıp, infrastruktura, sanaat kooperaciyası, awıl xojalıǵı, «jasıl» energiya tarawlarında jańa joybarlar ámelge asırılıp atırǵanı nátiyjesinde ótken jılı tovar almasıw kólemi 13 milliard dollardan artqanın bildirip, Mámleketlerimiz Basshıları tárepinen belgilep berilgen 20 milliard dollarlıq kórsetkishke erisiw ushın barlıq imkaniyatlar bar ekenligin atap ótti.
Sawda-sanaat, transport-logistika, energetika, awıl xojalıǵı, turizm hám bilimlendiriw tarawlarında kóp táreplemeli birge islesiwdi keńeytiw máseleleri boyınsha da hár tárepleme pikir alısıldı.

Qaraqalpaqstan xabar agentligi