Ózbekstan Respublikası Prezidentiniń qararı

2025-jıl 5-mart kúni Korrupciyaǵa qarsı gúresiw boyınsha milliy keńestiń keńeytilgen májilisinde mámleketlik uyımlar hám shólkemlerdiń korrupciyaǵa qarsı ishki qadaǵalaw bólimleriniń jumısın jańasha sistema tiykarında shólkemlestiriw boyınsha belgilengen tiykarǵı wazıypalardı nátiyjeli ámelge asırıw, sonday-aq, mámleketlik uyımlar hám shólkemlerde «hadallıq vakcinası» principi tiykarında korrupciyaǵa mawasasız qatnastı qáliplestiriw maqsetinde qarar etemen:
I. Tiykarǵı wazıypalar
1. Mámleketlik uyımlar hám shólkemler, ustav fondında (ustav kapitalında) mámlekettiń úlesi 50 procent hám onnan artıq bolǵan xojalıq jámiyetlerindegi (keyingi orınlarda – mámleketlik uyımlar hám shólkemler) korrupciyaǵa qarsı ishki qadaǵalaw bólimleriniń tiykarǵı wazıypaları etip tómendegiler belgilensin:
a) korrupciya jaǵdayların erte anıqlaw hám olardıń aldın alıw, olarǵa imkaniyat beriwshi sebep hám sharayatlardı saplastırıw;
b) mámleketlik xızmetlerdi kórsetiwde korrupciyalıq faktorlardı saplastırıw, turmıslıq korrupciyanıń aldın alıw, sonıń ishinde, sanlastırıw, byurokratiyanı qısqartıw boyınsha usınıslar islep shıǵıw;
v) uyımlıq normativlik-huqıqıy hújjetlerdi korrupciyaǵa qarsı ekspertizadan ótkeriw hám juwmaqları boyınsha anıqlanǵan korrupciyalıq normalardı biykar etiw boyınsha usınıs kirgiziw;
g) mámleketlik satıp alıwlardı ámelge asırıwda mápler soqlıǵısıwına jol qoymaw ilajların kóriw, mámleketlik satıp alıwlar boyınsha preventiv úyreniwlerdi ámelge asırıw;
d) korrupciyaǵa qarsı gúresiw boyınsha ámelge asırılǵan jumıslar boyınsha turaqlı túrde Korrupciyaǵa qarsı gúresiw agentligine (keyingi orınlarda – Agentlik) elektron esabat berip barıw;
e) tiyisli taraw hám tarmaqta korrupciyalıq qáwip-qáterler dizimin qáliplestiriw, olardı saplastırıwǵa qaratılǵan ilajlar islep shıǵıp, tastıyıqlanıwın támiyinlew;
j) mámleketlik uyımlar hám shólkemlerde korrupciyaǵa qarsı ishki qadaǵalawdı ámelge asırıw hám korrupciyalıq qáwip-qáterlerdi anıqlaw imkaniyatın beriwshi situaciyalıq oraylardıń jumısın jolǵa qoyıw boyınsha usınıslar kirgiziw;
z) miynet jámáátinde korrupciyaǵa qarsı mawasasız qatnasıqtı qáliplestiriw, mápler soqlıǵısıwına jol qoymaw hám ádep-ikramlılıq qaǵıydalarına ámel etiw boyınsha úgit-násiyatlaw jumısların alıp barıw;
i) korrupciyaǵa qarsı gúresiw boyınsha unamlı tájiriybelerdi ǵalaba en jaydırıw hám engiziw boyınsha usınıslar kirgiziw.
II. Korrupciyaǵa qarsı ishki qadaǵalaw sistemasın jetilistiriw boyınsha ilajlar
a) korrupciyaǵa qarsı ishki qadaǵalaw bólimleri óz jumısında tikkeley shólkemniń birinshi basshısına, ustav fondında (ustav kapitalında) mámlekettiń úlesi 50 procent hám onnan artıq bolǵan xojalıq jámiyetlerinde bolsa baqlaw keńesine (baqlaw keńesi joq bolǵan jaǵdaylarda kárxana basshısına) boysınatuǵını hám onıń aldında esap beretuǵını;
b) mámleketlik uyımlar hám shólkemlerdiń aymaqlıq bólimleri hám strukturalıq shólkemleriniń korrupciyaǵa qarsı ishki qadaǵalaw bólimleriniń basshıları hám xızmetkerleri respublika dárejesindegi mámleketlik uyımlar hám shólkemlerdiń birinshi basshıları tárepinen tayınlanatuǵını hám jumısı olar tárepinen muwapıqlastırılatuǵını;
v) korrupciyaǵa qarsı ishki qadaǵalaw bólimleriniń xızmetkerlerin materiallıq qollap-quwatlaw haqqındaǵı Agentliktiń usınıs xatları olar jumıs alıp barıp atırǵan shólkemler tárepinen kórip shıǵılıwı májbúriy bolıp esaplanatuǵını belgilensin.
3. Mámleketlik uyımlar hám shólkemler, ustav fondında (ustav kapitalında) mámlekettiń úlesi 50 procent hám onnan artıq bolǵan xojalıq jámiyetlerinde korrupciyaǵa qarsı ishki qadaǵalaw bólimlerin shólkemlestiriwdiń minimal normaları 1-qosımshaǵa muwapıq tastıyıqlansın.
Agentlik Esap palatası, Mámleketlik aktivlerdi basqarıw agentligi hám basqa da juwapker ministrlik hám uyımlar menen birgelikte hár jılı mámleketlik uyımlar hám shólkemlerde usı minimal normalarǵa tiykarlanıp korrupciyaǵa qarsı ishki qadaǵalaw bólimleriniń shólkemlestiriliwin monitoring etip, nátiyjeleri boyınsha Korrupciyaǵa qarsı gúresiw boyınsha milliy keńeske málimleme kirgizip barsın.
III. Korrupciyaǵa qarsı ishki qadaǵalaw sistemasınıń nátiyjeliligin arttırıw boyınsha huqıqıy eksperiment
4. 2027-jıl 1-yanvarǵa shekem huqıqıy eksperiment túrinde tómendegilerdi názerde tutıwshı sistema engizilsin:
a) Densawlıqtı saqlaw ministrligi, Qurılıs hám turaq jay kommunallıq xojalıǵı ministrligi, Suw xojalıǵı ministrligi, «Ózbekneftgaz» AJ hám «Ózsuwtámiynat» AJnıń (keyingi orınlarda – eksperiment ótkeriletuǵın shólkemler) korrupciyaǵa qarsı ishki qadaǵalaw bólimleriniń basshısı lawazımına Agentlik xızmetkerleri tayınlanadı;
b) eksperiment ótkeriletuǵın shólkemlerdiń korrupciyaǵa qarsı ishki qadaǵalaw bólimleriniń basshıları tikkeley Agentlikke boysınadı;
v) eksperiment ótkeriletuǵın shólkemlerdiń korrupiciyaǵa qarsı ishki qadaǵalaw bólimleriniń jumısın shólkemlestiriw, muwapıqlastırıw hám monitoring etiw Agentlik hám eksperiment ótkeriletuǵın shólkemler tárepinen birgelikte ámelge asırıladı.
5. Huqıqıy eksperiment sheńberinde belgilengen wazıypalardıń orınlanıwın nátiyjeli támiyinlew maqsetinde:
a) eksperiment ótkeriletuǵın shólkemlerdiń korrupciyaǵa qarsı ishki qadaǵalaw bólimleri basshılarınıń shtat birlikleri huqıqıy eksperment dáwirinde Agentlikke ótkeriledi;
b) usı shtat birlikleri ushın Agentliktiń bólim baslıǵına belgilengen miynetke haqı tólew, materiallıq xoshametlew hám sociallıq qorǵaw shártleri qollanadı. Onda bul lawazım ushın miynetke haqı tólew qárejetleri, sonday-aq, Agentlikte hám eksperiment ótkeriletuǵın shólkemlerde usı lawazım ushın tólenetuǵın miynet haqı arasındaǵı ayırmashılıq:
1) Densawlıqtı saqlaw ministrligi, Qurılıs hám turaq jay kommunallıq xojalıǵı ministrligi hám Suw xojalıǵı ministrliklerinde jumıs alıp barıwshı Agentlik xızmetkerleri ushın – Mámleketlik byudjet qarjıları esabınan;
2) «Ózbekneftgaz» AJ hám «Ózsuwtámiynat» AJda jumıs alıp barıwsha Agentlik xızmetkerleri ushın – Agentliktiń byudjetten tısqarı jeke ǵazna esap betine akcionerlik jámiyetleri tárepinen ótkerip beriletuǵın qarjılar esabınan qaplanadı.
6. Agentlik (A.Burxanov) eksperiment ótkeriletuǵın shólkemler menen birgelikte:
a) bir ay múddette eksperiment ótkeriletuǵın shólkemlerdiń korrupciyaǵa qarsı ishki qadaǵalaw bóliminiń xızmetkerleri jumısınıń huqıqıy eksperiment dawamındaǵı eń áhmiyetli nátiyjelilik kórsetkishlerin (KPI) belgilesin;
b) huqıqıy eksperimenttiń ámelge asırılıwı haqqında hár yarım jılda Korrupciyaǵa qarsı gúresiw boyınsha milliy keńeske málimleme kirgizip barsın;
v) eki ay múddette huqıqıy eksperimentti ámelge asırıw procesin tártipke salıw boyınsha birgeliktegi qarar qabıllasın;
g) huqıqıy eksperimenttiń nátiyjelerin tallaw tiykarında 2027-jıl 1-yanvarǵa shekem bul sistemanı basqa da mámleketlik uyımlar hám shólkemlerge de qollanıw boyınsha tiykarlanǵan usınıslardı kirgizsin.
IV. Korrupciyaǵa qarsı ishki qadaǵalaw bólimleri xızmetkerleriniń tájiriybesin arttırıw hám olardıń jumıs nátiyjeliligin bahalaw
7. Agentlik mámleketlik uyımlar hám shólkemlerdiń korrupciyaǵa qarsı ishki qadaǵalaw bólimleriniń jumısın hám muwapıqlastırıw hám metodikalıq támiyinlew, olardıń xızmetkerlerin stajirovka hám attestaciyadan ótkeriw hám tájiriybesin arttırıw boyınsha arnawlı wákillikli uyım etip belgilensin.
8. Mámleketlik uyımlar hám shólkemler korrupciyaǵa qarsı ishki qadaǵalaw bólimleriniń birinshi márte lawazımǵa tayınlanǵan juwapker xızmetkerleri tómendegi tártipte eki háptelik stajirovkadan ótiwi belgilensin:
a) mámleketlik uyımlar hám shólkemlerdiń oraylıq apparatındaǵı korrupciyaǵa qarsı ishki qadaǵalaw bólimleriniń basshıları hám xızmetkerleri – Agentlikte;
b) aymaqlıq bólim hám strukturalıq shólkemlerdiń korrupciyaǵa qarsı gúresiwge juwapker xızmetkerleri – mámleketlik uyımlar hám shólkemlerdiń oraylıq apparatındaǵı korrupciyaǵa qarsı ishki qadaǵalaw bólimlerinde.
9. Agentlik:
a) mámleketlik uyımlar hám shólkemler menen birgelikte olardıń korrupciyaǵa qarsı ishki qadaǵalaw bólimleriniń basshıları hám xızmetkerleri ushın hár jılı korrupciyaǵa qarsı gúresiw hám kompleans qadaǵalaw boyınsha qısqa múddetli mamanlıq arttırıw kursların hám olardıń nızamshılıqta belgilengen tártipte hár úsh jılda attestaciyadan ótkeriliwin shólkemlestirip barsın;
b) úsh ay múddette tómendegilerdi názerde tutıwshı Húkimet qararınıń joybarın islep shıqsın hám belgilengen tártipte Ministrler Kabinetine kirgizsin:
1) Mámleketlik uyımlar hám shólkemlerdiń korrupciyaǵa qarsı ishki qadaǵalaw bólimleri haqqındaǵı úlgi rejeni tastıyıqlaw;
2) korrupciyaǵa qarsı ishki qadaǵalaw bólimleriniń basshıları hám xızmetkerlerin lawazımǵa tayınlaw hám bosatıwdı Agentlik penen kelisiw tártibin belgilew;
3) korrupciyaǵa qarsı ishki qadaǵalaw bólimleri xızmetkerleri jumısınıń eń áhmiyetli nátiyjelilik kórsetkishlerin (KPI) tastıyıqlaw hám bahalaw tártibin belgilew;
4) korrupciyaǵa qarsı ishki qadaǵalaw bólimleri xızmetkerleriniń tájiriybesin arttırıw, olardı stajirovka hám attestaciyadan ótkeriw tártibin belgilew;
v) úsh ay múddette korrupciyaǵa qarsı ishki qadaǵalaw bólimleri xızmetkerleriniń kásiplik standartları islep shıǵılıwın hám belgilengen tártipte tastıyıqlanıwın támiyinlesin;
g) 2025-jıl 1-iyulge shekem «E-anticor.uz» elektron platformasında korrupciyaǵa qarsı ishki qadaǵalaw bólimleri basshıları hám xızmetkerleriniń elektron reestrin júrgiziw, korrupciyaǵa qarsı gúresiw boyınsha islengen jumıslar haqqındaǵı esabattı elektron túrde beriw, anonim sorawnamalar ótkerip, nátiyjelerin jámiyetshilikke járiyalaw imkaniyatın beriwshi elektron moduldi iske qossın;
d) korrupciyaǵa qarsı ishki qadaǵalaw bólimleri xızmetkerleriniń jumısın eń áhmiyetli nátiyjelilik kórsetkishleri (KPI) tiykarında bahalaw nátiyjeleri boyınsha hár yarım jılda Korrupciyaǵa qarsı gúresiw boyınsha milliy keńeske málimleme kirgizip barsın.
V. Finanslıq resurslar
10. «E-anticor.uz» elektron platformasın funkcional keńeytiwge qaratılǵan moduldi jaratıw menen baylanıslı qárejetler Agentliktiń byudjetten tısqarı qarjıları, xalıqaralıq hám milliy donorlar tárepinen ajıratılǵan qarjılar hám nızamshılıqta qadaǵan etilmegen basqa da derekler esabınan qarjılandırılıwı belgilensin.
VI. Qarardıń orınlanıwın shólkemlestiriw, támiyinlew hám qadaǵalaw
11. Agentlik Ózbekstan Milliy málimleme agentligi, Ózbekstan Milliy teleradiokompaniyası, Málimleme hám ǵalaba kommunikaciyalar agentligi menen birgelikte usı qarardıń maqset, wazıypaları, onnan kútilip atırǵan nátiyjelerdi ǵalaba xabar qurallarında hám Internet tarmaǵında keńnen sáwlelendiriw jumısların shólkemlestirsin.
12. Ózbekstan Respublikası Prezidentiniń ayırım qararlarına 2-qosımshaǵa muwapıq ózgerisler hám qosımshalar kirgizilsin.
13. Agentlik (A.Burxanov) eki ay múddette mápdar ministrlikler hám uyımlar menen birgelikte nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
14. Usı qararda belgilengen wazıypalardıń óz waqtında hám tolıq orınlanıwın támiyinlew, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikası Bas ministri A.N.Aripov hám Ózbekstan Respublikasınıń keńesgóyi D.B Kadirovqa júklensin.

Ózbekstan Respublikası

Prezidenti Sh.MIRZIYoEV

Tashkent qalası,

2025-jıl 21-aprel