Ózbekstan Respublikası Prezidentiniń qararı

Jańa Ózbekstanda «Insan qádiri ushın, insan baxtı ushın» degen iygilikli ideya tiykarında ámelge asırılıp atırǵan keń kólemli reformalardıń nátiyjesinde xalqımızdıń abadanlıǵın arttırıw, kóp milletli jámiyetimizde tınıshlıq-tatıwlıq, doslıq hám awızbirshilikti bekkemlew baǵdarındaǵı jumıslar sapa jaǵınan jańa basqıshqa kóterilmekte.
Bulardıń bári keńpeyillik, saqıylıq hám shúkirshilik tımsalı bolǵan múbárek Ramazan ayın elimizde tınısh-tatıw, payızlı hám quwanıshlı ortalıqta ótkeriwde úlken áhmiyetke iye bolmaqta. Bunı el-jurtımız arasında adamgershilik, óz-ara húrmet hám miyrim-shápáát, kem támiyinlengen hám mútáj shańaraqlarǵa itibar hám ǵamqorlıq kórsetiw sıyaqlı joqarı adamgershilik pazıyletler búgingi kúnlerde bunnan bılay da ayqın kózge taslanıp atırǵanı da tastıyıqlaydı.
Ullı áyyyam – muqaddes Ramazan hayıtın áne usınday qayırlı islerdi izbe-iz dawam ettirgen halda hár tárepleme múnásip kútip alıw, ótkeriw hám onıń mazmunında jámlengen iygilikli qádriyat hám dástúrlerdi keńnen úgit-násiyatlaw maqsetinde qarar etemen:
1. Usı jılı Ramazan hayıtınıń birinshi kúni 30-mart – ekshembi kúnine tuwra keliwi haqqındaǵı Ózbekstan musulmanları basqarmasınıń málimlemesi maǵlıwmat ushın qabıl etilip, elimizde 2025-jıl 30-mart kúni Ramazan hayıt bayramı sıpatında keńnen belgilensin.
2. Ózbekstan Respublikası Miynet kodeksiniń 208-statyasına muwapıq:
a) islenbeytuǵın bayram kúni esaplanatuǵın Ramazan hayıtınıń birinshi kúni 2025-jılı ekshembi – dem alıs kúnine tuwra keliwi múnásibeti menen usı dem alıs kúni 31-mart – dúyshembi kúnine kóshiriletuǵını;
b) onda ónirislik-texnikalıq hám shólkemlestiriwshilik sharayatlar (ámeldegi úzliksiz óndiris, xalıqqa hár kúni xızmet kórsetiw, náwbetshilik tiykarında islew hám basqalar) sebepli islenbeytuǵın bayram kúnleri toqtatıp qoyıw múmkin bolmaǵan jumıslardı atqarıwda dem alıs kúnleri kóshirilmeytuǵını maǵlıwmat ushın qabıl etilsin.
3. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Din isleri boyınsha komitet, Ózbekstan máhálleleri associaciyası, Sociallıq qorǵaw milliy agentligi hám basqa da birge islesiwshi shólkemler menen birgelikte aymaqlarda Ramazan hayıtın xalqımızdıń milliy dástúr hám úrp-ádetlerine sáykes túrde ótkeriw boyınsha tiyisli ilajlardı ámelge asırsın.
Turizm komiteti Transport minstrligi menen birgelikte watanlaslarımız ushın Ramazan hayıtı kúnlerinde muqaddes zıyarat orınları hám tariyxıy orınlarǵa zıyaratlardı shólkemlestiriw maqsetinde qolaylı sharayatlar menen imkaniyatlar jaratsın.
4. Ózbekstan Milliy teleradiokompaniyası, Ózbekstan Milliy málimleme agentligi hám basqa da ǵalaba xabar qurallarına Ramazan hayıtın belgilew menen baylanıslı ilajlardı keńnen sáwlelendiriw usınıs etilsin.
5. Usı qarardıń orınlanıwın qadaǵalaw Ózbekstan Respublikası Bas ministri A.N.Aripovqa hám Ózbekstan Respublikası Prezidentiniń keńesgóyi R.Q.Davletovqa júklensin.

Ózbekstan Respublikası Prezidenti
Sh.Mirziyoev
Tashkent qalası,
2025-jıl 26-mart