Áziz perzentlerim!

On jeti jasqa shekemgi jas óspirimler arasında Saudiya Arabstanı maydanlarında bolıp ótken abıraylı jarısta tabıslı qatnasıp, joqarı sıylıq – Aziya kubogin qolǵa kirgizgenińiz benen xalqımızdıń atınan, óz atımnan shın júrekten qızǵın qutlıqlayman.
Sizler sıyaqlı náwqıran, erk-ıqrarlı jaslarımızdıń pútkil turnir dawamında bir de jeńiliske ushıramastan, rekord nátiyje kórsetip, janajan Watanımızdıń abırayın mártlik penen qorǵaǵanı, álbette, milliy futbolımızdıń tariyxına altın háripler menen jazılatuǵın dańqlı waqıya, desek, durıs boladı.
Ásirese, finalda jarıs ótkergen – Saudiya Arabstanı sıyaqlı oǵada kúshli komandaǵa qarsı keskin jarısta túrli basımlarǵa qaramastan, on bir oyınshıǵa qarsı toǵız futbolshı kúshli gúres alıp barǵanıńız shın mániste martliktiń úlgisi boldı. Sizler kórsetken joqarı mártlik hám sheberlik hár qanday maqtawǵa ılayıq bolıp esaplanadı.
Jarıstıń juwmaǵına bola, úsh talantlı hám sheber sportshımız jeke tártiptegi sıylıqlar iyesi bolǵanı, sonıń ishinde, Nematulloh Rustamjonov – turnirdiń eń jaqsı dárwazamanı, Asilbek Aliev – eń jaqsı hújimshi, Sadriddin Hasanov – eń jaqsı futbolshısı sıpatında atap ótilgenin de ayrıqsha atap ótiw zárúr.
Elimiz sizlerdiń tımsalıńızda bárqulla alǵa umtılıp jasaytuǵın, joqarı sheklerge jetiwge uqıplı Jańa Ózbekstan jaslarınıń eń jarqın wákillerin kóredi hám sizler menen haqılı túrde maqtanadı.
Mámleketimizde sportqa, sonıń ishinde, futboldıń rawajlanıwına berilip atırǵan joqarı itibardıń jáne bir ámeliy nátiyjesi bolǵan mine, usınday tariyxıy jeńis ushın sizlerge, sizlerdi tárbiyalap ósirgen ata-analarıńız hám ustaz-trenerlerińizge shın júrekten qızǵın minnetdarshılıq bildiremen.
Sizler usı jeńisten ruwxlanıp, bıyıl noyabr ayında Qatarda bolıp ótetuǵın jáhán chempionatında da Aziyanıń jeńimpaz komandası sıpatında múnásip qatnasasız, dep isenemen.
Baxıt hám jeńis sizlerge bárqulla yar bolsın, áziz perzentlerim!

Shavkat Mirziyoev,
Ózbekstan Respublikası Prezidenti