Prezident Shavkat Mirziyoev 25-fevral kúni Sırdárya wálayatınıń ekonomikasın rawajlandırıw, jumıs orınların hám investiciyalardı kóbeytiw boyınsha 2025-jılǵı rejelerdi dodalaw boyınsha májilis ótkerdi.

Keyingi jıllarda Sırdárya da energetika, qurılıs, isbilermenlik bir qansha rawajlandı. Ótken jılı mámleketimiz basshısınıń Sayxunabad rayonına saparı waqtında qıytaq jerde ónim jetistiriwdi hám kishi joybarlardı qollap-quwatlaw boyınsha jańa tájiriybe jaratıldı.
Biraq intekerlik az bolǵanı ushın sanaat, sawda hám xızmetler rawajlanıwdan artta qalıp ketpekte. Atap aytqanda, Sırdáryada xızmet kórsetiw tarawınıń respublikadaǵı úlesi eń tómen. Kámbaǵallıq dárejesi 11 procentten kóp. 22 mıń puqara jumıssız.
Búgin dúnyada ekonomikalıq sharayatlar tez ózgermekte. Bunday jaǵdayda izlenip, úyrenip, ishki imkaniyatlardı tolıq iske qosqan aymaq jeńedi.
Usı maqsette, Sırdárya wálayatında investiciyalardı kóbeytip, sanaat hám biznes – ortalıǵın jaqsılaw, kámbaǵallıqtı qısqartıw, sonday-aq, wálayattıń tranzit potencialınan únemli paydalanıw boyınsha usınıslar islep shıǵılǵan.
Máselen, derlik 900 gektar jer maydanında sanaat zonaların shólkemlestiriw mólsherlengen. Bul 5 milliard dollar investiciyaǵa hám 20 mıńnan aslam jańa jumıs ornına tiykar jaratadı. Joybarlar Sırdárya, Shirin, Boyovut, Xovos, Mirzaabad, Gúlistan, Aqaltın hám Sardobada jaylasadı.
Wálayat geografiyalıq jaqtan Ózbekstannıń oraylıq bóleginde, bir neshe xalıqaralıq avtomagistral kesilispesinde jaylasqan bolıp, bir sutkada 311 mıń transport quralları ótedi. Soǵan bola, isbilermenler, bul jollar boyında júzlegen sawda shaqapshaların ashıwǵa tayar ekenligin bildirgen.
Ulıwma, 500 mıń kvadrat metr sawda-servis maydanı shólkemlestirilip, 50 mıń adamnıń bántligin támiyinlew imkaniyatı bar.
Jer-suwı mol bul aymaqta paxta, salı, miywe-ovosh hám palız ónimlerin jetistiriw ushın úlken potencial bar. Sonlıqtan kartoshka, piyaz, ejevika, smorodina hám shiye maydanları keńeytiledi. Qıytaq jer, atız hám kanallar shetindegi 38 mıń gektarǵa qayta islewshi hám eksportshılar biriktiriledi.
8 rayondaǵı tómen rentabelli 25 mıń gektar jer salı jetistiriwge ótkeriledi. Salı jetistiriw kárxanaların qollap-quwatlaw ushın ónimniń 50 procentin eksport etiwge ruqsat beriledi.
Wálayatta mıńnan aslam turaq jaydıń qurılǵanına eliw jıldan asqan. Renovaciya baǵdarlaması tiykarında, olardıń ornında 15 mıń kvartiralı zamanagóy turaq jaylardıń qurılısı názerde tutılǵan. Bul baǵdarda Marǵılan qalası, Doslıq rayonındaǵı unamlı tájiriybeler úyreniledi.
Jańa turaq jaylar arzan bolıwı ushın developerlerge salıq, bajıxana jeńillikleri beriledi. Sonday-aq, wálayattaǵı jol, elektr, turaq jay, irrigaciya, baqsha, mektep hám basqa sociallıq obyektlerdi jańalawǵa 100 million dollar baǵdarlanadı.
Gulistan qalasın úzliksiz ishimlik suwı menen támiyinlewge zárúr qarjı ajıratıw hám bul jumıslardı 2025-jıl 1-iyulge shekem juwmaqlaw tapsırıldı. Sonday-aq, Gulistan hám Shirin qalalarında urbanizaciya processlerin jedellestiriw maqsetinde olardıń aymaǵın keńeytiw usınısı maqullandı.
Ulıwma, usınday imkaniyatlar esabınan bıyılǵı jılda 2 milliard dollar investiciya tartıp, eksporttı 500 million dollarǵa jetkeriw wazıypası belgilendi. Sonıń nátiyjesinde 16 mıńnan aslam jańa jumıs ornı ashılıwı, kámbaǵallıq dárejesi 7,4 procentke túsetuǵını atap ótildi.

ÓzA