«Respublika aymaqlarında mikro gidroelektr stanciyaları tarmaǵın rawajlandırıw boyınsha qosımsha ilajlar haqqında»ǵı Prezident qararı (PQ-129-sanlı, 28.03.2025j) qabıl etildi.

Qararǵa muwapıq, 2025-2026-jılları Respublika aymaqlarında mikro gidroelektr stanciyaları tarmaǵın rawajlandırıwdıń tiykarǵı maqsetli kórsetkishleri etip tómendegiler belgilendi, sonıń ishinde:
– ulıwma quwatlılıǵı 164 MVt bolǵan 2983 mikro GES qurıw hám jılına 500 mln kVt/saat ekologiyalıq taza elektr energiyasın islep shıǵarıw;
– jańa mikro GESlerdi iske qosıw esabınan 280 mıń xalıqtı elektr energiyası menen támiyinlew;
– qurılıs dáwirinde 1200 jumısshınıń bántligin támiyinlew hám joybarlar iske qosılǵannan keyin 520 turaqlı jumıs ornın jaratıw.
2025-jıl 1-mayǵa shekem joybar hújjetlerine tiykarlanıp mikro GESler qurıw ushın tańlap alınǵan jer uchastkaları belgilengen tártipte Energetika ministrligine ajıratıladı.
Energetika ministrligi ajıratılǵan jer uchastkalarınıń joybar intakerlerine mikro GESler qurıw hám iske qosıw ushın 20 jıl múddette ijaraǵa beriliwin támiyinleydi.
Bunnan tısqarı, Kishi hám mikro gidroelektr stanciyaları joybarların ámelge asırıw toparı shólkemlestiriledi.

Qaraqalpaqstan xabar agentligi