Respublikalıq tez medicinalıq járdem orayınıń Qaraqalpaqstan filialına ǵalaba xabar qurallarınıń wákilleri ushın press-tur shólkemlestirilip, onda filial direktorı I.Nurımbetov hám basqalar shıǵıp sóylep, filialdıń minnetli wazıypaları, onda jaratılǵan sharayatlar hám ámelge asırılıp atırǵan jumıslar tuwralı keń túrde maǵlıwmat berdi.

Atap ótilgenindey, Ózbekstan Respublikası Prezidentiniń 2022-jıl 16-iyun kúngi arnawlı qararına muwapıq Respublikalıq tez medicinalıq járdem orayı jáne onıń 14 aymaqlıq tez medicinalıq járdem xızmeti hám medicinalıq avtoxojalıqlar negizinde shólkemlestirildi. Bul tez medicinalıq járdemniń birden-bir vertikal basqarıw sistemasın jolǵa qoyıw, yaǵnıy, tez medicinalıq járdem kórsetiwdiń sapasın jaqsılaw hám xalıqqa jáne de jaqınlastırıw maqsetinde bir qatar wazıypalar belgilendi.
Atap aytqanda, oraydıń aymaqlıq filialların uqsas imaratlarǵa ornalastırıw wazıypaları belgilengen bolıp, 2024-jıldıń fevral ayında Nókis qalasında Respublikalıq tez medicinalıq járdem orayınıń Qaraqalpaqstan filialı ushın zamanagóy jańa imarat qurılıp, xızmetkerlerdiń jumıs islewi ushın zárúr sharayatlar jaratıldı.
Tez medicinalıq járdem kórsetiw jumısların sanlastırıw boyınsha hár bir aymaqta «Call-oray»ları shólkemlestirildi. Barlıq shaqırıwlardı tek usı «Call-oray»ları arqalı qabıllaw, oraylar tárepinen shaqırıwlardı nawqastıń jaǵdayı, kesellik túri jáne onıń salmaqlıq dárejesine qarap kategoriyaǵa bóliw hám tiyisli medicinalıq brigadalardı baǵdarlaw, tez medicinalıq járdemdi rayon (qala) yamasa aymaqtıń shegarasına qarap emes, al nawqasqa shekemgi aralıqtıń jaqınlıǵına qarap kórsetiw jolǵa qoyıldı.
Dári-dármaqlardıń jumsalıwı da sistema arqalı baqlap barıladı. Yaǵnıy, dári ónimleriniń jumsalıwı házirgi waqıtta planshet arqalı Medatta-2 sistemaǵa kirgiziledi. Yaǵnıy hár bir dári-dármaqtıń jumsalıwı usı sistema menen qadaǵalawǵa alınǵan.
Sonıń menen birge, tez medicinalıq járdem avtotransport qurallarına GPS-trekerler hám radiobaylanıs úskeneleri ornatılǵan. Qaraqalpaqstan Respublikası boyınsha 176 tez medicinalıq járdem avtotransportlarına GPS hám 155 avtotransportqa radiobaylanıs úskeneleri ornatılǵan. Sonday-aq, 162 tez medicinalıq járdem brigadaları tolıǵı menen planshetler menen támiyinlengen.
Búgingi kúnge shekem filialǵa, jámi 89 zamanagóy medicinalıq tez járdem transportı alıp kelinip, olarǵa da GPS-trekerler hám radiobaylanıs úskenelerin ornatıw jumısları alıp barıldı. Jáne 9 jol tańlamaytuǵın avtotransportların alıp keliw bıyılǵı jıldıń rejesine kirgizilgen.
Filial Open budjet baǵdarlaması boyınsha da jaqsı nátiyjelerge eristi. 2024-jıl dawamında 5 obektte iri ońlaw jumısları alıp barılıp, oǵan jámi 6,1 milliard sumlıq qarjı ajıratıldı.
Ilaj dawamında qatnasıwshılar «Call-oray»ǵa, tez medicinalıq járdem avtotransport quralları bazasına, medicinalıq xızmetkerlerdiń náwbetshilik etiw xanalarına barıp, atqaratuǵın jumısları, jaratılǵan sharayatlar menen tanıstı. Qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.