Ámiwdáryalı isbilermenler Qıtay mámleketinen kelgen isbilermen topar wákilleri menen ushırastı.

Onda rayon hákimi S.Xojametov, hákim orınbasarları, bólim baslıqları, hákim járdemshileri hám isbilermenler qatnastı.
Ushırasıwda rayon hákimi S.Xojametov shıǵıp sóylep, ushırasıwdıń tiykarǵı maqseti hám qıtaylı isbilermenler menen birge islesiw rayonnıń ekonomikalıq ósiwindegi áhmiyetin atap ótti.
– Qıtaylılar tárepinen elimizde energetika tarawında alternativ dáreklerge investiciyalar kirgizilmekte. Ózbekstan qayta tikleniwshi energetikanı jedel rawajlandırmaqta. Qıtay quyash hám samal elektr úskenelerin islep shıǵarıwda dúnya jetekshisi bolıp esaplanadı. Ózbekstanda 9 milliard dollarlıq 20 dan aslam energetika joybarları Qıtay kompaniyalarınıń qatnasıwında ámelge asırılmaqta hám olarda tiykarınan jergilikli qánigeler islemekte, – deydi rayon hákimliginiń Málimleme xızmeti baslıǵı CHaros Arslonova. – Ushırasıwda Qıtay delegaciyası aǵzaları rayonımız isbilermenleri menen jańa baylanıslar hám birge islesiw ornatıw, jańa birgeliktegi joybarlar hám sawda shártnamaların ámelge asırıw maqsetinde rayonımızǵa kelgenligi haqqında sóz boldı. Onda hákim járdemshileri hám isbilermenler ózlerin qızıqtırǵan sorawlarǵa juwap aldı, – deydi ol.
Ótkerilgen ushırasıw rayon isbilermenleri ushın úlken imkaniyatlarǵa tiykar jaratpaqta.

Qaraqalpaqstan xabar agentligi