Ózbekstan Respublikası Prezidentiniń qararı

Keyingi jıllarda mámleketimizde hújdan erkinligin támiyinlew, muqaddes islam dininiń insanıylıq mazmunın ózinde jámlegen qádiriyat hám dástúrlerdi qásterlep saqlaw hám kelesi áwladlarǵa jetkeriw, elimizde bolıp turǵan tınıshlıq, milletler hám dinleraralıq tatıwlıq hám awızbirshilik ortalıǵın bekkemlew, járdemge mútáj, mayıplıǵı bolǵan hám mútáj insanlardı hár tárepleme qollap-quwatlaw baǵdarında úlken jumıslar alıp barılmaqta. Usınday iygilikli ámeller múbárek Ramazan ayında, ásirese, ayqın kózge taslanbaqta.
Xalqımız ushın burınnan miyrim-shápáát, shúkirlik hám keńpeyillik tımsalı bolıp kelgen múbárek Ramazan ayın múnásip kútip alıw hám joqarı dárejede ótkeriw maqsetinde:
1. 2025-jılı múbárek Ramazan ayınıń baslanıwı 1-mart kúnine tuwra keliwi haqqındaǵı Ózbekstan musılmanları uyımınıń málimlemesi maǵlıwmat ushın qabıl etilsin.
2. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Din isleri boyınsha komitet, Sociallıq qorǵaw milliy agentligi, Ózbekstan máhálleleri associaciyası, Ózbekstan veteranlarınıń sociallıq jumısın qollap-quwatlaw “Nuroniy” qorı hám basqa birge islesiwshi shólkemler menen birgelikte aymaqlarda Ramazan ayın milliy dástúr hám qádiriyatlarǵa say túrde ótkeriwge baylanıslı ilajlardı ámelge asırsın.
Bul pazıyletli ayda “Ramazan – saqawat, awızbirshilik hám keńpeyillik ayı” ideyası tiykarında:
mútáj hám ilim-aǵartıwshılıq jolında izlenip atırǵan jaslarǵa járdem beriw boyınsha baslamalardı qollap-quwatlawǵa;
shańaraqlıq qatnasıqlardı bekkemlew, máhállelerde óz-ara túsinik hám isenim ortalıǵın kúsheytiw hám húrmet hám miyrim-shápáát qádiriyatların úgit-násiyatlawǵa;
qorshaǵan ortalıqtı saqlaw, muqaddes jerler, zıyarat orınların abadanlastırıw, náller egiwge hám Ramazan ayı menen baylanıslı ilajlarda normaǵa ámel etiw hám ısırapgershilikke jol qoymawǵa ayrıqsha itibar berilsin.
1. Ózbekstan Milliy teleradiokompaniyası, Ózbekstan Milliy málimleme agentligi hám basqa ǵalaba xabar qurallarına Ramazan ayın ótkeriw menen baylanıslı ilajlardı keńnen sáwlelendiriw usınıs etilsin.
2. Usı qarardıń orınlanıwın qadaǵalaw Ózbekstan Respublikası Bas ministri A.N.Aripov hám Ózbekstan Respublikası Prezidentiniń keńesgóyi R.Q.Davletovqa júklensin.

Ózbekstan Respublikası
Prezidenti Sh.MIRZIYoEV
Tashkent qalası,
2025-jıl 27-fevral