Ózbekstan Respublikası Prezidentiniń Рármanı

2025-jıl 9-mayda Eslew hám qádirlew kúni ótkeriliwi, sonday-aq, Ekinshi jer júzilik urıstaǵı jeńistiń 80 jıllıǵı belgileniwi múnásibeti menen Watandı qorǵaw jolında márdana gúresken ullı ata-babalarımızǵa ayrıqsha itibar hám tereń húrmet kórsetiw, jeńiske sheksiz úles qosqan Ózbekstan puqaraları – 1941-1945-jıllardaǵı urıs hám miynet frontı veteranlarına múnásip túrde húrmet-izzet kórsetiw maqsetinde:
1. 1941-1945-jıllardaǵı Ekinshi jer júzilik urısta erisilgen jeńistiń 80 jıllıǵı húrmetine «Ikkinchi jahon urushidagi ǵalabaning 80 yilligi» estelik yubiley medalı shólkemlestirilsin.
2. «Ikkinchi jahon urushidagi ǵalabaning 80 yilligi» estelik yubiley medalı menen Ózbekstan Respublikası puqaraları – «1941-1945-jıllardaǵı Ullı Watandarlıq urısta Germaniya ústinen erisilgen jeńis ushın» hám «Yaponiya ústinen erisilgen jeńis ushın» medalları menen, urıs jıllarında jawıngerlik xızmetleri ushın basqa da orden hám medallar menen sıylıqlanǵan yamasa urıs qatnasıwshısı gúwalıǵına yaki Watandarlıq urıs mayıbı gúwalıǵına iye bolǵan Ekinshi jer júzilik urıs qatnasıwshıları hám olarǵa teńestirilgenler, sonday-aq, Ekinshi jer júzilik urıs jıllarındaǵı front artı miynet veteranları, sonıń ishinde, «1941-1945-jıllar Ullı Watandarlıq urıstaǵı mártlik miyneti ushın», «Miynettegi erligi ushın», «Miynette órnek kórsetkeni ushın» medallarına yamasa «1941-1945-jıllardaǵı urıs dáwirinde Qurallı Kúshlerde puqara shaxslardı erkin jallaw boyınsha shtat lawazımında bolǵanı haqqındaǵı gúwalıqqa iye bolǵan miynet frontı qatnasıwshıları sıylıqlanatuǵını belgilep qoyılsın.
3. Tómendegiler:
«Ikkinchi jahon urushidagi ǵalabaning 80 yilligi» estelik yubiley medalı haqqındaǵı reje 1-qosımshaǵa muwapıq;
«Ikkinchi jahon urushidagi ǵalabaning 80 yilligi» estelik yubiley medalı hám sıpatlaması 2-qosımshaǵa, onıń gúwalıǵı hám sıpatlaması 3-qosımshaǵa muwapıq tastıyıqlansın.
4. Ózbekstan Respublikası Qorǵanıw ministrligi, Ishki isler ministrligi, Mámleketlik qáwipsizlik xızmeti, Kámbaǵallıqtı qısqartıw hám bántlik ministrligi jáne Еkonomika hám qarjı ministrligi byudjetten tısqarı Pensiya qorı menen birgelikte eki hápte múddette «Ikkinchi jahon urushidagi ǵalabaning 80 yilligi» estelik yubiley medalı menen sıylıqlanıwı zárúr bolǵan 1941-1945-jıllardaǵı urıs veteranları hám mayıplarınıń, miynet frontı qatnasıwshılarınıń anıq dizimin dúzip, Ministrler Kabinetine kirgizsin.
5. Ózbekstan Respublikası Ministrler Kabineti:
Oraylıq bank hám «Suvenir» juwapkershiligi sheklengen jámiyeti menen birgelikte bir ay múddette «Ikkinchi jahon urushidagi ǵalabaning 80 yilligi» estelik yubiley medalları hám olardıń gúwalıqlarınıń blankaları belgilengen tártipte Ministrler Kabinetiniń rezerv qorı qarjılarınıń esabınan tayarlanıwı támiyinlensin;
eki hápte múddette estelik yubiley medalların tapsırıw hám Ózbekstan Respublikası Prezidentiniń 2025-jıl 19-fevraldaǵı «Ekinshi jer júzilik urıs qatnasıwshıların xoshametlew haqqında»ǵı PP-24-sanlı Pármanında názerde tutılǵan bir mártelik aqshalay sıylıqlardı tólew tártibin belgilesin.
6, Usı pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti janındaǵı Qáwipsizlik keńesiniń xatkeri V.V.Mahmudovqa júklensin.
Ózbekstan Respublikası
Prezidenti Sh.MIRZIYoEV
Tashkent qalası,
2025-jıl 25-fevral

* * *
Ózbekstan Respublikası Prezidentiniń
2025-jıl 25-fevraldaǵı PP-32-sanlı Pármanına
1-qosımsha
«Ikkinchi jahon urushidagi ǵalabaning 80 yilligi» estelik yubiley medalı haqqında
REJE
1. «Ikkinchi jahon urushidagi ǵalabaning 80 yilligi» estelik yubiley medalı (keyingi orınlarda – estelik yubiley medalı) menen Ózbekstan Respublikası puqaraları «1941-1945-jıllardaǵı Ullı Watandarlıq urısta Germaniya ústinen erisilgen jeńis ushın» hám «Yaponiya ústinen erisilgen jeńis ushın» medalları menen, urıs jıllarında jawıngerlik xızmetleri ushın basqa da orden hám medallar menen sıylıqlanǵan yamasa urıs qatnasıwshısı gúwalıǵına yamasa Watandarlıq urıs mayıbı gúwalıǵına iye bolǵan Ekinshi jer júzilik urıs qatnasıwshıları hám olarǵa teńlestirilgenler, sonday-aq, Ekinshi jer júzilik urıs jıllarındaǵı front artı miynet veteranları, sonıń ishinde, «1941-1945-jıllar Ullı Watandarlıq urıstaǵı mártlik miyneti ushın» medallarına yamasa 1941-1945-jıllardaǵı urıs dáwirinde Qurallı Kúshlerde puqara shaxslardı erkin jallaw boyınsha shtat lawazımında bolǵanı haqqındaǵı gúwalıǵına iye bolǵan miynet frontı qatnasıwshıları sıylıqlanadı.
2. Estelik yubiley medalın tapsırıw Ózbekstan Respublikası Prezidenti atınan Ózbekstan Respublikası qorǵanıw ministri, ishki isler ministri, ayrıqsha jaǵdaylar ministri, Mámleketlik qáwipsizlik xızmetiniń baslıǵı, Milliy gvardiya sárkardası, Еkonomika hám qarjı ministrligi janındaǵı Bajıxana komitetiniń baslıǵı, qaraqalpaqstan Respublikası Joqarǵı Keńesiniń Baslıǵı, wálayatlar, Tashkent qalası, rayon hám qala hákimleri tárepinen jergilikli áskeriy basqarıw uyımları, urıs hám miynet veteranları keńesleriniń qatnasıwshılarınıń qatnasıwında saltanatlı jaǵdayda ámelge asırıladı.
Estelik yubiley medalın alıw huqıqına iye bolǵan adam 2025-jıl 1-yanvardan soń qaytıs bolǵan jaǵdayda medal onıń shańaraq aǵzalarına tapsırıladı.
3. Estelik yubiley medalları menen sıylıqlanǵanlarǵa medal menen birge belgilengen túrde gúwalıq tapsırıladı.
Gúwalıqqa estelik yubiley medalın tapsıratuǵın adam tárepinen qol qoyıladı.
4. Estelik yubiley medalı mámleketlik sıylıqlardan keyin kókirektiń shep tárepine taǵıladı.

* * *
Ózbekstan Respublikası Prezidentiniń
2025-jıl 25-fevraldaǵı PP-32-sanlı Pármanına
2-qosımsha
«Ikkinchi jahon urushidagi ǵalabaning 80 yilligi» estelik yubiley medalınıń
sıpatlaması
«Ikkinchi jahon urushidagi ǵalabaning 80 yilligi» estelik yubiley medalı (keyingi orınlarda – medal) 0,25 mikron qalıńlıqtaǵı altın qaplanǵan mıs aralaspasınan tayarlanadı hám diametri 34 millimetrli dóńgelek formada boladı.
Medaldıń aldıńǵı tárepi orayında quyash nurları fonında Ózbekstan Respublikası Prezidentiniń baslaması menen qurılǵan «Jeńis parki» estelik kompleksindegi óziniń úlken erligi hám sabırlılıǵı menen tariyx betlerine mórlengen Zulfiya Zakirova hám onıń fronttan qaytpaǵan bes ulı, sadıq kelinleri esteligine baǵıshlanǵan «Mártlik gimni» monumenti gúmis reńde jáne onıń aldına Máńgi jalın súwreti altın reńde sáwlelendirilgen.
Monumentlerdiń shep hám oń táreplerinde lavr gúl oramı jaylasqan bolıp, onıń tómengi bóleginde yubiley jılın ańlatatuǵın «80» sanı jazılǵan.
Medal jiyeklerine sheńberi boylap shetleri bórtip turatuǵın sheńber ishine háriplerdiń biyikligi 2,5 millimetrli «IKKINCHI JAHON URUSHIDAGI G‘ALABANING» jáne «YILLIGI» sózleri jaylasqan.
Medaldıń artqı tárepinde diametri 28 millimetr bolǵan sheńberdiń ishinde, eki qatarǵa «XOTIRA – ABADIY», «VATAN – MUQADDAS» jazıwları, onıń tómengi bóleginde Ekinshi jer júzilik urısı tamamlanǵan jıldı hám yubiley jılın ańlatatuǵın «1945-2025» sanları jazılǵan. Sheńberdiń sırtqı tárepinde quyash nurları tárizinde sızıqlar jaylasqan.
Jazıwlar bórtpeli hám altın háriplerde.
Medaldıń qalıńlıǵı 3 millimetr.
Medal Ózbekstan Respublikasınıń Mámleketlik bayraǵı reńlerindegi jol-jol shayı lenta sırılǵan bes múyeshli qálipke (kolodka) sheńber hám ildirgish járdeminde jalǵanadı. Materialdıń eni 24 millimetr. Kók, aq hám jasıl jollardıń eni 7 millimetrden, qızıl sızıqlardıń eni 1,5 millimetr.
Ildirgishtiń biyikligi 50 millimetr, eni 45 millimetr.
Ildirgishtiń artqı tárepine medaldı kiyimge taǵıp qoyıw ushın ilgek kórinisindegi qurılma ornatılǵan.
«Ikkinchi jahon urushidagi ǵalabaning 80 yilligi» estelik yubiley medalı

Aldıńǵı tárepi                                                                                                                                                  Artqı tárepi